ក្រុមហ៊ុន Google ប្រាប់ថា ចៅហ្វាយល្អបំផុតលើលោកធ្វើរឿង ១០នេះ ធ្វើការជាមួយទៅមិនខុសទេ!
ក្រុមហ៊ុន Google បានស្រាវជ្រាវលើប្រធានបទមួយដែលមានចំណងជើងថា "Project Oxygen”។ គោលដៅសំខាន់នៃគម្រោងនេះ គឺដើម្បីស្វែងរកឲ្យឃើញថា តើអ្វីទៅដែលធ្វើឲ្យមនុស្សម្នាក់ក្លាយជាអ្នកគ្រប់គ្រងដ៏ល្អម្នាក់។ ជាលទ្ធផលក្រុមហ៊ុននេះបានចម្លើយពិតប្រាកដជាច្រើន ហើយចម្លើយដែលសុក្រឹតបំផុតខ្លួនទទួលបានគឺថា អ្នកដឹកនាំឬ ចៅហ្វាយល្អម្នាក់ ត្រូវមានបុគ្គលិកលក្ខណៈ ១០ ចំណុចខាងក្រោមនេះ៖
១.ជាគ្រូបង្វឹកដ៏ល្អមួយរូប
ជាជាងដោះស្រាយបញ្ហាទាំងអស់ភ្លាមៗ អ្នកគ្រប់គ្រងល្អបំផុតមួយរូបចេះប្រែក្លាយបញ្ហាឲ្យទៅជាឱកាសដ៏ល្អមួយសម្រាប់បង្រៀនកូនចៅរបស់ខ្លួន។ ពួកគេដឹកនាំក្រុមការងាររបស់ខ្លួន និងចែករំលែកចំណេះដឹងនៅពេលដែលត្រូវការ។ នេះជាចំណុចដ៏ពិសេសមួយ អាចអនុញ្ញាតឲ្យក្រុមការងារទាំងមូលទទួលបានបទពិសោធន៍ដ៏មានតម្លៃ និងរីកចម្រើនសម្រាប់មនុស្សគ្រប់គ្នា។
២.ផ្តល់អំណាចដល់ក្រុមការងារ និងមិនប្រើអំណាចគ្រប់គ្រងបែបរិតត្បិត
សាកសួរទៅបុគ្គលិកគ្រប់គ្នាទៅមើល តើមានអ្នកណាម្នាក់ដែលនិយាយថា ខ្លួនចូលចិត្តការគ្រប់គ្រងបែបរិតត្បិត ឬបែបភ្នែកម្នាស់នោះ? យ៉ាងណាមិញ ក្នុងនាមជាអ្នកទទួលខុសត្រូវដឹកនាំស្ថាប័នចៅហ្វាយដែលគេចាត់ទុកថា អស្ចារ្យលុះត្រាតែចេះផ្តល់សេរីភាពដល់ក្រុមការងារក្នុងការស្វែងរក ឬបង្កើតគំនិតផ្សេងៗរបស់ពួកគេ រៀនប្រឈមទៅនឹងហានិភ័យ និងការបង្កើតកំហុសជាដើម។ នេះញាំងឲ្យបរិយាកាសការងារមានភាពបត់បែន និងប្រកបដោយភាពជឿជាក់គ្នាទៅវិញទៅមក។
៣.បង្ហាញការយកចិត្តទុកដាក់លើភាពជោគជ័យ និងសុវត្ថិភាពផ្លូវចិត្តរបស់ក្រុមការងារទាំងមូល
ការស្រាវជ្រាវមួយរបស់ក្រុមហ៊ុន Google បានរកឃើញថា កូនសោដ៏អស្ចារ្យតែមួយគត់ដែលអាចលើកកម្ពស់សមត្ថភាពរបស់ក្រុមការងារ គឺធ្វើឲ្យបរិយាកាសផ្លូវចិត្តរបស់ពួកគេមានសុវត្ថិភាព។ ក្រុមហ៊ុននេះបានពន្យល់ថា ភាពសុវត្ថិភាពនៅកន្លែងនេះគឺចង់សំដៅថា ក្រុមការងារម្នាក់ៗមានអារម្មណ៍កក់ក្តៅជាមួយក្រុមការងារបើទោះបីជាកំពុងជួបឧបសគ្គក៏ដោយ។ ក្រុមការងារទាំងមូលមានទំនុកចិត្តខ្ពស់ គ្មានអ្នកណាម្នាក់នៅក្នុងក្រុមអង្គុយចាំប៉ែងជើងគ្នា រុញឲ្យអ្នកណាម្នាក់ធ្លាក់ទឹកនៅពេលមានកំហុស ឬយករួចខ្លួនពេលមានបញ្ហានោះឡើយ។ វ
