ក្នុងនាមជាអ្នកដឹកនាំ តើអាចធ្វើឲ្យការសម្រេចចិត្តមួយដ៏លំបាក ក្លាយទៅជាស្រួលវិញដោយរបៀបណា?
អ្នកដឹកនាំគឺមិនត្រឹមតែជាមនុស្សចាំ ជំរុញទឹកចិត្តឲ្យអ្នករួមការងារធ្វើបានល្អប៉ុណ្ណោះទេ តែអ្នកដឹកនាំក៏ជាមនុស្សដែលមានការសម្រេចចិត្តខ្លាំងទៅលើអ្វីមួយដែរ។ ពេលខ្លះការសម្រេចចិត្តនោះវាពិតជាលំបាកសម្រាប់អ្នកណាស់។
តែបើអ្នកដឹងពីយុទ្ធសាស្ត្រខ្លះៗ អ្នកនឹងសម្រេចចិត្តបានងាយស្រួលជាងពីមុន។ តើមានអ្វីខ្លះទៅ?
១) កុំស្មុគស្មាញលើការសម្រេចចិត្តណាដែលមិនសំខាន់
ពេលខ្លះបើអ្នកគិតច្រើនពេក មិនថារឿងនោះតូចឬធំយ៉ាងណា វានឹងក្លាយទៅជាការសម្រេចចិត្តដ៏ស្មុគស្មាញសម្រាប់អ្នក។ វិធីជួយកាត់បន្ថយការសម្រេចចិត្តដែលលំបាកៗ នោះគឺអ្នកគួរតែបែងចែកឲ្យដាច់ថាតើអ្វីទៅដែលអ្នកគួរចំណាយពេលគិតពីវា។ បើសិនជារឿងនោះមិនសូវជាចាំបាច់ ចូរកុំផ្ដោតអារម្មណ៍ខ្លាំងពេកនាំតែពិបាកខ្លួនទេ។
២) ត្រូវប្រៀបប្រដូចបញ្ហាក្រុមហ៊ុនឲ្យដូចជាបញ្ហាមិត្តភ័ក្ដិអ្នក
ពេលធ្វើការឲ្យក្រុមហ៊ុនគឺអ្នកមានសម្ពាធខ្លាំងណាស់ក្នុងការសម្រេចចិត្តលើអ្វីមួយ ដោយសារតែបើហ៊ានតែភ្លាត់ស្នៀតបន្តិចអ្នកអាចនាំបញ្ហាធំ។ តែបើអ្នកសាកបម្លែងបញ្ហានោះ ទៅជាបញ្ហារបស់មិត្តភ័ក្ដិអ្នកវិញ តើអ្នកមានដំណោះស្រាយបែបណា? គិតថាវាជាបញ្ហារបស់មិត្តភ័ក្ដិគឺវាងាយស្រួលជាងការគិតថាបញ្ហានេះគេជាបញ្ហារបស់ក្រុមហ៊ុន។ ពេលខ្លះអ្នកមានយោបល់ល្អជាងក្នុងការដោះស្រាយបញ្ហាមិត្តភ័ក្ដិ ជាងបញ្ហាក្រុមហ៊ុន។
៣) បង្កើតពេលវេលាជាក់លាក់មួយក្នុងការសម្រេចចិត្តរបស់អ្នក
បើអ្នកសម្រេចចិត្តអ្នកគួរចំណាយពេល៦ខែក្នុងការគិតលើកិច្ចការណាមួយ អ្នកត្រូវតែចំណាយពេលឲ្យត្រឹម៦ខែ។ បើមិនកំណត់ពេលឲ្យច្បាស់ទេនោះ អ្នកនឹងពន្យារការសម្រេចចិត្តនោះ រហូតគ្មានថ្ងៃបញ្ចប់ ហើយវានឹងធ្វើឲ្យអ្នកកាន់តែពិបាកឡើងៗ ក្នុងការជ្រើសរើសផ្លូវដើរ។
៤) បំបែករឿងឲ្យតូចដើម្បីងាយស្រួលក្នុងការសម្រេចចិត្ត
បើរឿងនោះវាធំ និងទូទៅសម្រាប់អ្នកពេក វាពិបាកបន្តិចហើយក្នុងការរិះរកផ្លូវដើរ។ តែបើអ្នកបំបែកបញ្ហាធំ ឲ្យក្លាយទៅជាតូច តូចហើយតូចទៀត ទាល់តែរកឃើញដំណោះស្រាយ ហើយវានឹងផ្ដល់ភាពងាយស្រួលសម្រាប់អ្នក៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ entrepreneur.com
