រឿងរ៉ាវសំខាន់ៗ៥យ៉ាង លោក បៀល ហ្គេត អ្នកមានជាងគេលើលោកទាយថា នឹងកើតឡើងនៅពេលអនាគត
លោក បៀល ហ្គេត (Bill Gates) ជាមហាសេដ្ឋីលំដាប់កំពូលនៅលើលោក ហើយបុគ្គលដ៏ជោគជ័យរូបនេះធ្លាប់បានទស្សន៍ទាយនូវរឿងរ៉ាវជាច្រើនកាលពីកំឡុងទសវត្សឆ្នាំ៩០ ហើយបច្ចុប្បន្នអ្វីពិតជាកើតឡើងដូចការគិតមែន ដូចជា ការប្រើប្រាស់អ៊ីនធឺណិត និង បណ្ដាញសង្គម។ អ្នកមានជាងគេលើលោករូបនេះ មិនបញ្ឈប់ការទស្សន៍ទាយត្រឹមនេះឡើយ ពោលគឺលោកបានបន្តទស្សន៍ទាយអំពីរឿងរ៉ាវដ៏គួរឲ្យចាប់អារម្មណ៍ជាច្រើនទៀត ដែលនឹងកើតឡើងនៅរយៈពេល១០ ឬ ២០ឆ្នាំទៅមុខ។
១) នៅតំបន់អាហ្វ្រិកនឹងលែងខ្វះអាហារ៖ នៅទ្វីបអាហ្វ្រិក មានប្រជាជនប្រហែល៧០ភាគគឺជាកសិករ ប៉ុន្តែដោយសារតែចំណេះដឹងនៅទាប បូកផ្សំនឹងកត្តាអាកាសធាតុ មិនអំណោយផលផងនោះ នាំឲ្យប្រជាជនជាច្រើនរស់នៅជាមួយនឹងសេចក្ដីស្រេកឃ្លាន ព្រោះគ្មានអាហារគ្រប់គ្រាន់។ ក្នុងមួយឆ្នាំៗទ្វីបដ៏កម្សត់មួយនេះនាំចូលអាហារពីបរទេសក្នុងរង្វង់ទឹកប្រាក់ប្រមាណ៥០ពាន់លានដុល្លារអាមេរិក។ ប៉ុន្តែលោក បៀល ហ្គេត (Bill Gates) យល់ឃើញថា នៅឆ្នាំ២០៣០ ប្រជាជននៅតំបន់នេះនឹងអភិវឌ្ឍខ្លួនក្លាយជាមនុស្សមានចំណេះដឹង និង ការច្នៃប្រឌិតច្រើនជាងមុន ដែលនាំឲ្យពួកគេអាចបង្កបង្កើនផលយ៉ាងមានប្រសិទ្ធភាព និង សម្បូរបែប នាំឲ្យពួកគេអាចចិញ្ចឹមខ្លួនឯងរស់ ដោយមិនខ្វល់រឿងអត់ឃ្លាន និង នាំចូលអាហារយ៉ាងច្រើនពីបរទេស។
២) អំពើភេរវកម្មដោយប្រើអាវុធជីវសាស្ត្រ នឹងអាចសម្លាប់មនុស្ស៣៣លាននាក់ក្នុងមួយឆ្នាំ(ឬតិចជាង១ឆ្នាំ)៖ អំពើភេរវកម្មដោយប្រើអាវុធជីវសាស្ត្រ គឺអំពើដ៏គ្រោះថ្នាក់បំផុត ព្រោះវាត្រូវបានគេប្រើប្រាស់នូវសារធាតុគីមី និង មេរោគកាចសាហាវ ដែលអាចឆក់យកជីវិតមនុស្សយ៉ាងងាយ ហើយក៏អាចឆ្លងទៅកាន់មនុស្សផ្សេងទៀតផងដែរ។ អ៊ីចឹងហើយ វាគឺជារឿងគ្រោះថ្នាក់មួយ សម្រាប់ពិភពលោក ហើយវានឹងកើតឡើងនៅឆ្នាំ២០៣០។
