ធ្វើការនៅក្នុងក្រុមហ៊ុនមួយប៉ុន្មានឆ្នាំទើបល្អ មុនលាឈប់ទៅធ្វើការនៅកន្លែងថ្មី?
ក្រោយធ្វើការអស់រយៈពេលជាច្រើនឆ្នាំ អ្នកចាប់ផ្តើមគិតថា គួរតែផ្លាស់ប្ដូរការងារថ្មីដើម្បីរកឱកាសដែលល្អប្រសើរជាងនេះ។ មានបុគ្គលិកខ្លះប្រហែលជាធ្លាប់ផ្លាស់ប្ដូរការងារច្រើនដងនៅក្នុងអាជីពការងាររបស់ខ្លួន ដែលពេលខ្លះអាច ២ ដងក្នុងមួយឆ្នាំ។ ចំណែកអ្នកខ្លះទៀត អាចប្រើពេលច្រើនឆ្នាំទើបសម្រេចចិត្តចាកចេញទៅរកការងារនៅកន្លែងថ្មី។ នៅទីនេះមានសំនួរមួយចោទសួរឡើងថា តើអ្នកគួរចំណាយពេលធ្វើការនៅក្នុងក្រុមហ៊ុនមួយប៉ុន្មានឆ្នាំទើបល្អ ហើយដាក់ពាក្យលាឈប់ធ្វើការនៅកន្លែងថ្មីទៀត?
យោងតាមការស្រាវជ្រាវរបស់ Bullhorn survey reports បានបង្ហាញថា រយៈពេលដែលល្អបំផុតដែលអ្នកគួរធ្វើការឲ្យក្រុមហ៊ុនមួយគឺ ចន្លោះពី ៣ ឆ្នាំទៅ ៥ឆ្នាំ សម្រាប់អ្នកអ្នកដែលមានវ័យចន្លោះពី ២៥ ដល់ ៣៤ឆ្នាំ។ ចំណែកអ្នកដែលមានអាយុចាប់ពី ៦០ឡើងទៅ គឺមានរយៈពេលយូរបំផុតដល់ ១០ឆ្នាំ។
គុណវិបត្តិនៃការផ្តល់ប្តូរការងារច្រើនដងពេក ត្រឹមតែមួយឆ្នាំសោះ អ្នកបានផ្លាស់ប្ដូរការងារយ៉ាងច្រើនចាប់ពី ២ ទៅ ៣ដងទៅហើយនោះ វាមិនមានសញ្ញាណល្អនោះឡើយ។ ក្រុមហ៊ុនដែលជ្រើសរើសអ្នកនឹងមានភាពសង្ស័យថា អ្នកគឺជាបុគ្គលិកដាក់ការរំពឹងទុកខ្ពស់ ជាបុគ្គលិកឱកាសនិយម ឬ គ្មានភាពអត់ធ្មត់ ដែលមិនគួរត្រូវបានជ្រើសរើសធ្វើ ជាបុគ្គលិកនោះឡើយ។
គុណវិបត្តិនៃការធ្វើការនៅមួយកន្លែងយូរពេក ផ្ទុយទៅវិញ នៅពេលអ្នកធ្វើការនៅ កន្លែងមួយច្រើនឆ្នាំពេក នឹងធ្វើឲ្យក្រុមហ៊ុនមានភាពមន្ទិលសង្ស័យអ្នកកាន់តែច្រើនឡើង និងយល់ថា ចំណាប់អារម្មណ៍ការងាររបស់អ្នកនៅក្នុងក្រុមហ៊ុនកាន់តែបាត់បង់ទៅៗ។ បន្ថែមលើនេះវាអាចធ្វើឲ្យចៅហ្វាយរបស់អ្នកគិតថា អ្នកជាបុគ្គលិកមិនមានភាពបត់បែន មិនបើកគំនិតឲ្យបានទូលាយលើឱកាសថ្មីៗ ឬមិនចង់ផ្លាស់ប្ដូរដើម្បីភាពជោគជ័យនៅកន្លែងថ្មីជាដើម។
យ៉ាងណាក៏ដោយ មុនអ្នកសម្រេចចិត្តផ្លាស់ប្ដូរ ឬចង់បន្តធ្វើការងារដដែល អ្នកគួរសួរខ្លួនឯងនូវសំនួរសំខាន់ៗខាងក្រោមនេះជាមុនសិន៖
១.អ្នកចង់ចាកចេញដោយសារតែឱកាសការងារកន្លែងថ្មីល្អជាង ឬ មានប្រាក់ខែខ្ពស់ជាងមុន?
២.តើការផ្លាស់ប្ដូរការងារនឹងជួយអ្នក ឬ រារាំងដល់អាជីពការងាររបស់អ្នក?
៣.តើមានអ្វីផ្សេងទៀតដែលអ្នកអាចធ្វើដើម្បីជួយស្តារស្ថានភាពការងារបច្ចុប្បន្នរបស់អ្នកឲ្យប្រសើរឡើងដែរឬទេ ប្រសិនបើការចាកចេញនៅពេលនេះមិនមែនជាពេលដ៏ត្រឹមត្រូវមួយ?
៤.តើនេះជាពេលដែលត្រឹមត្រូវបំផុតសម្រាប់ចាកចេញដើម្បីអភិវឌ្ឍទាំងសមត្ថភាព និងជំនាញវិជ្ជាជីវៈដែរឬទេ?
៥.តើការចាកចេញនឹងធ្វើឲ្យប៉ះពាល់ដល់សុវត្ថិភាពការងាររបស់អ្នកចំពោះការងារថ្មីដែរឬទេ?
៦.តើអ្នកមានភាពជឿជាក់ហើយឬនៅថា ការងារនៅកន្លែងថ្មីពិតជាផ្តល់ឱកាសល្អបំផុតឲ្យអ្នកធ្វើការក្នុងរយៈពេល ជាច្រើនឆ្នាំ?
ប្រភព៖ thebalance
