ចង់ធ្វើជាចៅហ្វាយខ្លួនឯង អ្នកគួរឆ្លើយសំនួរ៦នេះជាមុនសិនទៅ!
មនុស្សដែលមានក្តីស្រមៃចង់ធ្វើជាចៅហ្វាយខ្លួនឯង ភាគច្រើនយល់ថា មានតែការរកស៊ីចាប់ផ្តើមចេញរកស៊ីដោយខ្លួនឯងប៉ុណ្ណោះទើបអាចសម្រេចក្តីស្រមៃនេះបាន។ ពួកគេយល់ថា ជំនួញគឺជាច្រកផ្លូវនៃសេរីភាពហិរញ្ញវត្ថុដែលធ្វើឲ្យជីវិតរបស់ពួកគេសម្រេចបានក្តីសុបិនជាច្រើននៅក្នុងជីវិតរបស់ពួកគេ។
ក៏ប៉ុន្តែនៅក្នុងទិដ្ឋភាពជាក់ស្ដែង វាមានអ្វីដែលហួសពីនេះច្រើនណាស់។ ប្រសិនបើការគិតរបស់អ្នកដូចមនុស្សទាំងនោះ អ្នកគួរក្រឡេកមកសួរខ្លួនឯង ៦ សំនួរនេះជាមិនសិនថា តើអ្នកត្រូវដឹងអ្វីខ្លះ មុនចង់ធ្វើជាចៅហ្វាយខ្លួនឯង?
១.តើខ្ញុំអាចរស់បានដែរឬទេ ប្រសិនបើខ្ញុំធ្លាក់ខ្លួនក្រត្រដាបត្រដួសជាងនេះ?
នៅអាមេរិកអាជីវកម្មបង្កើតថ្មីមានចំនួន ៥៤៣ ០០០ ជារៀងរាល់ខែ។ ប៉ុន្តែជារៀងរាល់ខែ អាជីវកម្មដែលបិទទ្វារទៅវិញ មានច្រើនជាងនេះទៅទៀត។ ដូច្នេះតើមានអ្វីនៅពីក្រោយភាពបរាជ័យនេះ? នេះមានន័យថា ប្រសិនបើអ្នកមិនមានទេពកោសល្យលេចធ្លោខ្លាំងជាងគេទេនោះ អ្នកនឹងបរាជ័យក្នុងជំនួញដំបូងរបស់អ្នក ហើយនេះគឺជារឿងធម្មតាសម្រាប់ម្ចាស់អាជីវកម្មភាគច្រើនដែលត្រូវលង់ទឹកដោយសារតែជិះទូកតែមួយដូចគ្នាបែបនេះ។ ទោះបីជាអ្នកចាប់ផ្តើមដោយជោគជ័យ ក៏ប៉ុន្តែនៅពេលបន្ទាប់ជំនួញរបស់អ្នកអាចក្រឡាប់ចាក់ដែលធ្វើឲ្យអ្នករស់នៅត្រដាបត្រដួសជាងធ្វើការឲ្យគេទៅទៀតក៏ថាបាន។
២.តើខ្ញុំអាចធ្វើការពេលនៅម្នាក់ឯង និងដោយគ្មានការជំរុញលើកទឹកចិត្តពីអ្នកដទៃបានដែរឬទេ?
វាជារឿងមួយរំភើប និងគួរឲ្យចាប់អារម្មណ៍មែនទែននៅពេលនិយាយដល់គំនិតរកស៊ីដ៏អស្ចារ្យមួយ។ ក៏ប៉ុន្តែការអនុវត្តជាក់ស្ដែងគឺជារឿងមួយផ្សេងទៀត។ វាមិនមែនជារឿងមួយគួរឲ្យភ្ញាក់ផ្អើលទេ នៅពេលអ្នកពិចារណាពីហានិភ័យទាំងអស់ដែលទាក់ទងនឹងការចាប់ផ្ដើមអាជីវកម្មផ្ទាល់ខ្លួន ពីព្រោះថា អ្នកត្រូវតែគ្រប់គ្រងកាលវិភាគការងាររបស់អ្នក ហើយធ្វើជាចៅហ្វាយខ្លួនឯង។ អ្នកត្រូវលះបង់សេចក្ដីសុខខ្លួនឯងច្រើន ត្រូវធ្វើការច្រើនម៉ោងផងដែរ ហើយជាធម្មតានៅឯកោ និងត្រូវលើកទឹកចិត្តខ្លួនឯងឲ្យបានច្រើនជាងមិត្ត ភក្តិ ឬមនុស្សផ្សេងទៀតដែលនៅជុំវិញអ្នក។
៣.តើខ្ញុំចង់រៀនមុខជំនាញទីផ្សារ លក់ និងគណនេយ្យជាដើមដែរឬទេ?
