មន្ទីរពេទ្យជុំវិញពិភពលោកកំពុងជួបបញ្ហាមួយនេះ ដោយសារតែ ម៉ាឡេស៊ី បិទប្រទេស
តាមសេចក្ដីរាយការណ៍ពីសារព័ត៌មាន Bloomberg បានឱ្យដឹងថា មន្ទីរពេទ្យជាច្រើននៅបណ្ដាជុំវិញពិភពលោកកំពុងជួបបញ្ហាកង្វះនូវស្រោមដៃជ័រសម្រាប់វេជ្ជបណ្ឌិត ដោយសារតែប្រទេសអាស៊ានមួយគឺម៉ាឡេស៊ីកំពុងតែទទួលរងនូវការវាយប្រហារពី កូវីដ១៩ ធ្ងន់ធ្ងរជាងគេ។
សេចក្ដីរាយការណ៍នេះ ធ្វើឡើងបន្ទាប់ពីសមាគមផលិតស្រោមដៃ (Glovemaking Association) របស់ម៉ាឡេស៊ី អះអាងអំពី ឱនភាពនៃការផ្គត់ផ្គង់ទៅកាន់ពិភពលោកដោយសារតែរោងចក្រភាគច្រើនត្រូវបានរដ្ឋាភិបាលដាក់បទបញ្ញត្តឱ្យកាត់បន្ថយបុគ្គលិកបន្ទាប់ពីរដ្ឋាភិបាលប្រកាសបិទប្រទេសរួចមក។
គូសបញ្ជាក់ថា ស្រោមដៃប្រមាណ ៣ ក្នុងចំណោម ៥ ដែលមន្ទីរពេទ្យនៅជុំវិញ ពិភពលោកកំពុងប្រើប្រាស់សព្វថ្ងៃ ផលិតដោយរោងចក្រជាសមាជិករបស់សមាគមផលិតស្រោមដៃ មានមូលដ្ឋាននៅប្រទេសម៉ាឡេស៊ីទាំងអស់។
ក្រុមហ៊ុនផលិតស្រោមដៃធំបំផុតរបស់ពិភពលោក Top Glove Corp. Bhd បានថ្លែងថា តម្រូវការពីសហរដ្ឋអាមេរិក អឺរ៉ុប និងបណ្ដាប្រទេសជាច្រើនទៀត ធ្វើឱ្យខ្លួនផលិតអស់សមត្ថភាព ហើយការបំពេញតម្រូវការនៃកុម្ម៉ង់បណ្ដាប្រទេសទាំងអស់នេះ អាចយឺតរហូតដល់ ៤ខែឯណោះ។
លោកនាយករដ្ឋមន្ត្រីថ្មីរបស់ម៉ាឡេស៊ី Muhyiddin បានប្រកាសបិទប្រទេសទាំងមូល ចាប់ពីថ្ងៃ ១៨-៣១ ខែមីនា ពោលគឺប្រជាជនម៉ាឡេស៊ីទាំងអស់ ត្រូវបានហាមចាកចេញពីប្រទេស ហើយសម្រាប់អ្នកដែលត្រលប់មកពីបរទេសវិញ នឹងត្រូវឆ្លងកាត់ការត្រួតពិនិត្យសុខភាព និងត្រូវធ្វើចត្តាឡីស័កដោយខ្លួនឯងរយៈពេល ១៤ ថ្ងៃ។ ជាមួយគ្នានេះដែរលោក Muhyiddin ក៏បានប្រកាសផងដែរថា ការប្រមូលផ្ដុំគ្នាជាសាធារណៈ ការជួបជុំគ្នានៅក្នុង ព្រឹត្តិការណ៍សាសនា, ជំនួបកីឡា ព្រមទាំងសកម្មភាពវប្បធម៌និងសង្គម ក៏នឹងត្រូវហាមប្រាមផងដែរ។៕
ដោយ៖ វិភូ
