រូបមន្ត ៧ ជំហានសម្រាប់ត្រៀមរៀបចំគោលដៅនៃភាពជោគជ័យ
បុគ្គលជោគជ័យ គឺជាមនុស្សម្នាក់ក្នុងចំណោមមនុស្សផ្សេងទៀតដែលតែងតែរៀបចំគម្រោងដើម្បីសម្រេចគោលដៅរបស់ខ្លួន។ ដូចនេះ ដើម្បីទទួលបានភាពជោគជ័យនៅក្នុងជីវិតរបស់អ្នក អ្នកចាំបាច់ត្រូវរៀបចំគោលដៅដែលត្រូវទៅឲ្យបានច្បាស់លាស់។ នៅពេលអ្នកមានគោលដៅហើយនោះ វានឹងជួយអ្នកឲ្យឈានសម្រេចបានទៅដល់គោលដៅនោះកាន់តែឆាប់រហ័សបំផុត។
ដើម្បីចង់សម្រេចគោលដៅណាមួយក្នុងឆ្នាំ ២០១៩ ខាងមុខនេះ អ្នកអាចសាកល្បងអនុវត្តតាមរូបមន្តប្រាំពីរជំហានខាងក្រោមនេះ៖
១) ចាប់ផ្តើមសរសេរគោលដៅមួយដែលអ្នកចង់បាន
ជំហានដំបូងដែលអ្នកត្រូវធ្វើនោះ គឺអ្នកត្រូវសរសេរគោលដៅរបស់អ្នកចេះមកនៅក្នុងទ្រង់ទ្រាយមួយដ៏ជាក់លាក់ និងអាចវាយតម្លៃបាន។ អ្នកគួរសរសេរអ្វីដែលអ្នកចង់បាននៅពេលខាងមុខទៅទាមអ្វីដែលអ្នកចូលចិត្ត ហើយគោលដៅនោះត្រូវសរសេរឲ្យបានលម្អិតជាទីបំផុតទើបអ្នកអាចកំណត់បានថា អ្នកនឹងត្រូវធ្វើអ្វីខ្លះនៅជំហានបន្ទាប់។
២) កំណត់រយៈពេលដែលត្រូវសម្រេចគោលដៅនោះ
អ្នកត្រូវចាំថា គោលដៅមួយដែលគ្មានពេលកំណត់មួយជាក់លាក់ គោលដៅនេះគឺគ្មានប្រយោជន៍អ្វីទាល់តែសោះ។ ដូច្នេះហើយ វាពិតជាមានសារសំខាន់ណាស់សម្រាប់អ្នកដែលត្រូវកំណត់ថា គោលដៅដែលអ្នកចង់បានត្រូវសម្រេចឲ្យបាននៅពេលណា? ប្រើរយៈពេលប៉ុន្មាន? គន្លឹះនៅទីនេះ គឺអ្នកត្រូវ បំបែកគោលដៅរបស់អ្នកទៅជាដំណាក់កាលនីមួយៗ និងកំណត់ពេលវេលាដែលត្រូវធ្វើនៅដំណាក់កាលនីមួយៗនោះ។
៣) អ្វីដែលអ្នកត្រូវធ្វើដើម្បីសម្រេចគោលដៅ
ចំណុចនេះគឺជាចំណុចសំខាន់ជាងគេបំផុតមួយនៅក្នុងចំណោមចំណុចផ្សេងៗទៀតនៅក្នុងរូបមន្តនេះ។ ដើម្បីសម្រេចគោលដៅរបស់អ្នក អ្នកត្រូវសរសេរថា តើអ្នកត្រូវធ្វើអ្វីខ្លះដើម្បីសម្រេចគោលដៅដែលអ្នកចង់បាន? នៅពេលដែលអ្នកមានគំនិត ឬវិធីសាស្ត្រថ្មីៗបន្ថែមទៀតពីលើវិធីដែលមានស្រាប់ដើម្បីសម្រេចគោលដៅរបស់អ្នក អ្នកត្រូវសរសេរវាបន្ថែមទៀត។
៤) រៀបចំជំហាននីមួយៗឥឡូវនេះ
