ដើម្បី​បន្ថែម​ទម្ងន់​ទៅលើ​ល្បះ​របស់​អ្នក អ្នក​អាច​លើក​យក​គុណកិរិយា​ឬ​ឃ្លា​គុណកិរិយា​អវិជ្ជមាន​មក​ដាក់​នៅ​ខាងដើម​ល្បះ ហើយ​ប្រើប្រាស់ Inversion ដើម្បី​ចម្រាស់​ទីតាំង​របស់​សព្វនាម​និង​កិរិយា​ជំនួយ (Inversion) ដែល​យើង​បាន​សិក្សា​រួច​មក​ហើយ​នៅ​ភាគ​ទី១។ ឯ​ភាគ​ទី២​យើង​ក៏​បន្ត​សិក្សា​អំពី ​Inversion ដែល​ត្រូវ​បាន​ប្រើប្រាស់​ដើម្បី​បង្កើត​ជា​ប្រយោគ​សំណួរ (Question) និង​ប្រយោគ Question tags។ ក្នុង​ភាគ​ទី៣​នេះ​យើង​នៅ​តែ​បន្ត​ជីក​ឲ្យ​ស៊ីជម្រៅ​អំពី​ការ​ប្រើប្រាស់ Inversion នៅ​ក្នុង​វេយ្យាករណ៍​ភាសា​អង់គ្លេស​ឲ្យ​កាន់តែ​លម្អិត​ថែម​ទៀត គឺ​នៅ​ពេល​ការ​ចម្រាស់​ទីតាំង​របស់​សព្វនាម​និង​កិរិយា​ជំនួយ ត្រូវ​បាន​ប្រើប្រាស់​នៅ​ក្នុង Echo tags, So+adjective/adverb និង Such និង So, Neither ឬ Nor។

•         Echo tags

បើ​អ្នក​បាន​សិក្សា​អំពី​ការ​ចម្រាស់​ទីតាំង​របស់​សព្វនាម​និង​កិរិយា​ជំនួយ​នៅ​ក្នុង Question tags នោះ​ការ​សិក្សា​អំពី Echo tags នឹង​រឹតតែ​មាន​ភាព​ងាយស្រួល​ជាង​មុន​ទៅ​ទៀត ព្រោះ​ថា​ការ​ប្រើប្រាស់​របស់​ពួក​វា​គឺ​ស្ទើរតែ​ដូចគ្នា​ទាំងស្រុង ខុស​ត្រង់​ថា​នៅ​ក្នុង Echo tags ប្រយោគ​ស្រប​ត្រូវ​ភ្ជាប់​ជាមួយ​សំណួរ​ស្រប រីឯ​ប្រយោគ​បដិសេធ​ត្រូវ​ភ្ជាប់​ជាមួយ​ប្រយោគ​បដិសេធន៍។

ឧទាហរណ៍

១) “I'm exhausted.” “Oh, are you?”

២) “I have passed the UK scholarship.” “Have you? That's fantastic !”

៣) “Please excuse me, I can't stay here any longer.” “Oh, can't you ?”

ចំណុច​គួរ​ចងចាំ​អំពី​ការ​ប្រើប្រាស់ Echo tags គឺ ការ​លើក​សំឡេង​ត្រូវ​បាន​ប្រើប្រាស់​នៅ​ពេល​អ្នក​ចង់​បង្ហាញ​ពី​ការ​ចាប់​អារម្មណ៍ ផ្ទុយ​មក​វិញ​ការ​ទម្លាក់​សំឡេង​ត្រូវ​បាន​ប្រើប្រាស់​ដើម្បី​បង្ហាញ​ពី​ការ​មិន​ចាប់​អារម្មណ៍។

•         So + adjective/adverb និង Such + noun phrase... that

នៅ​ពេល​ឃ្លា​គុណនាម So+adjective... that ឬ​ឃ្លា​គុណកិរិយា So+adverb... that និង Such+noun phrase... that ត្រូវ​បាន​លើក​យក​ទៅ​ដាក់​នៅ​ខាងដើម​ល្បះ​ដើម្បី​បន្ថែម​ទម្ងន់​ទៅលើ​ល្បះនោះ។​ទីតាំង​សព្វនាម​និង​កិរិយា​ជំនួយ​ត្រូវ​បាន​ចម្រាស់​គ្នា។

ឧទាហរណ៍

១) The painting is so mesmerizing that it can't be described in words. ក្លាយ​ជា So mesmerizing is the painting that it can't be described in words.

២) She speaks English so fluently that native speakers always misunderstand her for being a native English. ក្លាយ​ជា So fluently does she speak that native speakers always misunderstand her for being a native English.

៣) She was such a kind woman that everyone loves her. ក្លាយ​ជា Such a kind woman was she that everyone loves her.

•         So, Neither ឬ Nor

យើង​ប្រើ So នៅ​ពី​មុខ​កិរិយា​ជំនួយ ឬ​កិរិយា To be (Am/Is/Are) បន្ទាប់​មក​សព្វនាម នៅ​ពេល​ដែល​យើង​ចង់​បង្ហាញ​ពី​ការ​យល់​ស្រប​ជាមួយ​នឹង​ប្រយោគ​ស្រប។ រីឯ Neither នៅ​ពី​មុខ​កិរិយា​ជំនួយ ឬ​កិរិយា To be រួច​ហើយ​សព្វនាម នៅ​ពេល​ណា​យើង​ចង់​បង្ហាញ​ពី​ការ​យល់​ស្រប​ជាមួយ​នឹង​ប្រយោគ​បដិសេធន៍។

ឧទាហរណ៍

១) បើ​នរណា​ម្នាក់​និយាយ​ថា “I am not a pink lover.” (ខ្ញុំ​មិនមែន​ជា​អ្នក​ស្រឡាញ់​ពណ៌​ផ្កាឈូក​នោះ​ទេ។) នោះ​បើ​អ្នក​ក៏​មិន​ចូលចិត្ត​ដែរ អ្នក​អាច​ឆ្លើយ​តប​ថា “Neither/Nor am I.” ។

២) I like to read a sci-fi book, and so does Sophea. (ខ្ញុំ​ចូលចិត្ត​អាន​សៀវភៅ​វិទ្យាសាស្ត្រ​ច្នៃប្រឌិត ឯ​សុភា​ក៏​ដូច្នេះ​ដែរ។) ៕

ដោយ៖ ស្រីពៅ