តើហេតុអ្វីនាំឲ្យមានទស្សនៈលើកឡើងថា«មនុស្សសប្បាយចិត្តតែងរកលុយបានច្រើនជាងគេឯង?»
គេតែងតែនិយាយថា ទ្រព្យសម្បត្តិធ្វើឲ្យមនុស្សសប្បាយចិត្ត។ ប៉ុន្តែពេលនេះបែរជាមានមតិខ្លះលើកឡើងថា មនុស្សដែលសប្បាយចិត្តច្រើន ជាមនុស្សអាចរកលុយបានច្រើនទៅវិញ។ តើវាគួរឲ្យចម្លែកឬអត់? ឬមួយវាគឺជាការពិតទេដឹង? តោះសាកទៅមើលពីមូលហេតុដែលបង្ហាញថា មនុស្សសប្បាយចិត្តអាចរកលុយបានច្រើនទៅមើល៖
១) មនុស្សសប្បាយចិត្តតែងគិតរឿងវិជ្ជមាន
បុគ្គលិកដែលសប្បាយចិត្តតែងតែរកបានប្រាក់ចំណូលច្រើនជាងបុគ្គលិកដែលមួយថ្ងៃៗ អង្គុយតែមុខក្រញូវ។ នេះគឺដោយសារតែពួកគេគិតតែពីផ្លូវវិជ្ជមាន ដែលជាហេតុនាំឲ្យគេទទួលបានឱកាស និង បទពិសោធន៍ថ្មីៗជាច្រើន។ ពួកគេតែងតែចង់ធ្វើអ្វីគ្រប់យ៉ាងដោយមិនខ្លាចរអា ហើយហ៊ានប្រថុយប្រថាននឹងការងារជាច្រើនទៀត។
២) មនុស្សសប្បាយចិត្តតែងធ្វើការបានលទ្ធផលល្អជាង
តាមការសិក្សាស្រាវជ្រាវរបស់សាកលវិទ្យាល័យ Warwick in Coventry នៃចក្រភពអង់គ្លេសបានបង្ហាញឲ្យដឹងថា៖ « អ្នកដែលតែងតែសប្បាយចិត្តគឺធ្វើការងារបានល្អជាង ១២ភាគរយ បើធៀបទៅនឹងអ្នកដែលមិនសប្បាយចិត្ត។»
៣) មនុស្សសប្បាយចិត្តជាផ្នែកមួយនៃដំណោះស្រាយមិនមែនបញ្ហាទេ
មនុស្សភាគច្រើនចូលចិត្តលើកឡើងពីបញ្ហានៅក្នុងក្រុមហ៊ុន ហើយ ត្អូញត្អែរពីវាមិនឈប់ឈរ។ តែបើមនុស្សដែលសប្បាយចិត្តគ្រប់ពេលវិញនោះ គេតែងតែរិះរកដំណោះស្រាយជូនក្រុមហ៊ុនលើសនរណាៗទាំងអស់។
៤) មនុស្សសប្បាយចិត្តចូលចិត្តអភិវឌ្ឍខ្លួនណាស់
ពួកគេអាចរកលុយបានច្រើនជាងគេឯង ដោយសារមនុស្សបែបនេះចូលចិត្ត អភិវឌ្ឍខ្លួនឯងពីមួយកម្រិតទៅមួយកម្រិតទៀត។ កាលណាអ្នកមានសមត្ថភាពលើសគេលើសឯង ប្រាកដណាស់ បើទៅធ្វើការនៅទីណាក៏គេឲ្យប្រាក់ខែលើសគេដែរ។ ដូចនេះសម្រាប់អ្នកដែលមិនដែលសប្បាយចិត្ត គឺមិនត្រឹមតែនាំឲ្យខ្លួនឯងពិបាកចិត្ត និង ឆាប់ចាស់ទេ តែប្រាក់ខែក៏អាចរកបានតិចជាងគេដែរ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
