គន្លឹះសំខាន់ៗ ជួយឲ្យអ្នកក្លាយជាអ្នកធ្វើបទបង្ហាញ (Presentation) ដ៏ឆ្នើមម្នាក់!
ការធ្វើបទបង្ហាញ (Presentation) គឺជារឿងសំខាន់សម្រាប់ សិស្ស ក៏ដូចជាបុគ្គលិកក្រុមហ៊ុន ដើម្បីបង្ហាញផលិតផល ឬ ពីអ្វីដែលខ្លួនបានស្រាវជ្រាវទៅកាន់អ្នកដទៃ។ ទោះបីជា អ្នកមានផលិតផលល្អ ឬ អ្វីៗដែលសំខាន់និងមានប្រយោជន៍យ៉ាងណាក៏ដោយ តែបើការធ្វើបទបង្ហាញរបស់អ្នកខ្សោយ នោះវានឹងធ្វើឲ្យមនុស្សភាគច្រើនមិនចង់ស្តាប់ឡើយ ដូច្នេះហើយអ្នកត្រូវតែពង្រឹងជំនាញធ្វើបទបង្ហាញនេះឲ្យបានប្រសើរបំផុត។
អ្នកត្រូវចងចាំគន្លឹះសំខាន់ៗទាំងនេះ ដើម្បីទទួលបានលទ្ធផលល្អក្នុងការធ្វើបទបង្ហាញ៖
១) ស្រាវជ្រាវឲ្យបានច្រើនលើប្រធានបទរបស់ខ្លួន
មុនពេលធ្វើបទបង្ហាញ ត្រូវប្រាកដថា អ្នកមានចំណេះដឹងច្រើន ឬ យល់ច្បាស់អំពីអ្វីដែលខ្លួនចង់បង្ហាញ។ បើអ្នកគ្រាន់តែយល់សើៗ ឬ មិនសូវច្បាស់ទេ នោះនាំឲ្យការនិយាយរបស់អ្នកទៅកាន់មនុស្សដទៃ ហាក់ដូចជា គ្មានទម្ងន់ដែលគ្រប់គ្នាមិនចង់ស្តាប់ ព្រោះពួកគេមិនដឹងថា និយាយក្នុងគោលដៅអ្វី។
២) កុំឈរអានក្រដាស ឬ ស្លាយទាំងស្រុង
ការធ្វើបទបង្ហាញ ជាពន្យល់ចំណុចសំខាន់ៗទៅកាន់អ្នកស្តាប់ ពោលគឺមិនមែនការមកដើម្បីឈរអានក្រដាស ឬ ស្លាយទាំងស្រុងឡើយ ព្រោះអ្នកដែលអង្គុយមើលក៏អាចអានដោយខ្លួនឯងបានដែរ តែអ្វីដែលសំខាន់នោះគឺការពន្យល់ពីចំណុចមួយទៅចំណុចទៀតយ៉ាងច្បាស់លាស់បំផុត។ ការអានបែបនេះក៏បញ្ជាក់ថា អ្នកគ្មានជំនឿចិត្តលើខ្លួនឯងផងដែរ ដែលបង្កឲ្យបរិយាកាសហាក់ដូចជា គ្មានន័យ។
៣) ត្រូវប្រើភ្នែក និង កាយវិការរស់រវើក
ត្រូវធ្វើបទបង្ហាញប្រកបដោយភាពស្វាហាប់ និង ជឿជាក់លើខ្លួនឯងតាមរយៈ ការប្រើប្រាស់ក្រសែភ្នែកដ៏មុតស្រួចសម្លឹងទៅកាន់អ្នកដទៃ ជាមួយនឹងកាយវិការសមសួនផងដែរ។ ការប្រើប្រាស់ក្រសែភ្នែកដ៏មុតស្រួចបែបនេះ ដើម្បីធ្វើឲ្យអ្នកមើលទាំងអស់ផ្ដោតអារម្មណ៍លើអ្វីដែលអ្នកកំពុងនិយាយ។
៤) ព្យាយាមនិយាយពាក្យសាមញ្ញ និង ងាយយល់
ជាទូទៅ ការធ្វើបទបង្ហាញគឺមានរយៈពេលខ្លីប៉ុណ្ណោះ ដូច្នេះហើយដើម្បីប្រាកដថា ការនិយាយរបស់អ្នក អាចជ្រាបចូលក្នុងខួរក្បាលរបស់មនុស្សភាគច្រើន អ្នកត្រូវតែព្យាយាមនិយាយអ្វីដែលសាមញ្ញ និង ងាយយល់។ បើអ្នកនិយាយតែពាក្យបច្ចេកទេសច្រើនពេក នោះវានាំឲ្យមនុស្សមួយចំនួនមិនយល់ ហើយអ្នកក៏ត្រូវចំណាយពេលដើម្បីបកស្រាយផងដែរ ហើយបកស្រាយចុះឡើងក៏ចាក់ផុតពីប្រធានបទបាត់។
ដោយ៖ រតនា វិចិត្រ