៤.ផ្ដោតលើផលិតភាពការងារ និងលទ្ធផលស្របតាមគោលដៅ
អ្នកគ្រប់គ្រង ឬចៅហ្វាយដ៏ល្អម្នាក់ មិនមែនត្រឹមតែជាមនុស្សដែលត្រឹមតែពូកែសម្ដែងនោះទេ ក៏ប៉ុន្តែក៏ជាអ្នកដែលជំរុញឲ្យក្រុមការងារទាំងមូលមានការអភិវឌ្ឍកាន់តែល្អប្រសើរឡើង។ អ្នកដឹកនាំបែបនេះដើរតួជាអ្នកនាំផ្លូវអនុវត្តការងារ មិនភ័យខ្លាច និងលើកទឹកចិត្តក្រុមការងារទាំងមូលឲ្យបន្តអនុវត្តការងារកាន់តែមានផលិតភាពឆ្ពោះទៅកាន់ផែនការដែលបានកំណត់។
៥.ជាអ្នកទំនាក់ទំនង អ្នកស្តាប់ និងអ្នកចែករំលែកព័ត៌មានដ៏ល្អមួយរូប
អ្នកគ្រប់គ្រងដ៏ល្អបំផុត គឺជាអ្នកពូកែស្តាប់ដ៏អស្ចារ្យ។ នេះបានជំរុញឲ្យក្រុមការងារទាំងមូលអាចស្វែងយល់ពីគ្នាកាន់តែល្អប្រសើរឡើង និងបង្ហាញពីការយល់ចិត្តយល់ថ្លើមគ្នាប្រកបដោយការគោរពគ្នាទៅវិញទៅមក។ ក្រៅពីនេះ អ្នកគ្រប់គ្រងដ៏ល្អដឹងថា ចំណេះដឹងគឺជាអំណាច។ ហេតុដូច្នេះហើយទើបពួកគេរីករាយក្នុងការចែករំលែកព័ត៌មាន ឬចំណេះដឹងដល់ក្រុមការងារទាំងមូលដោយបើកចំហ។
៦.គាំទ្រដល់ការអភិវឌ្ឍន៍អាជីពការងារ និងពិភាក្សាអំពីការអនុវត្តការងារ
ជាទូទៅចៅហ្វាយដ៏ល្អចេះលើកទឹកចិត្តដល់ក្រុមការងារទាំងមូលតាមរយៈការចែករំលែកក្តីស្រលាញ់ ការយកចិត្តទុកដាក់ ការសរសើរពីស្នាដៃខិតខំប្រឹងប្រែង និងការគោរពឲ្យតម្លៃ។ ប៉ុន្តែទន្ទឹមនឹងនោះ អ្នកដឹកនាំល្អក៏មិនភ័យខ្លាចក្នុងការចែករំលែកមតិរិះគន់នូវចំណុចខ្វះខាតរបស់កូនចៅនោះដែរក្នុងន័យមួយគឺដើម្បីស្ថាបនា និងជួយណែនាំឲ្យពួកគេធ្វើបានកាន់តែល្អជាងមុន។ បន្ថែមលើនេះ ពួកគេក៏ហ៊ានលះបង់ការចំណាយផ្សេងៗដើម្បីវិនិយោគលើការបណ្តុះបណ្តាលដល់កូនចៅឲ្យទទួលចំណេះដឹងថ្មីៗ និងសម្រេចបានគោលដៅជីវិតរបស់ពួកគេ។
៧.មានចក្ខុវិស័យ ឬ យុទ្ធសាស្ត្រច្បាស់លាស់សម្រាប់ក្រុមការងារទាំងមូល
ក្នុងនាមជាចៅហ្វាយគ្រប់គ្រងដ៏ល្អមួយរូប ខ្លួនត្រូវដឹងថា តើក្រុមការងាររបស់ខ្លួននៅកន្លែងណានៅពេលឥឡូវនេះ? តើពួកគេកំពុងធ្វើដំណើរទៅកន្លែងណា? និងថាតើពួកគេត្រូវធ្វើអ្វីខ្លះដើម្បីអាចដើរទៅដល់កន្លែងនោះ? តាមរយៈការទំនាក់ទំនងដ៏ប៉ិនប្រសព្វមួយ ក្រុមការងារទាំងមូលអាចបោះជំហានដើរទៅមុខឆ្ពោះទៅកាន់គោលដៅយ៉ាងពិតប្រាកដ។ បន្ថែមលើនេះ អ្នកដឹកនាំក៏ត្រូវប្រាកដថា សមាជិកក្រុមការងារម្នាក់ៗដឹងពីតួនាទី និងភារកិច្ចដែលពួកគេត្រូវធ្វើរៀងៗខ្លួនដោយផ្អែកលើយុទ្ធសាស្ត្រដែលមានស្រាប់។
