ថ្នាំទិព្វ បីយ៉ាង ដើម្បីផ្គាប់ចិត្តអតិថិជន យ៉ាងមានប្រសិទ្ធភាពបំផុត!
បទពិសោធន៍របស់អតិថិជនមកលើផលិតផល ឬសេវាកម្មរបស់អ្នក គឺជាធាតុដ៏សំខាន់បំផុតនៃភាពជោគជ័យអាជីវកម្មរបស់លោកអ្នក។ បទពិសោធន៍របស់អតិថិជន ឆ្លុះបញ្ចាំងយ៉ាងច្បាស់ពីការមើលឃើញ និងឱ្យតម្លៃទៅលើផលិតផល/សេវាកម្មរបស់អ្នក។
បើផលិតផល ឬសេវាកម្មរបស់អ្នកមិនស្ថិតនៅក្នុងខ្សែភ្នែករបស់អតិថិជននោះទេ មានន័យថា ផលិតផលឬសេវាកម្មរបស់អ្នកមានតម្លៃតិចណាស់ចំពោះអតិថិជន ហើយច្បាស់ជាពួកគេនឹងមិនត្រលប់មករកវាវិញនោះទេ។ អតិថិជនមិនមែនចងចាំតែពីគុណតម្លៃនៃផលិតផល ឬសេវាកម្មរបស់អ្នកនោះទេ ប៉ុន្តែពួកគេក៏ចងចាំពីការផ្តល់ព័ត៌មានដ៏លម្អិត ការយកចិត្តទុកដាក់ពីសំណាក់បុគ្គលិករបស់អ្នក ហើយថាតើផលិតផលឬសេវាកម្មរបស់អ្នកងាយស្រួលស្វែងរក និងស្វែងយល់ក្នុងកម្រិតណា។
ខាងក្រោមនេះ គឺជាយុទ្ធសាស្ត្រងាយៗចំនួន ៣ដែលលោកអ្នកគួរអនុវត្ត៖
១) យកចិត្តទុកដាក់បុគ្គលិករបស់អ្នកឱ្យបានល្អ
មុនពេលដែលលោកអ្នកផ្ដោតទៅលើអតិថិជន ត្រូវច្បាស់ថា លោកអ្នកបានយកចិត្តទុកដាក់បុគ្គលិករបស់អ្នកបានល្អក្នុងកម្រិតណាហើយ។ ជាការពិត បុគ្គលិកដែលមានអារម្មណ៍ថាពួកត្រូវបានក្រុមហ៊ុនឱ្យតម្លៃ នោះពួកគេនឹងធ្វើការងារបានល្អ និងបន្តប្រឹងប្រែងបំពេញការងារបន្ថែមទៀត។ ប្រសិនបើពួកគេមានអារម្មណ៍ល្អជាមួយក្រុមហ៊ុន ពួកគេនឹងចង់ធ្វើឱ្យអតិថិជនរបស់អ្នកមានអារម្មណ៍ល្អដែរ។ ផ្ទុយទៅវិញ បើពួកគេមិនពេញចិត្តនឹងអ្វីមួយនៅក្នុងក្រុមហ៊ុនហើយនោះ នោះប្រហែលជាពួកគេអាចនិយាយដើមក្រុមហ៊ុនប្រាប់អតិថិជន ឬក៏ធ្វើឱ្យទំនាក់ទំនងរវាងក្រុមហ៊ុននិងអតិថិជនកាន់តែឃ្លាតឆ្ងាយក៏ថាបាន។ ចូរយកចិត្តទុកដាក់លើបុគ្គលិករបស់អ្នក តាមគ្រប់រូបភាព មិនថាការផ្ដល់ប្រាក់ខែសមរម្យ បរិយាកាសកន្លែងធ្វើការ ការគោរព និងផ្ដល់តម្លៃដល់ការបញ្ចេញមតិ និងគំនិតរបស់បុគ្គលិក និងការលើកទឹកចិត្តតាមមធ្យោបាយផ្សេងៗទៀត។
២)ត្រូវវិនិច្ឆ័យ និងសិក្សាពីតម្រូវការរបស់អតិថិជននាពេលខាងមុខ
រឿងដែលត្រូវចងចាំនោះគឺថា មិនត្រូវផ្ដល់សេវាបានល្អថ្ងៃនេះ អ្នករីករាយជាមួយវាដោយមិនបានសម្លឹងពីតម្រូវការរបស់ពួកគេនឹងមានការផ្លាស់ប្ដូរយ៉ាងណានោះទេ។ លោកអ្នកត្រូវតែប្រមើលមើលពីបញ្ហា កំហុសឆ្គង ឬចំណុចខ្វះខាតណាមួយដែលអាចនឹងកើតមាននៅពេលអនាគត ហើយព្យាយាមដាក់ថ្នាំវាឱ្យហើយកុំឱ្យវារីកធំបាន។ រឿងនេះ គឺទាមទារឱ្យលោកអ្នកបានស្គាល់ពី តម្រូវការរបស់អតិថិជនឱ្យបានច្បាស់លាស់។ ចុះតើធ្វើម៉េចទើបលោកអ្នកដឹងពីតម្រូវការរបស់អតិថិជនបាន? បាទ! វិធីដ៏ងាយបំផុត គឺសាកសួរពួកគេ។ លោកអ្នកគួរតែបង្កើតមធ្យោបាយទំនាក់ទំនងជាមួយអតិថិជនប្រកបដោយប្រសិទ្ធភាពដូចជាការទំនាក់ទំនងរបស់អ្នកផ្ដល់សេវា និងអតិថិជន ការទំនាក់ទំនងតាមបណ្ដាញសង្គម និងទំនាក់ទំនងតាមអ៊ីមែលជាដើម។ ការធ្វើការស្ទង់មតិក៏មិនត្រូវចោលនោះដែរ។ រឿងដែលសំខាន់មួយទៀតនោះគឺថា ត្រូវយកចិត្តទុកដាក់ឱ្យមែនទែនចំពោះមតិរិះគន់ដើម្បីស្ថាបនា ឬអ្វីដែលពួកគេចង់បានពីផលិតផល ឬសេវាកម្មរបស់អ្នក។
៣) បង្កើតមធ្យោបាយផ្ដល់ព័ត៌មានឱ្យបានទូលំទូលាយ
មិនមែនមានតែបុគ្គលិកផ្ដល់ព័ត៌មានគ្រប់គ្រាន់នោះទេ។ សម័យនេះគឺជាសម័យអ៊ីនធឺណិត ខណៈប្រជាជនខ្មែរកាន់តែច្រើនឡើងៗចេះប្រើអ៊ីនធឺណិត។ ដូច្នេះលោកអ្នកគួរចេះទាញយកឱកាសពីចំណុចនេះ។ លោកអ្នកត្រូវតែមានគេហទំព័រដែលផ្ដល់ព័ត៌មានលម្អិតពីផលិតផល និងសេវាកម្មរបស់អ្នក បង្កើតបណ្ដាញសង្គម និងមធ្យោបាយទំនាក់ទំនងផ្សេងៗទៀត។ ត្រូវចាំថា មិនមែនចេះតែបង្កើតហើយមិនធ្វើឱ្យសកម្ម (active) នោះទេ។ ត្រូវធ្វើឱ្យយ៉ាងណាឱ្យព័ត៌មានពីផលិតផលឬសេវាកម្មរបស់អ្នកមានភាពសម្បូរបែប និងទាក់ទាញផងដែរ៕
ដោយ៖ រតនៈវិភូ
