ឆ្នាំ២០២៥ មនុស្សយន្តនឹងក្រសោបឱកាសការងារមនុស្សពាក់កណ្ដាល
ទីផ្សារការងារ នឹងមានការប្រែប្រួលនៅប៉ុន្មានឆ្នាំទៅមុខទៀតនេះ ដោយសារតែមនុស្សយន្តនឹងប្រតិបត្តិលើកិច្ចការងារ និងកន្លែងធ្វើការប្រមាណជាងពាក់កណ្ដាលនៅឆ្នាំ២០២៥។ ការប្រើប្រាស់ឧបករណ៍បច្ចេកវិទ្យាទំនើបដូចជា មនុស្សយន្ត និងឧបករណ៍សិប្បនិមិត្ត អាចបង្កើតនិងធ្វើការបានដូចមនុស្សនឹងកាន់តែមានចំនួនកើនឡើង។
យោងតាមរបាយការណ៍ថ្មីៗនេះដែលចេញផ្សាយដោយវេទិកាសេដ្ឋកិច្ចពិភពលោកដែលមានឈ្មោះថា «Future of Jobs» បានធ្វើការប៉ានស្មានថា ៥២%នៃការងារដែលមាន នឹងត្រូវបែងចែកឲ្យទៅមនុស្សយន្តក្នុងរយៈពេល ៧ឆ្នាំទៀត ដោយឡែកនាពេលបច្ចុប្បន្ន ការងារដែលប្រតិបត្តិដោយមនុស្សយន្តមានចំនួន២៩%ដែលជាចំនួនមួយធំគួរសម។
តើអនាគតនឺងមានអ្វីកើតឡើង? បើយោងតាមលោក Saadia Sahidi សមាជិកក្រុមប្រឹក្សាភិបាលនៃវេទិកាសេដ្ឋកិច្ចពិភពលោក បានមានប្រសាសន៍ថា ៖«នៅឆ្នាំ២០២៥ កិច្ចការជាច្រើននឹងត្រូវប្រតិបត្តិដោយមនុស្សយន្ត ស្របពេលជាមួយគ្នានោះ តួលេខនៃការងារថ្មីនឹងត្រូវបានបង្កើតផងដែរ ទោះយ៉ាងណាក៏ដោយ តាមការស្រាវជ្រាវរបស់យើងបានបញ្ជាក់ថា ទាំងម្ចាស់អាជីវកម្ម និង រដ្ឋាភិបាល មិនបានចាប់អារម្មណ៍លើបញ្ហាដែលប្រឈម នឹងការបដិវត្តឧស្សាហកម្មលើកទីបួននេះទេ»។ របាយការណ៍នេះផ្អែកលើការសិក្សានៃដំណើរប្រតិបត្តិការការងាររបស់អ្នកជំនាញនិយោជិក ១៥លាននាក់ មកពី ១២ឧស្សាហកម្មផ្សេងៗគ្នា។
តម្រូវការកើនឡើង របាយការ៍នេះបានបង្ហាញ នូវនិន្នាការដ៏គួរឱ្យចាប់អារម្មណ៍មួយចំនួនក្នុងរយ:ពេល ៤ឆ្នាំបន្ទាប់នេះថា ស្ទើរតែពាក់កណ្ដាលនៃក្រុមហ៊ុនទាំងអស់រំពឹងថានឹងកាត់បន្ថយកម្លាំងពលកម្មរបស់ខ្លួន ខណៈ:ដែល២/៥ប៉ុណ្ណោះបានអះអាងថា នឹងបន្ថែមលើចំនួននេះ។
ទោះជាមានការកើនឡើងយ៉ាងនេះក្តី វេទិកាសេដ្ឋកិច្ចពិភពលោកបានព្យាករណ៍ថា ៖«ការផ្លាស់ប្តូរដែលសំខាន់គឺ គុណភាព ទីតាំង ទ្រង់ទ្រាយ និង លំនឹងនៃមុខងារថ្មី ក្រុមហ៊ុនអាជីវកម្មនិងពង្រីកបន្ថែមនូវអ្នកត្រួតពិនិត្យការងារ កម្មករ ឬបុគ្គលិកសម្រាប់រៀបចំ និងផ្លាស់ប្តូរទីតាំងលើដំណើរការណាមួយ ហើយមុខងារដ៏សំខាន់ធ្វើឲ្យប្រសើរឡើងដោយប្រើបច្ចេកវិទ្យា»។ របាយការណ៍ក៏បានបញ្ជាក់ទៀតថា មុខងារដទៃទៀតដែលនឹងកើនឡើង “Human Skills”មានដូចជា បុគ្គលិកបម្រើសេវាកម្មដល់អតិថិជន ជំនាញការផ្នែកលក់ ការបណ្ដុះបណ្តាលនិងអភិវឌ្ឍ និងអ្នកឯកទេសអភិវឌ្ឍអង្កា ព្រមទាំងអ្នកគ្រប់គ្រងនូវការច្នៃប្រឌិតផងដែរ។
ចំណុចដែលព្រួយបារម្ភ បញ្ហាប្រឈមដែលរបាយការណ៍ដដែលនោះបានលើកឡើងមានដូចជា ការបង្រៀននិងបណ្ដុះបណ្ដាលនិយោជិកចំពោះការងារដែលបង្កើតថ្មី។ របាយការណ៍នេះកត់សម្គាល់ពីយុទ្ធសាស្ត្រនាពេលអនាគតចំនួន ៣ដែលក្រុមហ៊ុនបានសម្ភាសន៍ជាមួយអ្នកចូលរួម បានគូសបញ្ជាក់ដើម្បីគ្រប់គ្រងគម្លាតជំនាញដែលបានពង្រីកដោយការ អនុម័តនូវបច្ចេកវិទ្យាថ្មី ពួកគេរំពឹងថានឹងជួលបុគ្គលិកអចិន្ត្រៃយ៍ថ្មីដែលមានជំនាញពាក់ព័ន្ធនឹងបច្ចេកវិទ្យាថ្មីៗ ស្វែងរកស្វ័យប្រវត្តិកម្មភារកិច្ចការងារពាក់ព័ន្ធទាំងស្រុង និងបណ្តុះបណ្ដាលនិយោជិកដែលមានស្រាប់។
សរុបសេចក្ដីមក របាយការណ៍នេះអំពាវនាវឱ្យមាន យុទ្ធសាស្ត្របន្ថែម ដែលក្រុមការងារមានបំណងប្រើប្រាស់នូវការងារស្វ័យប្រវត្តិកម្មនៃភារកិច្ចការងារមួយចំនួនដើម្បីបំពេញបន្ថែមនិងលើកកម្ពស់កម្លាំងខ្លាំងនៃកម្លាំងពលកម្មរបស់មនុស្ស ហើយនៅទីបំផុតនឹងជួយផ្ដល់សិទ្ធិអំណាចដល់បុគ្គលិកដើម្បីពង្រីកសក្ដានុពលពេញលេញរបស់ពួកគេ៕
ដោយ៖ មាន រ៉ាម៉ាញ