៨.មានជំនាញបច្ចេកទេសដើម្បីជួយផ្តល់យោបល់ដល់ក្រុមការងារ
មានត្រឹមតែចក្ខុវិស័យ ឬយុទ្ធសាស្ត្រមិនទាន់គ្រប់គ្រាន់ទេ។ អ្នកគ្រប់គ្រងដ៏ល្អយល់ពីស្ថានភាពការងាររបស់ក្រុមការងារ ទាំងមូល រួមទាំងភារកិច្ច និងបញ្ហាប្រឈមប្រចាំថ្ងៃរបស់ពួកគេម្នាក់ៗ។ ប្រសិនបើអ្នកគ្រប់គ្រងនោះត្រូវបានផ្លាស់ប្ដូរទៅធ្វើនៅប្រធានផ្នែកថ្មី ខ្លួនត្រូវ ចំណាយពេលយូរបន្តិចដើម្បីដឹងថា តើអ្វីៗខ្លះត្រូវបានធ្វើរួចរាល់ហើយ? ហើយចាប់ផ្តើមកសាងទំនុកចិត្តមុនពេលធ្វើការផ្លាស់ប្ដូរដ៏ធំមួយ ឬផ្តល់ដំបូន្មានជាដើម។
៩.មានការសហការប្រកបដោយប្រសិទ្ធភាព
អ្នកគ្រប់គ្រងមិនល្អជារឿយៗមើលទៅក្រុមការងាររបស់ខ្លួនដូចជាទាសករ ចូលចិត្តបញ្ជា ប្រឆាំង ឬជំទាស់ក្រុមការងារផ្សេងទៀតនៅក្នុងស្ថាប័នតែមួយ។ ផ្ទុយទៅវិញ អ្នកគ្រប់គ្រងដ៏អស្ចារ្យម្នាក់អាចមើលឃើញបានវែងឆ្ងាយពីនេះ។ ពួកគេធ្វើការដើម្បីផលប្រយោជន៍របស់ស្ថាប័នទាំងមូល ហើយលើកទឹកចិត្តក្រុមការងារផ្សេងៗទៀតឲ្យសម្រេចបានលទ្ធផលដូចក្រុមការងាររបស់ខ្លួនដែរ។
១០.ជាអ្នកសម្រេចចិត្តដ៏ពូកែមួយរូប
ចៅហ្វាយល្អ មិនមែនធ្វើអ្វីមួយភ្លាមៗតាមតែនឹកឃើញដោយមិនបានឆ្លងកាត់ការពិភាក្សាវែកញែកមួយដ៏ត្រឹមត្រូវនោះទេ។ ជាទូទៅ បន្ទាប់ពីបានសិក្សាស្វែងយល់ការពិត ពិចារណាគំនិត និងទស្សនៈរបស់ក្រុមការងារហើយ អ្នកដឹកនាំល្អមួយរូបត្រូវហ៊ានសម្រេចចិត្តធ្វើការងារនោះ និងប្ដេជ្ញាចិត្តថា ត្រូវតែសម្រេចធ្វើវាឲ្យបាន។
ប្រសិនបើនៅក្នុងស្ថាប័នរបស់អ្នក អាចបណ្តុះបណ្តាល និងលើកកម្ពស់សមត្ថភាពរបស់អ្នកដែលមានលក្ខណៈសម្បត្តិ ១០ នេះ អ្នកនឹងកសាងទំនុកចិត្ត និងជំរុញឲ្យក្រុមការងាររបស់អ្នកក្លាយជាអ្នកនាំផ្លូវមួយសម្រាប់អនាគតពួកគេ។ សូមចាំថា ពួកគេធ្វើតាមអ្វីដែលអ្នកចង់បានមិនមែនដោយសារតែពួកគេត្រូវធ្វើការងារនោះជាចាំបាច់នោះទេ ក៏ប៉ុន្តែដោយសារតែពួកគេស្រលាញ់ និងចង់ធ្វើការងារនោះដែរ៕
ប្រភព៖ Inc
