ក្រុមហ៊ុន Facebook បានចំណាយប្រាក់ប្រមាណ ៧.៣ លានដុល្លារ កាលពីឆ្នាំទៅ ទៅលើការការពារសន្ដិសុខ សុវត្តិភាពផ្ទាល់ខ្លួនរបស់លោក Mark Zuckerberg ដែលនេះមានការកើនឡើង​ជិត ៥០% ពីចំនួន ៤.៩ លានដុលារ ក្នុងឆ្នាំ ២០១៦។ ការចំណាយនេះស្មើនឹង ២០ ០០០ ដុល្លារ ក្នុងមួយថ្ងៃ ទៅលើការការពារសន្តិសុខ សុវត្តិភាពរបស់លោក Mark Zuckerberg មហាសេដ្ឋីទី ៧ របស់ពិភពលោក ដែលមានទ្រព្យសម្បត្តិសរុបស្មើនឹង ៦៧ ពាន់លានដុល្លារ (ប៊ីលលានដុល្លារ) នេះបើយោងតាមការចុះផ្សាយរបស់គេហទំព័រ cnbc។

រឿងនេះមិនមែនជាអ្វីដែលគួរឲ្យភ្ងាក់ផ្អែលនោះទេ ដោយសារតែក្រុមហ៊ុនធំៗមួយចំនួនបានចំណាយមិនតិចនោះទេទៅលើការការពារសន្តិសុខ សុវត្តិភាពរបស់នាយកប្រតិបត្តិរបស់ខ្លួន។ ក្រុមហ៊ុន Amazon បានចំណាយទឹកប្រាក់ប្រមាណ ១.៦ លានដុល្លារក្នុងឆ្នាំ ២០១៦ ទៅលើការការពារសន្តិសុខ សុវត្តិភាពរបស់លោក Jeff Bezos ស្ថាបនិក និងជានាយកប្រតិបត្តិរបស់ក្រុមហ៊ុនខាងលើនេះ ដែលចំនួននេះស្មើនឹងក្រុមហ៊ុន Oracle បានចំណាយទៅលើលោក Larry Ellison សហស្ថាបនិក និងជានាយកប្រតិបត្តិរបសក្រុមហ៊ុន Oracle ផងដែរ។ ក្រឡេក​ទៅមើលក្រុមហ៊ុន Apple វិញ ដោយក្រុមហ៊ុនមួយនេះបានចំណាយប្រាក់ប្រមាណ ២២៤ ០០០ ដុល្លារទៅលើការការពារសុខសុវត្តិភាពរបស់លោក Tim Cook នាយកប្រតិបត្តិរបស់ ក្រុមហ៊ុនApple ខណៈក្រុមហ៊ុន Berkshire Halthaway បានចំណាយប្រាក់ប្រមាណ ៣៨៧ ០០០ដុល្លារ ទៅលើលោក Warren Buffet៕ សូមអាន៖ Mark Zuckerberg វ័យ ៣៣​ឆ្នាំ​​ មហាសេដ្ឋី​មាន​ទ្រព្យ​ច្រើន​លេខ​ ៥​ពិភពលោក តើ​​លោក​មាន​ប្រវត្តិ​យ៉ាងណាដែរ?

ដោយ៖ លង់ វណ្ណៈ