ទីផ្សារផលិតផលកសិកម្មសរីរាង្គនៅកម្ពុជា កំពុងទទួលបានការចាប់អារម្មណ៍គួរឲ្យកត់សម្គាល់
ក្រុមអ្នកផ្គត់ផ្គង់ និង អ្នកជំនាញផ្នែកផលិតផលសរីរាង្គ កំពុងមានសុទិដ្ឋិនិយមចំពោះ ទីផ្សារកសិកម្មសរីរាង្គនៅកម្ពុជា ស្របពេលដែលសន្ទុះនៃការប្រើប្រាស់មានការកើនឡើងគួរឲ្យកត់សម្គាល់នៅរយៈពេលប៉ុន្មានឆ្នាំចុងក្រោយនេះ។ ស្របពេលដែលបច្ចុប្បន្ននេះ បញ្ហាចំណីអាហារដែលមានសារធាតុគីមី កំពុងតែធ្វើឲ្យប៉ះពាល់ដល់សុខភាពរបស់អ្នកប្រើប្រាស់ ប្រជាជនទូទៅហាក់ដូចជាមកចាប់អារម្មណ៍ផលិតផលដែលគ្មានជាតិគីមី ដែលគេស្គាល់ថា «ផលិតផលសរីរាង្គ»។
មួយវិញទៀត គេមើលឃើញថា ដោយសារប្រជាជនមួយចំនួនមានជីវភាពល្អប្រសើរជាងមុន ដូច្នេះហើយពួកគាត់អាចមានលទ្ធភាពទិញ ផលិតផលដែលផ្ដល់អត្ថប្រយោជន៍ទាំងនោះ ដើម្បីបរិភោគ។ លោក ម៉ៅ មិថុនា អ្នកសម្របសម្រួលកម្មវិធីរបស់សមាគមកសិកម្មសរីរាង្គកម្ពុជា (Cambodian Organic Agriculture Association) ឬ ហៅកាត់ថាកូរ៉ា (COrAA) បានលើកឡើងថា៖ «ខ្ញុំមើលឃើញថា ប្រជាជនចាប់ផ្ដើមបារម្ភអំពីសុខភាពច្រើន ដូច្នេះគាត់ចាប់ផ្ដើមគិតពីផលិតផលស្តង់ដារគុណភាព»។
លោកបន្ថែមថា៖«ខ្ញុំឃើញថា មានការផ្លាស់ប្ដូរខ្លាំងមែនទែន
ទី១ គឺតាមរយៈពិព័រណ៍ផលិតផលសរីរាង្គ
ទី២តាមរយៈការផ្សព្វផ្សាយតាមរយៈសារព័ត៌មាន
ទី៣ តាមបណ្ដាញសង្គមហ្វេសប៊ុក»។
លោក ឌី សីវយុត្តិ ប្រធានសាខាហាងសួនធម្មជាតិ (Natural Garden) ដែលមាន៣សាខានៅរាជធានីភ្នំពេញបានអះអាងថា៖« តាមការសង្កេតរបស់ខ្ញុំ កំណើននៃការលក់ផលិតផលសរីរាង្គរបស់យើងចេះតែមានការកើនឡើងជាលំដាប់ពីមួយថ្ងៃទៅមួយថ្ងៃ»។ លោកពន្យល់បន្ថែមថា កាលពីមុនគឺភាគច្រើន មានតែជនបរទេសប៉ុណ្ណោះដែលទិញផលិតផលសរីរាង្គទាំងនោះ ប៉ុន្តែនាពេលបច្ចុប្បន្ននេះ ប្រជាជនខ្មែរមួយចំនួនបានចាប់ផ្ដើមគាំទ្រ និង ទិញយកទៅប្រើប្រាស់គួរឲ្យតក់សម្គាល់ ។ ដូចគ្នានេះដែរហាងសួនបន្លែអមតៈ (Amarak Veggie Garden)ដែលជាហាងលក់ផលិតផលសរីរាង្គចំនួនពីរកន្លែងនៅរាជធានីភ្នំពេញក៏មានកំណើននៃការលក់គួរឲ្យគត់សម្គាល់ផងដែរ។