នៅពេលអ្នកបានត្រៀមលក្ខណៈរួចរាល់ដើម្បីឈានទៅសម្រេចគោលដៅ និងបានសរសេរពីអ្វីដែលអ្នកត្រូវធ្វើ បន្ទាប់មកគឺជាពេលមួយដែលអ្នកត្រូវរៀបចំបញ្ជីផែនការដែលអ្នកត្រូវធ្វើជាក្រុមតូចៗ។ មូលហេតុដែលអ្នកត្រូវធ្វើដូចនេះ ពីព្រោះថា វាធ្វើឲ្យអ្នកកាន់តែងាយស្រួល និងអាចចាប់ផ្តើមអនុវត្តតាមគម្រោងរបស់អ្នកបានតែម្តង ព្រមទាំងមានភាពងាយស្រួលឲ្យអ្នកត្រួតពិនិត្យចំណុចជាច្រើនទៀតបានយ៉ាងល្អិតល្អន់ផងដែរ។
៥) កំណត់ឧបសគ្គដែលនឹងកើតមានឡើង
ជាការពិតបញ្ហាដែលនឹងកើតមានឡើង អ្នកមិនអាចព្យាករណ៍ដឹងទាំងស្រុងនោះទេ។ ប៉ុន្តែយ៉ាងហោចណាស់អ្នកក៏បានត្រៀមខ្លួនដើម្បីត្រៀមដោះស្រាយបញ្ហាមួយចំនួនផងដែរ។ វាជារឿងល្អដែលអ្នកសរសេរឡើងពីបញ្ហាដែលនឹងកើតមានឡើង ដើម្បីទុកលទ្ធភាពឲ្យអ្នកអាចរកយុទ្ធសាស្ត្រមួយចំនួនទុកជាមុនសម្រាប់ត្រៀមទប់ទល់បញ្ហាទាំងនោះ។
៦) ចាប់ផ្តើមអនុវត្តទៅរកគោលដៅ
នៅពេលអ្នកបានកំណត់រួចហើយពីគោលដៅដែលអ្នកចង់ជោគជ័យ គម្រោងជាក់លាក់របស់អ្នក ជំហាននីមួយៗដើម្បីសម្រេចគោលដៅនោះ និងកំណត់បានឧបសគ្គនានាដែលនឹងកើតមានឡើង នៅពេលនេះគឺជាពេលដែលអ្នកត្រូវចាប់ផ្តើមធ្វើហើយ។ ការចាប់ផ្តើមនេះគឺត្រូវអនុវត្តគម្រោង ឬជំហានទី១របស់អ្នកមុនគេដែលអ្នកបានរៀបចំរួចហើយ បន្ទាប់មកទើបអនុវត្តជំហានជាបន្តបន្ទាប់ទៀត។ សូមចាំថា នៅពេលជំហាននីមួយៗរបស់អ្នកបាញ់ឆ្ពោះ និងស្របទៅគោលដៅរបស់អ្នកហើយ ទោះមានឧបសគ្គអ្វីក៏ដោយ អ្នកនៅតែអាចមានសមត្ថភាពគ្រប់គ្រងបាន។
៧) ធ្វើវាឲ្យបានជាប់លាប់ជារៀងរាល់ថ្ងៃ
ខណៈដែលអ្នកបានបង្កើតគម្រោង និងយុទ្ធសាស្ត្រឆ្ពោះទៅកាន់គោលដៅដែលអ្នកចង់ជោគជ័យរួចហើយ អ្វីដែលអ្នកត្រូវដឹងទៀតនោះគឺថា តើរយៈពេលប៉ុន្មានទៅទើបអ្នកអាចដើរដល់គោលដៅនោះ? ដូចនេះជំហាននីមួយៗរបស់អ្នកពិតជាសំខាន់ៗណាស់។ នៅពេលអ្នករៀបចំជាជំហានៗបែបនេះ វានឹងក្លាយជារឿងសាមញ្ញ ប៉ុន្តែត្រូវធ្វើវាជាប្រចាំពីមួយថ្ងៃទៅមួយថ្ងៃ និងកុំឆាប់បោះបង់ឲ្យសោះ៕
ប្រភព៖ lifehack
