លីវប៉ី ជាគូរសត្រូវដ៏ខ្លាំងរបស់ ឆាវ ឆាវ ក្នុងរឿងសាមកុក តើលោកអ្នកស្គាល់តួសម្ដែងនេះហើយឬនៅ?
កាលពីអត្ថបទមុន គេហទំព័រ Bizkhmer បាននាំលោកអ្នកអោយស្គាល់រួចមកហើយនូវតួសម្ដែងជាតួអង្គ ឆាវ ឆាវ ក្នុងរឿងសាមកុក (Three Kingdoms) គឺលោក Chen Jian Bin តែនៅពេលនេះ Bizkhmer សុំនាំអារម្មណ៍របស់ប្រិយមិត្តអោយមកស្គាល់គូរសត្រូវដ៏ខ្លាំងរបស់ឆាវ ឆាវ វិញម្តង គឺ លីវប៉ី ឬហៅថា ព្រះបិតុលាលាវ ដែលសម្ដែងដោយលោក Yu He Wei ។
លោក Yu He Wei កើតនៅថ្ងៃទី៤ ខែឧសភា ឆ្នាំ១៩៧១ ប្រទេសចិន។ លោក Yu He Wei បានចូលប្រឡូកក្នុងវិស័យភាពយន្តចាប់តាំងពីឆ្នាំ១៩៩៩ មកម្ល៉េះ។ រហូតមកដល់ពេលនេះ លោក Yu He Wei សម្តែងរឿងចាក់បញ្ចាំងតាមរោងកុននិងរឿងភាពយន្តភាគបានជាង៤០រឿង រួចមកហើយ។
ក្នុងការសម្ដែងរឿងកន្លងមក លោក Yu He Wei ទទួលបានពានរង្វាន់ជាច្រើនដូចជា ពានរង្វាន់ Best Actor, Best TV Actor, Favorite Actor, Best Supporting Actor, Most Valuable Actor ជាដើម។ នៅក្នុងការសម្ដែងរឿងសាមកុក លោក Yu He Wei ទទួលបានពានរង្វាន់ Best Supporting Actor។
នៅក្នុងរឿងសាមកុក លីវប៉ី ត្រូវបានគេចាត់ទុកថាជាមនុស្សគោរពនូវសច្ចធម៌ មានភាពស្មោះត្រង់ចំពោះប្រជារាស្ត្រ។ លីវប៉ី និង ឆាវ ឆាវ តែងតែមានទស្សនៈផ្ទុយពីគ្នា ត្រង់ចំណុចមួយ លីវប៉ី បាននិយាយថា៖ «ខ្ញុំសុខចិត្តអោយមនុស្សក្នុងលោកក្បត់ខ្ញុំ តែខ្ញុំមិនក្បត់មនុស្សក្នុងលោក»។ ចំណែក ឆាវ ឆាវ និយាយថា៖ «ខ្ញុំសុខចិត្តក្បត់មនុស្សក្នុងលោក តែមិនអោយមនុស្សក្នុងលោកក្បត់ខ្ញុំនោះទេ»។
ប្រែសម្រួល៖ សុខា នីកា
ប្រភព៖ chinesemov.com
