គួរប្រុងប្រយ័ត្ន! អ្នកជំនាញប្រាប់ថាទូរស័ព្ទដៃជាប្រភពចម្លងសំខាន់នៃមេរោគ
នៅពេលកូវីដ១៩ នៅតែបន្តជះឥទ្ធិពលដល់ពិភពលោកទៀតនោះ ប្រជាជនកំពុងបង្កើនការអនុវត្តអនាម័យផ្ទាល់ខ្លួនដូចជា លាងដៃឲ្យបានច្រើន និងពាក់ម៉ាសមុខជាដើម។ ប៉ុន្តែអ្វីដែលជារឿយៗអ្នកមិនបានយកចិត្តទុកដាក់នឹងវានោះគឺ ការរក្សាអនាម័យទូរស័ព្ទដៃរបស់អ្នក។
ទូរស័ព្ទ គឺជាវត្ថុសំខាន់មួយដែលមិនអាចចៀសផុតបាននៅក្នុងជីវិតរបស់យើង យើងត្រូវប្រើវាជាប្រចាំ ហើយជាធម្មតាអ្នកបានប្រើប្រាស់វាដូចជា មើលព័ត៌មានថ្មីៗ ឆ្លើយឆ្លងជាមួយក្រុមគ្រួសារ ឬក៏លេងហ្គេមម្តងម្កាល។ បន្ទាប់មកអ្នកអាចនឹងដាក់ដើម្បីបញ្ចូលថ្មនៅកន្លែងណាមួយមានដែលអ្នកមិនដឹងថាទីនោះមានមេរោគអ្វីខ្លះនៅតោងជាប់ ដូច្នេះហើយវាជាប្រភពចម្លងមេរោគមួយយ៉ាងសំខាន់ដល់អ្នក។
យោងតាមអ្នកវិទ្យាសាស្រ្តនៅសាលកវិទ្យាល័យអារីហ្សូណា (The University Of Arizona) ទូរស័ព្ទរបស់អ្នកមួយមានបាក់តេរីរហូតដល់ទៅ ១០ដង ច្រើនជាងកៅអីបង្គន់ទៅទៀត។ ការសិក្សាដាច់ដោយឡែកមួយទៀត ដោយអ្នកស្រាវជ្រាវនៅចក្រភពអង់គ្លេសបានរកឃើញថាដៃ និងទូរស័ព្ទរបស់អ្នករួមបញ្ចូលគ្នាមានបាក់តេរីជាង ១៦ភាគរយចម្លង និងបង្កឲ្យកើតជាបញ្ហាផ្សេងៗ។
ការសិក្សារបស់អ្នកស្រាវជ្រាវនៅសាកលវិទ្យាល័យហុងកុងបានបង្ហាញថា វីរុសកូវីដ ១៩ នេះអាចតោងជាប់នៅលើផ្ទៃកញ្ចក់រយៈពេលពីរថ្ងៃ និងនៅលើដែកអ៊ីណុក និងប្លាស្ទិចក្នុងរយៈពេលពី ៤ ទៅ ៧ ថ្ងៃ។
ឧបករណ៍សម្រាប់សម្អាប់មេរោគដោយប្រើពន្លឺកាំរស្មី រូបភាពដោយ៖ Huffpost
ស្មាតហ្វូនទំនើបៗជាទូទៅមានភាពធន់នឹងទឹកដែលមានន័យថាការសម្អាតម្តងម្កាលជាមួយសាប៊ូ និងទឹកមិនមែនជាបញ្ហាទេ។ ជាការពិតអ្នកប្រហែលជាមិនចង់បានការលាងសម្អាតវាច្រើនដងក្នុងមួយថ្ងៃទេ ដូច្នេះការប្រើប្រាស់ជាតិអាល់កុលកម្រិត ៧០ ភាគរយអាចមានប្រយោជន៍សម្រាប់អ្នកដើម្បីលាងសម្អាតទូរស័ព្ទបាន។ ប៉ុន្តែប្រសិនបើអ្នកមិនចង់ប្រើគ្រឿងស្រវឹង (ស្រាបៀរ ឬអាល់កុល) ឬទឹកនោះទេ អ្នកអាចប្រើឧបករណ៍សម្លាប់រោគ (ដែលអ្នកមើលមិនឃើញដោយភ្នែកទទេ) ដោយពន្លឺអ៊ុលត្រា UV ក្នុងរយៈពេលប្រហែលពី ៥ ទៅ ១៥នាទី អាស្រ័យលើកត្តាដូចជាកម្លាំងនៃប្រភពកាំរស្មី UV។
ជារួមអាចប្រើប្រាស់បានច្រើនវិធីសម្រាប់សម្អាតទូរស័ព្ទ ដូចជាទឹកអាល់កុល ៧០ភាគរយ សាប៊ូនិងទឹក ពន្លឺអ៊ុលត្រា UV ។ល។
ប្រភព៖ South China Morning Post
ដោយ៖ Anthony