ហាងខាងលើនេះ មានភ្ញៀវបរទេសចូលមកទិញប្រមាណ ៦០ភាគរយ និង ៤០ភាគរយគឺជាជនជាតិខ្មែរ។ លោក កែវ រ៉ាឌី ស្ថាបនិករបស់ហាងសួនបន្លែអមតៈ (Amarak Veggie Garden)បានបញ្ជាក់ថា៖ «កំណើននៃអ្នកប្រើប្រាស់ គឺមានប្រហែលពី២០ ទៅ៣០ ភាគរយកាលពីឆ្នាំ២០១៥កន្លងទៅ»។ សូមបញ្ជាក់ថា ហាងភាគច្រើនដែលកំពុងលក់ផលិតផលសរីរាង្គនាពេលបច្ចុប្បន្ននេះ គឺម្ចាស់ហាងមានចម្ការដាំដំណាំដោយខ្លួនឯងដូច្នេះ ពួកគេអាចនាំយកផលិតផលរបស់ខ្លួនមកលក់លើទីផ្សារ។ ទី២ ហាងទាំងនោះ ទទួលទិញផលិតផលពីក្រុមហ៊ុន ឬ អង្គការដែលជាសមាជិករបស់សមាគមកសិកម្មសរីរាង្គកម្ពុជា ដើម្បីធានាថា ផលិតផលទាំងនោះ មិនប្រើប្រាស់សារធាតុគីមីដែលនាំឲ្យប៉ះពាល់ដល់អ្នកប្រើប្រាស់។
ទាក់ទងនឹងបញ្ហាប្រឈមនៃផលិតកម្មសរីរាង្គវិញ លោកម៉ៅ មិថុនា បានពន្យល់ថា ផលលំបាកទី១ ដែលសមាគមក៏ដូចជា កសិករ អង្គការ និង ក្រុមហ៊ុនកំពុងជួបការលំបាកនោះគឺដោយសារតែ កត្តាបម្រែបម្រួលអាកាសធាតុ ព្រោះបញ្ហានេះនាំឲ្យទិន្នផលនៃការដាំដុះមិនអាចសម្រេចទៅតាមគម្រោង។ ទី២ គឺបញ្ហាទីផ្សារ បើទោះបីជាបច្ចុប្បន្នផលិតផលសុខភាពបែបនេះ ចាប់ផ្ដើមទទួលការចាប់អារម្មណ៍ខ្ពស់ក៏ដោយ ប៉ុន្តែទីផ្សារនៅតែមិនទាន់ទូលំទូលាយខ្លាំងនៅឡើយ និង ទី៣នោះគឺលទ្ធភាពក្នុងការផលិតជី។ ការដាំដុះដំណាំសរីរាង្គគឺ ត្រូវការជីធម្មជាតិ ហើយប្រជាកសិករ និង អ្នកផលិតគ្មានលទ្ធភាពគ្រប់គ្រាន់ក្នុងការផលិតជីតាមតម្រូវការនោះទេ ជាពិសេសនៅពេលពួកគេចង់ដាំដុះលើផ្ទៃដីធំ។
សូមបញ្ជាក់ថា សមាគមកសិកម្មសរីរាង្គកម្ពុជា គឺជាសមាគមដែលបានបង្កើតឡើងតាំងពីឆ្នាំ២០០៦ ដើម្បីជួយជំរុញផលិតផលវិស័យកសិកម្មសរីរាង្គនៅកម្ពុជា ហើយបច្ចុប្បន្ននេះ មានសមាជិកសរុបប្រមាណ៦៩ ។ ៦៩ សមាជិកនេះ គឺមានទាំងប្រជាកសិករ ក្រុមហ៊ុនឯងជន និង អង្គការដែលកំពុងបង្កើតផលិតផលកសិកម្មសរីរាង្គ៕
ដោយ៖ អ៊ុន ភក្តី
