គតិបណ្ឌិតចំនួន ៧ឃ្លា របស់ Osho គ្រូចិត្តវិញ្ញាណឥណ្ឌាក្នុងសតវត្សរិ៍ទី២០
ថ្ងៃនេះយើងបានចងក្រងនូវគតិបណ្ឌិតចំនួន ៧ឃ្លា របស់លោក Bhagwan Shree Rajneesh ដែលត្រូវបានគេស្គាល់ថា Osho ជាគ្រូខាងចិត្តវិញ្ញាណមួយរូបរបស់ឥណ្ឌាដែលបានរស់នៅពីឆ្នាំ១៩៣១ដល់ឆ្នាំ១៩៩០:
១) «បើអ្នកស្រឡាញ់ផ្កា ចូរកុំបេះវា។ ព្រោះថាបើអ្នកបេះវា វានឹងស្លាប់ហើយវានឹងលែងក្លាយជាអ្វីដែលអ្នកស្រឡាញ់តទៅទៀតហើយ។ ដូច្នេះហើយបើអ្នកស្រឡាញ់ផ្កា ចូរបណ្ដោយវាចុះ។ ស្រឡាញ់មិនមែនជាការធ្វើជាកម្មសិទ្ធិនោះឡើយ។ ស្រឡាញ់គឺជាការឲ្យតម្លៃ។»
២) «សេចក្ដីទុក្ខសោកផ្ដល់ឲ្យនូវជម្រៅ។ សេចក្ដីសុខផ្ដល់ឲ្យនូវកម្ពស់។ សេចក្ដីទុក្ខសោកផ្ដល់ឲ្យនូវឫស។ សេចក្ដីសុខផ្ដល់ឲ្យនូវមែក។ សេចក្ដីសុខប្រៀបបានទៅនឹងដើមឈើដែលលូតទៅដល់លំហអាកាស រីឯសេចក្ដីទុក្ខសោកប្រៀបបានទៅនឹងឫសដែលចាក់ចូលទៅដល់គភ៌របស់ផែនដី។ ទាំងពីរនេះសុទ្ធតែចាំបាច់ ហើយបើកាលណាដើមឈើលូតកាន់តែខ្ពស់ ក្នុងពេលជាមួយគ្នានេះវាក៏ចាក់ចូលទៅកាន់តែជ្រៅដែរ។ បើកាលណាដើមឈើកាន់តែធំ ឫសរបស់វាក៏នឹងកាន់តែធំដែរ។ តាមពិតទៅ វាតែងតែមានភាពសមាមាត្រនឹងគ្នា។ នេះគឺជាតុល្យភាពរបស់វា។»
៣) «ភាពចាស់ទុំគឺជាការទទួលស្គាល់ការទទួលខុសត្រូវទៅលើការធ្វើជាខ្លួនឯង មិនថាការលះបង់ជាអ្វីក៏ដោយ។ ប្រថុយនឹងអ្វីៗគ្រប់យ៉ាងដើម្បីធ្វើជាខ្លួនឯង នេះហើយគឺជាភាពចាស់ទុំ។»
៤) «ការពិតមិនមែនជាអ្វីដែលស្ថិតនៅខាងក្រៅដើម្បីស្វែងរកឡើយ វាគឺជាអ្វីដែលស្ថិតនៅខាងក្នុងដើម្បីដឹង។»
៥) «គ្មាននរណាម្នាក់អាចនិយាយអ្វីអំពីអ្នកបានឡើយ។ អ្វីក៏ដោយដែលមនុស្សនិយាយគឺអំពីពួកគេ។ ប៉ុន្តែអ្នកក្លាយជារង្គោះរង្គើ ពីព្រោះតែអ្នកនៅតែតោងជាប់ទៅនឹងចំណុចកណ្ដាលដែលខុស។ ចំណុចកណ្ដាលដែលខុសនេះអាស្រ័យនៅលើអ្នកដទៃ ដូច្នេះហើយទើបអ្នកតែងតែសម្លឹងមើលអ្វីដែលអ្នកដទៃនិយាយអំពីអ្នក។ ហើយអ្នកនៅតែដើរតាមពួកគេ អ្នកតែងតែព្យាយាមធ្វើឲ្យពួកគេរីករាយ។ អ្នកតែងតែព្យាយាមធ្វើជាមនុស្សគួរឲ្យគោរពម្នាក់ អ្នកតែងតែព្យាយាមលម្អអត្តារបស់អ្នក។ វានឹងធ្វើឲ្យអ្នកសម្លាប់ខ្លួនឯង។ ជាជាងរង្គោះរង្គើដោយអ្វីដែលអ្នកដទៃនិយាយ អ្នកគួរតែចាប់ផ្ដើមសម្លឹងមើលខាងក្នុងខ្លួនឯង។»
៦) «ភាពវៃឆ្លាតគឺជារឿងគ្រោះថ្នាក់។ ភាពវៃឆ្លាតមានន័យថាអ្នកនឹងចាប់ផ្ដើមគិតដោយខ្លួនឯង។ អ្នកនឹងចាប់ផ្ដើមស្វែងរកដោយខ្លួនឯង។ អ្នកមិនជឿលើគម្ពីរ អ្នកនឹងជឿតែទៅលើបទពិសោធន៍របស់ខ្លួនឯងប៉ុណ្ណោះ។»
៧) «គំនិតទាំងអស់របស់អ្នកអំពីខ្លួនឯងគឺត្រូវបានខ្ចីមក ខ្ចីពីមនុស្សដែលមិនដឹងសូម្បីតែខ្លួនឯងជានរណាផង។»
អត្ថបទទាក់ទង៖ សម្ដីដកស្រង់ចំនួន១០ឃ្លាពី Sadhguru បុគ្គលដែលប្រកបដោយគតិបណ្ឌិតមួយរូប
ដោយ៖ ស្រីពៅ
