មេរៀនជីវិតទាំង ៥យ៉ាងដែលអ្នកអាចរៀនសូត្រតារាកំប្លែងនិងពិធីការិនីអាមេរិក Ellen DeGeneres
អ្នកស្រី Ellen DeGeneres ជាអ្នកកំប្លែងជនជាតិអាមេរិកដ៏ល្បីល្បាញម្នាក់និងជាម្ចាស់កម្មវិធី The Ellen Show ហើយក៏ជាម្ចាស់សៀវភៅ«Seriously, I am kidding»។ អ្នកស្រី Ellen DeGeneres មិនត្រឹមតែជោគជ័យក្នុងជីវិតនោះទេ ថែមទាំងនាំយកភាពរីករាយនិងជួយមនុស្សក្រីក្រជាច្រើននាក់ផងដែរ។ ខាងក្រោមនេះ ជាមេរៀនជីវិតទាំង ៥យ៉ាងដែលអ្នកអាចរៀនសូត្របានពីអ្នកស្រី Ellen DeGeneres៖
១) ចិត្តល្អចំពោះអ្នកដទៃ៖ ពិភពលោកពោរពេញទៅដោយភាពកាចសាហាវ អ្នកពុំចាំបាច់បន្ថែមភាពអាក្រក់ទៀតទេ។ ផ្ទុយទៅវិញ អ្នកត្រូវបង្ហាញក្តីស្រឡាញ់និងធ្វើល្អឲ្យបានច្រើន ត្រូវបង្ហាញថា ពិភពលោកនេះពិតជាស្រស់ស្អាតនិងគួរឲ្យចង់រស់នៅ។
២) ញញឹមក៏អាចផ្ដល់ក្តីរីករាយបានដែរ៖ អ្នកពុំចាំបាច់ក្លាយជាអ្នកមាន ដើម្បីផ្លាស់ប្ដូរជីវិតអ្នកដទៃនោះទេ។ ប្រសិនអ្នកពុំអាចជួយជាសាច់ប្រាក់ គ្រាន់តែញញឹម អ្នកក៏អាចកែប្រែថ្ងៃ ឬជីវិតរបស់អ្នកដទៃបានផងដែរ។
៣) មានអ្នកដែលលំបាកជាងអ្នកទៅទៀត៖ នៅក្នុងកម្មវិធី The Ellen Show អ្នកស្រី Ellen DeGeneres បានជួយមនុស្សដែលជួបការលំបាកជាច្រើនរូប។ ដូច្នេះហើយ ប្រសិនបើអ្នកគិតថា អ្នកកំពុងជួបការលំបាក ចូរក្រឡេកមើលអ្នកដទៃ ឬអ្នកជុំវិញខ្លួនរបស់អ្នកវិញ ជីវិតរបស់ពួកគេ អាចលំបាកជាងអ្នកទៅទៀត។ ឈប់អស់សង្ឃឹមទៀតទៅហើយព្យាយាមជម្នះឧបសគ្គទៅ។
៤) សើចឲ្យច្រើន៖ មិនថាស្ថានភាពរបស់អ្នកអាក្រក់យ៉ាងណានោះទេ ពេលខ្លះ អ្នកគ្រាន់តែសើចដើម្បីបំបាត់ទុក្ខ ហើយការសើចនោះក៏ជួយឲ្យអ្នកបានធូរស្រាលផងដែរ។
៥) រស់នៅជីវិតអ្នកចង់បាន៖ កុំខ្វល់អ្នកដទៃ គិតអ្វីមកលើអ្នក អ្វីដែលសំខាន់ គឺអ្នករីករាយនូវអ្វីដែលអ្នកធ្វើឬជីវិតដែលអ្នកកំពុងរស់នៅទៅបានហើយ៕
ប្រែសម្រួល៖ មុយយូ ប្រភព៖ readunwritten.com
