ហេតុផល ៣យ៉ាងបញ្ជាក់ថាបរាជ័យគឺជាថ្នាំប៉ូវសម្រាប់ភាពជោគជ័យ
បទពិសោធន៍នៃភាពបរាជ័យគឺមិនមែនជារឿងមួយដែលមនុស្សគ្រប់គ្នាត្រេកអរនោះទេ។ មានមនុស្សច្រើនណាស់ដែលយល់ថា ភាពបរាជ័យគឺជាលទ្ធផលដែលមិនអាចទទួលយកបាន។ ប៉ុន្តែភាពបរាជ័យមួយ មិនមែនជារឿងមួយអាក្រក់នោះទេ។
តាមការពិតវាជាសញ្ញាមួយដែលជួយប្រាប់អ្នកថា អ្នកមិនបានព្យាយាមឲ្យអស់ពីសមត្ថភាព ឬអ្នកនៅមានចំណុចខ្វះខាតជាច្រើនទៀតដែលត្រូវបំពេញបន្ថែម។សាកល្បងពិនិត្យមើលមូលហេតុសំខាន់ៗចំនួន ៣ ខាងក្រោមនេះមើល៍ថា តើភាពបរាជ័យពិតជាបានបង្រៀនអ្នកដោយរបៀបណា?
១) ការបរាជ័យអាចជួយអ្នកយកឈ្នះភាពភ័យខ្លាចការបរាជ័យនៅពេលអនាគត
មនុស្សគ្រប់គ្នា ជារឿយៗតែងភ័យខ្លាចនូវអ្វីដែលខ្លួនមិនដឹង ឬមិនទាន់កើតឡើង។ អារម្មណ៍បរាជ័យនឹងកើតមានឡើងនៅពេលអ្នកមានអារម្មណ៍ថា អ្វីៗដែលអ្នកកំពុងធ្វើសព្វថ្ងៃហាក់ទៅមុខមិនរួច។ ប៉ុន្តែអ្នកត្រូវចាំថា អារម្មណ៍ភ័យខ្លាចការបរាជ័យនេះនឹងរសាត់អណ្ដែតចេញពីអ្នកបន្តិចម្តងៗនៅពេលដែលអ្នកហ៊ានប្រឈមមុខជាមួយនឹងវា។ ដូចនេះបើអ្នកបរាជ័យ វាជារឿងល្អដែលអ្នកត្រូវបរាជ័យនៅពេលនេះ ជាជាងបរាជ័យនៅពេលក្រោយ។
២) ការបរាជ័យនឹងធ្វើឲ្យអ្នកកាន់តែរឹងមាំឡើង
នៅពេលបរាជ័យ តើអ្នកបានងើបឡើងវិញប៉ុន្មានដង? បើឆាប់បោះបង់ អ្នកនឹងបរាជ័យរហូត។ បើអ្នកដួលហើយក្រោក ទោះបរាជ័យច្រើនដងនៅពេលណាមួយ អ្នកនឹងអាចជោគជ័យជាមិនខាន។ តាមពិត ភាពបរាជ័យនឹងចូលមកប្រាប់អ្នកថា តើអ្នកអាចស្តាស្ថានការណ៍ទាំងនោះបានប្រសើរដល់កម្រិតណា? នៅពេលអ្នកព្យាយាមយកឈ្នះវាម្តងហើយម្តងទៀត ភាពភ័យខ្លាចនឹងការបរាជ័យរបស់អ្នកនឹងកាន់តែតិច ហើយអ្នកក៏ទទួលបានបទពិសោធន៍កាន់តែច្រើនជាងមុន ដែលជាចំណុចពិសេសមួយធ្វើឲ្យស្មារតីរបស់អ្នកកាន់តែរឹងមាំ។
៣) ការបរាជ័យនឹងបង្រៀនអ្នករកឲ្យឃើញអ្វីដែលអ្នកត្រូវធ្វើ
អ្វីដែលអ្នកនឹងសង្កេតឃើញក្រោយការបរាជ័យនោះគឺថា បន្ទាប់ពីនោះមក ស្ថានការណ៍ហាក់ដូចជាប្រសើរជាងមុន។ ដំណាក់កាលនេះនឹងបើកផ្លូវ២ឲ្យអ្នកសម្រេចចិត្តជ្រើសរើស។ ទី១ វាអាចជាការគិតមួយដែលប្រាប់អ្នកថា អ្នកត្រូវបោះបង់ផ្លូវនេះចោល ព្រោះអ្នកលែងដាក់ចិត្តដាក់កាយធ្វើវាទៀតហើយ ដូចនេះអ្វីដែលអ្នកចង់ធ្វើក៏លែងមានន័យសម្រាប់អ្នកតែម្តង។ ចំណែកផ្លូវទី២ អ្នកសម្រេចចិត្តថា នៅបន្តដំណើរទៅមុខទៀតបើទោះបីជាជួបបញ្ហារាប់មិនអស់ពីព្រោះបេះដូងរបស់អ្នកនៅតែស្រលាញ់ និងមានមហិច្ឆតាចង់ឈោងចាប់យកវាឲ្យបាន។ ប៉ុន្តែអ្នកនឹងមានវិធីសាស្ត្រ ឬផែនការថ្មីពីព្រោះផ្លូវដែលអ្នកដើរកន្លងមកបានបរាជ័យ។ ភាពបរាជ័យកន្លងមក នឹងប្រាប់អ្នកថា តើអ្នកត្រូវដើរតាមផ្លូវណា? ដោយរបៀបណា? ត្រូវធ្វើអ្វីខ្លះ?
ប្រភព៖ Lifehack