៣) ធនាគារចល័ត (Mobile Bank) នឹងជួយសម្រួលដល់ការរស់នៅរបស់ប្រជាជនក្រីក្រយ៉ាងច្រើន៖ បច្ចុប្បន្ននេះ នៅតាមប្រទេសក្រីក្រជាពិសេសនៅតំបន់អាហ្រ្វិក គឺ វាពិតជាមានការលំបាកយ៉ាងខ្លាំង ក្នុងការប្រើប្រាស់ការចំណាយ និង ទូទាត់សាច់ប្រាក់ផ្សេងៗ ព្រោះពួកត្រូវប្រើសាច់ប្រាក់ដោយផ្ទាល់ ហើយក៏ត្រូវទៅដល់ធនាគារដោយផ្ទាល់ផងដែរក្នុងករណីដែលពួកគេត្រូវការបង្វិលសាច់ប្រាក់។ ប៉ុន្តែនៅឆ្នាំ២០៣០ បច្ចេកវិទ្យានឹងកាន់តែទំនើប ហើយការយល់ដឹងរបស់ប្រជាជននៅប្រទេសក្រីក្រីក៏កាន់តែប្រសើរ ដូច្នេះហើយពួកគេអាចទូទាត់ការចំណាយ ឬ បង្វិលប្រាក់របស់ខ្លួន ដោយគ្រាន់តែប្រើប្រាស់ទូរស័ព្ទស្មាតហ្វូន ឬ Tablet ។
៤) នៅមុនឆ្នាំ២០៣៦ នឹងស្ទើតែលែងមានប្រទេសក្រីក្រក្នុងលោក៖ នៅពេលខាងមុខ ប្រទេសដែលក្រីក្រ នឹងព្យាយាមអភិវឌ្ឍខ្លួនយ៉ាងឆាប់រហ័ស ជាពិសេសការសិក្សាពីប្រទេសជិតខាង អំពីរបៀបក្នុងការបង្កើនផលិតភាពការងារ និង ជំរុញឲ្យមានការច្នៃប្រឌិត និង ការបង្កើតថ្មីច្រើនជាងមុន។
៥) នៅមុនឆ្នាំ២០៣០ ពិភពលោកនឹងរកឃើញថាមពលសុវត្ថិភាព ដែលអាចគ្របដណ្ដប់ពិភពលោកទាំងមូល៖ បច្ចុប្បន្ននេះ មានប្រទេសតិចតួចប៉ុណ្ណោះដែលព្យាយាមប្រើប្រាស់ថាមពលសុវត្ថិភាព ដែលមិនបង្កផលប៉ះពាល់ដល់បរិស្ថាន និង ជីវិតរបស់មនុស្សសត្វ ដូចជា ថាមពលដែលដើរដោយខ្យល់ ឬ ទឹក ខណៈមានភាគរយយ៉ាងខ្ពស់ដែលប្រើប្រាស់ប្រភេទថាមពលដែលបង្កផលប៉ះពាល់ធ្ងន់ធ្ងរដល់បរិស្ថាន។
ប៉ុន្តែនៅមុនឆ្នាំ ២០៣០ នឹងមានរបកគំហើញថ្មីនៃថាមពលសុវត្ថិភាព ដែលនាំឲ្យពិភពលោកទាំងមូលអាចប្រើប្រាស់ ដោយមិនបង្កបញ្ហាដល់បរិស្ថាន៕
អត្ថបទល្អៗផ្សេងទៀត៖ លោក Bill Gates អ្នកមានបំផុតក្នុងលោកថា អ្វីដែលធ្វើឲ្យលោកស្ដាយក្រោយបំផុតនោះ គឺ«មិនបានរៀនភាសាបរទេស» សម្រង់សម្ដីទាំង៥ឃ្លារបស់មហាសេដ្ឋីអាមេរិក លោក Bill Gates អាចជួយបំភ្លឺផ្លូវទៅរកភាពជោគជ័យ រឿងសំខាន់ៗ៦យ៉ាងដែល Bill Gates បានទស្សន៍ទាយកាលពីឆ្នាំ ១៩៩៩ គឺកើតឡើងនៅបច្ចុប្បន្នមែន!
ដោយ៖ រតនា វិចិត្រ
