«ខ្លាច ៣យ៉ាង» ដែលសហគ្រិនគួរតែបំបាត់ចោល ដើម្បីលទ្ធផលផ្លែផ្កា
ការភ័យខ្លាចធ្វើឲ្យយើងពន្យារពេល ធ្វើឲ្យយើងមិនហ៊ានចាប់ផ្ដើមធ្វើអ្វីដែលខ្លួនចង់ធ្វើឬចង់សាក។ នៅពេលដែលយើងដឹងពីឧបសគ្គដែលនៅខាងមុខអាចឲ្យយើងចេះរកវិធីដើម្បីទប់ស្កាត់ និងដោះស្រាយវា។ អ្នកគួរតែបំបាត់ចោលនូវភាពភ័យខ្លាចទាំង ៣ យ៉ាងខាងក្រោមនេះជាពិសេសបើសិនជាអ្នកជាសហគ្រិន។
១) ខ្លាចបរាជ័យ៖ យោងតាមរបាយការណ៍របស់ Global Entrepreneurship Monitor មនុស្សចន្លោះពី ២៩,៦៦ទៅ ៦១,៦ភាគរយសុទ្ធតែធ្លាប់ជួបប្រទះភាពភ័យខ្លាចនូវការបរាជ័យនេះ។ តែអ្នកត្រូវចងចាំថាការបរាជ័យមិនមានន័យថាអ្នកមិនជោគជ័យនោះទេ ព្រោះថាមុននឹងអ្នកទទួលបានភាពជោគជ័យ អ្នកក៏ត្រូវតែឆ្លងកាត់ការបរាជ័យដែរ។
២) ខ្លាចការរិះគុន៖ ពេលនេះយើងកំពុងតែរស់នៅក្នុងពិភពលោកមួយដែលពោលពេញទៅដោយការរិះគុនឥតល្ហែ។ ហេតុនេះហើយបើអ្នកមានគំនិតអាជីវកម្មណាមួយហើយគិតថាវាត្រឹមត្រូវនិងអាចទទួលបានការគាំទ្រពីមហាជន អ្នកគួរតែកុំចាំបាច់ខ្វល់ពីការរិះគុណរបស់មនុស្សមួយចំនួនតូចនោះ។
៣) ខ្លាចក្នុងការផ្សងគ្រោះថ្នាក់៖ ក្នុងនាមជាសហគ្រិន អ្នកគួរតែមានការគិតគូរម៉ត់ចត់និងប្រយ័ត្នប្រយែងមែនទែន មុននឹងអ្នកសម្រេចចិត្តធ្វើអ្វីមួយ តែអ្នកក៏មិនត្រូវខ្លាចរហូតដែរ រហូតដល់គ្មានឱកាសសាកល្បងក្នុងការធ្វើអ្វីមួយនោះទេ។ ត្រូវតែចេះសាកល្បង ហើយព្យាយាមទទួលយកលទ្ធផលដែរមិនថាលទ្ធផលនោះវិជ្ជមាន ឬអវិជ្ជមាននោះទេ៕
ដោយ៖ តូច ម៉ាយ៉ារស្មី