ឧទាហរណ៍ថា អ្នកចេះតែជំនាញឌីសាញមួយ អ្នកមិនអាចបង្កើតក្រុមហ៊ុនឌីសាញបានទេ ប្រសិនបើអ្នកមិនចេះ ជំនាញផ្សេងៗទៀត។ គ្រប់អ្នករកស៊ី ម្ចាស់អាជីវកម្ម និងក្រុមហ៊ុននៅលើលោកនេះ ចាំបាច់ត្រូវមានជំនាញសំខាន់ៗអមគ្នាខាងក្រោមនេះដើម្បីជោគជ័យនៅក្នុងមុខជំនួញនោះគឺ៖
-ជំនាញលក់៖ ធ្វើឲ្យអ្នកមិនជួបភាពអត់ឃ្លាន
-ជំនាញទីផ្សារ៖ ធ្វើឲ្យអ្នកលក់បានកាន់តែច្រើន
-ជំនាញគ្រប់គ្រង៖ ធ្វើឲ្យអ្នកចេះរស់នៅជាមួយគេ
-ជំនាញរៀបចំគម្រោង៖ ធ្វើឲ្យអ្នកដើរស្របតាមផែនការ និងប្រកួតប្រជែងបានយូរអង្វែង
-ជំនាញបត់បែន៖ ធ្វើឲ្យអ្នកចេះសម្របខ្លួនស្របតាមស្ថានភាពជាក់ស្តែងបាន។
ក្នុងចំណោមជំនាញទាំងនេះ ជំនាញលក់ គឺជាជំនាញដែលសំខាន់ជាងគេបំផុតដែលអ្នកត្រូវតែចេះ។
៤.តើអ្នកមានជំនាញ និងបទពិសោធន៍ពិតប្រាកដលើមុខជំនួញរបស់អ្នកហើយឬនៅ?
អ្នកមិនអាចដើរចូលក្នុងមុខជំនួញក្នុងនាមភាពជាម្ចាស់ខ្លួនឯងដោយមិនចេះ មិនដឹង ឬគ្មានបទពិសោធន៍លើមុខជំនួញដែលអ្នកកំពុងតែធ្វើនោះឡើយ។ អ្នកត្រូវប្រាកដថា វាជាចំណង់ចំណូលចិត្តរបស់អ្នក វាជាទេពកោសល្យរបស់អ្នក និងជាអ្វីដែលអ្នកបានធ្វើល្អបំផុត។ បើមិនដូច្នេះទេ អ្នកនឹងចាប់ផ្តើមធ្វើវាដោយភាពងងឹតងងល់ ហើយវានឹងធ្វើឲ្យអ្នកបរាជ័យ ចំណាយពេល ចំណាយលុយ និងធនធានរបស់អ្នក។
៥.តើខ្ញុំអាចផ្ទេរភារកិច្ចការងារទៅមនុស្សក្រោមបង្គាប់បានដែរឬទេ?
អ្នកជំនួញគ្រប់រូបមិនមែនសុទ្ធតែអាចអនុវត្តការងាររបស់ខ្លួនទៅតាមក្រឹត្យក្រមនេះទាំងអស់នោះទេ។ វាជាបញ្ហាប្រសិនបើអ្នកមិនមានសមត្ថភាពគ្រប់គ្រងមនុស្ស របៀបផ្ទេរភារកិច្ច និង ទំនួលខុសត្រូវការងារ ទំនុកចិត្ត និងភាពជឿជាក់ទៅលើមនុស្សក្រោមបង្គាប់។ ប្រសិនបើអ្នកចង់ធ្វើជាចៅហ្វាយខ្លួនឯង អ្នកត្រូវយកចិត្តទុកដាក់លើការបង្រៀនពួកគេពីរបៀបធ្វើការ ការគ្រប់គ្រង និងបណ្ដុះបណ្ដាលជាដើមដើម្បីធ្វើឲ្យការផ្ទេរទំនួលខុសត្រូវរបស់អ្នកទៅឲ្យពួកគេដាក់ទៅចំកន្លែង ត្រូវពេល និងត្រូវមនុស្ស។
៦.តើខ្ញុំអាចជាអ្នកដឹកនាំល្អដែរឬទេ?
អ្នកមិនអាចផ្ទេរភារកិច្ចទទួលខុសត្រូវការងារប្រកបដោយប្រសិទ្ធភាពបានទេប្រសិនបើអ្នកមិនដឹងពីរបៀបគ្រប់គ្រងប្រកបដោយប្រសិទ្ធភាព។ ហើយទោះបីជាអ្នកមានគ្រូបណ្ដុះបណ្ដាលខាងជំនួញដែលអ្នកជឿជាក់ច្រើនប៉ុណ្ណាក៏ដោយ ការគ្រប់គ្រងមិនត្រឹមតែពឹងផ្អែកលើចំណេះដឹងមួយមុខប៉ុណ្ណោះទេ។ ដូចលោកឧត្ដមសេនីយ៍នាវី Grace Grace Murray Hopper បាននិយាយដូច្នេះថា “ សម្រាប់របស់របរ អ្នកអាចគ្រប់គ្រងបាន ប៉ុន្តែសម្រាប់មនុស្ស អ្នកត្រូវដឹកនាំពួកគេ។ ទោះបីជាអ្នករៀនអនុបណ្ឌិត ឬបណ្ឌិតគ្រប់គ្រងក៏ដោយ វាមិនទាន់គ្រប់គ្រាន់ទេ។ អ្នកត្រូវដឹងពីរបៀបគ្រប់គ្រង និងដឹកនាំមនុស្សដោយរបៀបណាទើបធ្វើឲ្យភាពដឹកនាំរបស់អ្នកជះឥទ្ធិពលដល់ភាពជោគជ័យរបស់ពួកគេ៕
ដោយ៖ ខេវិន
ប្រភព៖ entrepreneur
