ទីក្រុងតូក្យូៈ បុរសទី ២ ដែលត្រូវបានរកឃើញបន្ទាប់ពីនាវាដឹកគោមួយគ្រឿង បានលិចក្រឡាប់នៅប្រទេសជប៉ុនពេលធ្វើដំណើរពីញូហ្សេឡែនទៅចិន បានស្លាប់បាត់បង់ជីវិត។

ឆ្មាំឆ្នេរសមុទ្រជប៉ុនបាននិយាយថា បុរសនេះត្រូវបានគេប្រទះឃើញសន្លប់ នៅចម្ងាយប្រហែល ១២០ គីឡូម៉ែត្រភាគពាយព្យនៃកោះ Amami Oshima ត្រូវបានគេបញ្ជូនទៅមន្ទីរពេទ្យ។ សារព័ត៌មានក្យូដូ បានដកស្រង់សម្តីអ្នកការពារឆ្នេរថាបុរសនោះបានស្លាប់ហើយ។

ឆ្មាំសមុទ្របាននិយាយថា អាវពោង និងគ្រោងឆ្អឹងសត្វគោ ក៏ត្រូវបានប្រមូលមកពីតំបន់ដូចគ្នាដែរ ហើយការរុករកសមាជិកនាវិក ៤១ នាក់ផ្សេងទៀតកំពុងបន្ត។

កាលពីព្រឹកថ្ងៃសុក្រ ឆ្មាំឆ្នេរសមុទ្របាននិយាយថា ពួកគេបានរកឃើញបុរសនោះបាត់បង់ស្មារតី ហើយផ្កាប់មុខអណ្តែតទឹកនៅក្នុងសមុទ្រ ខណៈពួកគេបានស្វែងរកអ្នកនៅរស់ពីនាវាដែលបានលិចក្នុងអំឡុងពេលព្យុះ។

សេចក្តីថ្លែងការណ៍បាននិយាយថា អ្នកនៅរស់ម្នាក់ត្រូវបានគេជួយសង្គ្រោះ ហើយនៅព្រឹកថ្ងៃសុក្រនេះនាវាឆ្មាំឆ្នេរសមុទ្របានរកឃើញបុរសម្នាក់ដែលកំពុងអណ្ដែតទឹកនៅក្នុងសមុទ្រម្នាក់ទៀត។

នាវានោះមានឈ្មោះថា Gulf Livestock 1 បានដឹកសត្វគោជិត ៦០០០ ក្បាលនៅពេលវាលិចនៅឆ្នេរសមុទ្រភាគខាងលិចរបស់ប្រទេសជប៉ុន កាលពីថ្ងៃពុធនៅពេលព្យុះទីហ្វុងម៉ៃសាក់ឆ្លងកាត់តំបន់នោះ។

កប៉ាល់បានបញ្ជូនសញ្ញាអាសន្នមួយនៅព្រឹកថ្ងៃពុធ ហើយឆ្មាំឆ្នេរសមុទ្រអាចជួយសង្គ្រោះអ្នកនៅរស់ម្នាក់បាននៅល្ងាចនោះ - នាយទាហានហ្វីលីពីនម្នាក់ឈ្មោះ Sareno Edvarodo ដែលត្រូវបានគេប្រទះឃើញ។

ឆ្មាំសមុទ្របាននិយាយថា នាវិក ៤៣ នាក់មានមនុស្ស ៣៩ នាក់មកពីប្រទេសហ្វីលីពីន ២ នាក់មកពីប្រទេសនូវែលសេឡង់ និង ២ នាក់មកពីអូស្ត្រាលី។

ឆ្មាំសមុទ្របានដកស្រង់សម្តីរបស់លោក Edvarodo ដែលនិយាយថា កប៉ាល់បានរលត់ម៉ាស៊ីនមុនពេលវាត្រូវបានវាយប្រហារដោយរលក ហើយក្រឡាប់។

