បុគ្គលជោគជ័យក្នុងជីវិត៧រូប ដែលធ្លាប់ត្រូវបានគេបណ្ដេញចេញពីការងារ
នៅពេលអ្នកត្រូវបានបណ្ដេញចេញពីការងារអ្នកប្រាកដជា តក់ស្លុតពីបញ្ហានោះ។ តែអ្នកត្រូវគិតថាបាត់បង់ការងារអាចជាការឈឺចាប់មួយតែវាមិនអាចមកបំផ្លាញជីវិតរបស់អ្នកទាំងមូលបានទេ។ នេះគឺជាបុគ្គលគំរូដែលបានផ្លាស់ប្ដូរការបរាជ័យការងារមកជាភាពជោគជ័យវិញ៖
១) លោក Steve Jobs ត្រូវបានបញ្ឈប់ពីមុខតំណែងជា ប្រធានរបស់Macintosh Group ដោយគណៈនាយកក្រុមហ៊ុនAppleហើយបន្ទាប់មកលោកក៏បានលាឈប់ពីក្រុមហ៊ុន។ គាត់បានបង្កើតក្រុមហ៊ុនកុំព្យូទ័រមួយឈ្មោះថា NEXT បន្ទាប់មកលោកក៏វិលទៅរកក្រុមហ៊ុនApple វិញគួបផ្សំនឹងបទពិសោធន៍ដ៏ល្អៗជាច្រើន។
២) Mark Cuban ៖ ការងារដំបូងរបស់លោកMark Cuban គឺជាអ្នកលក់IBM Computers នៅទីក្រុងDallas ។ ដំបូងឡើយគាត់មិនទាន់ច្បាស់ពីការងាររបស់គាត់នោះទេ តែពេលដែលគាត់បានយល់ដឹងពីការរកលុយតាមរយៈSoftware គាត់ក៏បានផ្លាស់ទៅកាន់ការិយាល័យអតិថិជនវិញ។ តែថ្ងៃមួយគាត់បានធ្វើអោយមានកំហុសដោយមិនបានបើកហាងលក់ដូរនោះមួយថ្ងៃ ព្រោះគាត់ជាប់រវល់បិទបញ្ជីនៅការិយាល័យអតិថិជនដែលជាហេតុនាំអោយគាត់ត្រូវបានគេបណ្ដេញចេញ។ តែពេលនេះគាត់ក្លាយជាមហាសេដ្ឋីម្នាក់ ហើយក៏បានប្រាប់ថាលោកមិនស្ដាយក្រោយក្នុងការបាត់បង់ការងារលើកដំបូងរបស់លោកទេ។
៣) Michael Bloomberg ៖ Michael គឺជាមហាសេដ្ឋីនិងជាអតីតចៅហ្វាយក្រុងនៅទីក្រុងNew York ពេលនេះគាត់ពិតជាបុគ្គលដ៏ជោគជ័យមួយរូបហើយលោកក៏បាននិយាយថា លោកមិនអាចមានថ្ងៃនេះទេប្រសិនបើលោកមិនត្រូវបានគេបណ្ដេញចេញនោះ។ លោកនិយាយថា៖ «គ្មាននរណាម្នាក់ផ្ដល់ការងារអោយខ្ញុំទេ ខ្ញុំហាក់ដូចជាមានជំនឿចិត្តច្រើនពេកក្នុងការស្វែងរកការងារ ចុះហេតុអ្វីក៏ខ្ញុំមិនបង្កើតក្រុមហ៊ុនមួយដោយខ្លួនឯងទៅ»។
៤) Jerry Seinfeld ៖ Seinfeld គឺជាមនុស្សដ៏ជោគជ័យមួយក្នុងការសម្ដែងShow កំប្លែងរបស់គាត់។ គាត់ត្រូវបានគេបណ្ដេញចេញនៅសម្រាប់ការសម្ដែងលើកដំបូងរបស់គាត់។ លោកមិនអោយបញ្ហាទាំងនោះបញ្ឈប់លោកបានទេ។ លោកចាប់ផ្ដើមអភិវឌ្ឍខ្លួនឯងហើយបង្កើតការសម្ដែងShow ដោយខ្លួនឯងទៀតផង។
៥) Truman Capote ៖ ពេលគាត់អាយុ១៧ឆ្នាំគាត់ត្រូវបានគេបណ្ដេញចេញពីការងារដោយសារតែគាត់បានបោះពុម្ពផ្សាយមាក់ងាយកវីនិពន្ធម្នាក់ឈ្មោះ Robert Frost ។ ក្រោយពេលមានបញ្ហារួចមក វាកាន់តែធ្វើឲ្យរូបលោកមានការតស៊ូ និងជោគជ័យជាងមុនទៅទៀត ក្នុងនាមជាអ្នកនិពន្ធម្នាក់។
៦) George Foreman ៖ លោកForeman ទទួលបានជោគជ័យដ៏ធំៗក្នុងជីវិតជាច្រើនតែគាត់នៅតែមានការសោកស្ដាយចំពោះការបាត់បង់ការងារលើកដំបូងរបស់គាត់។ ការងារដំបូងរបស់គាត់គឺជាអ្នករុះរើអីវ៉ាន់អោយក្រុមហ៊ុនមួយ តែដោយសារតែការភ្លេចភ្លាំងកាលវិភាគរបស់ខ្លួនបានធ្វើអោយគាត់បាត់បង់ការងារ។ គាត់បាននិយាយថាប្រសិនបើខ្ញុំមិនបានបណ្ដេញចេញទេនោះប្រហែលជាខ្ញុំត្រូវធ្វើការទីនោះមួយជីវិតហើយមើលទៅ។
៧) Bernie Marcus & Arthur Blank ៖ អ្នកប្រហែលជាមិនចាំថាអ្នកទាំងនោះជាអ្នកណាទេតែអ្នកប្រាកដជាឃើញឈ្មោះនេះនៅក្នុងហាងរបស់គេឈ្មោះThe Home Depot ។ ពួកគេធ្លាប់ជាអគ្គនាយកនៅឯ Handy Dan រដ្ឋ Carlifornia តែក្រុមហ៊ុនមានបញ្ហារួចពួកគេក៏ត្រូវបានបណ្ដេញចេញ។ តែការបណ្ដេញចេញបានបង្រៀនអោយពួកគេមានគំនិតបង្កើតជំនួញដោយខ្លួនឯង រហូតទទួលបានជោគជ័យធំធេង៕
ប្រែសម្រួល៖ ព្រំសុវណ្ណកណ្ណិកា ប្រភព៖www.cheatsheet.com