គាត់បានប្រាប់ក្រុមអ្នកជួយសង្គ្រោះថា គាត់បានពាក់អាវពោងការពារជីវិត ហើយបានចូលទៅក្នុងសមុទ្រ បន្ទាប់ពីមានសេចក្តីជូនដំណឹងព្រមានមួយ នៅពេលធ្វើដំណើរកាលពីថ្ងៃពុធ។

មិនមានព័ត៌មានលម្អិតអំពីពេលវេលានិងកន្លែងដែលកប៉ាល់បានលិចនោះទេ ប៉ុន្តែលោក Edvarodo បាននិយាយថា លោកមិនបានឃើញសមាជិកនាវិកផ្សេងទៀតទេ នៅពេលលោករងចាំគេមកជួយសង្គ្រោះ។

ទូកជ័រមួយត្រូវបានគេប្រទះឃើញ កាលពីល្ងាចថ្ងៃពុធ នៅក្នុងតំបន់ដែលកំពុងស្វែងរកអ្នកនៅរស់ ប៉ុន្តែអ្នកការពារឆ្នេរបាននិយាយថា ពួកគេមិនបានបញ្ជាក់នៅឡើយទេ ថាទូកនោះមានជាប់ទាក់ទងនឹងកប៉ាល់ដែលលិចនោះឬអត់។

ឆ្មាំឆ្នេរសមុទ្របាននិយាយកាលពីថ្ងៃសុក្រថា ពួកគេបានរកឃើញសត្វចិញ្ចឹមដែលងាប់ និងអាវពោងការពារជីវិត។ នាវាយាមឆ្នេរចំនួន ៤ គ្រឿង យន្តហោះក្រសួងការពារជាតិ និងអ្នកមុជទឹកដែលបានទទួលការបណ្តុះបណ្តាលពិសេស បានចូលរួមក្នុងប្រតិបត្តិការស្វែងរកនិងជួយសង្គ្រោះនេះ។

យោងតាមការព្យាករណ៍ក្នុងស្រុកបានអោយដឹងថា បច្ចុប្បន្នប្រទេសជប៉ុនកំពុងស្ថិតនៅក្នុងរដូវព្យុះប្រចាំឆ្នាំ ហើយព្យុះដ៏ធំទី ២ កំពុងធ្វើដំណើរមកដល់តំបន់ដដែល នៅថ្ងៃអាទិត្យនេះ។

កប៉ាល់នេះ បានធ្វើដំណើរពី Napier ក្នុងប្រទេសនូវែលហ្សេឡង់ ទៅកំពង់ផែចិន Tangshan។

ទូកនេះធ្លាប់មានបញ្ហាម៉ាស៊ីនពីមុនមក៖ របាយការណ៍អ្នកអង្កេតការណ៍ឆ្នាំ ២០១៩ របស់អាជ្ញាធរអូស្ត្រាលីបានកត់សម្គាល់ថាទូកនេះ មិនអាចធ្វើសមាហរណកម្មបានរយៈពេល ២៥ ម៉ោងបន្ទាប់ពីមានបញ្ហាជាមួយម៉ាស៊ីនសំខាន់របស់វាខណៈពេលកំពុងធ្វើដំណើរទៅកាន់ប្រទេសចិន។

ក្រសួងឧស្សាហកម្មបឋមរបស់ណូវែលហ្សេឡង់ (MPI) បាននិយាយកាលពីថ្ងៃព្រហស្បតិ៍ថា ខ្លួនកំពុងផ្អាកការនាំចេញសត្វគោរស់ជាបណ្តោះអាសន្ន បន្ទាប់ពីឧប្បត្តិហេតុនេះ។

របាយការណ៍នេះបាននិយាយថា «MPI ចង់ស្វែងយល់ពីអ្វីដែលបានកើតឡើងទាក់ទងនឹងការបើកកប៉ាល់សត្វចិញ្ចឹម នៅឈូងសមុទ្រ Gulf Livestock 1 នេះ» ។

ដោយ៖ សុធារ៉ា

ប្រភព៖ CNA