កម្ពុជា៖ ចំនួនអ្នកធ្វើតេស្តរកកូវីដសរុប ៨៩០៩នាក់នៅទូទាំងប្រទេស
ក្នុងសន្និសីទសារព័ត៌មានរបស់ក្រសួងសុខាភិបាលនាព្រឹកថ្ងៃទី១៣ ខែមេសា នេះ បានឱ្យដឹងថា នៅទូទាំងប្រទេសមានករណីធ្វើតេស្តវិភាគវត្ថុសំណាកសរុបប្រមាណ ៨៩០៩ ហើយបើគិតជាមធ្យមគឺក្នុងប្រជាជន ១លាននាក់ មាន ៥៥៦សំណាកដែលត្រូវធ្វើវិភាគបើគិតមកដល់ថ្ងៃទី ១៣ ខែមេសា នេះ។
បើតាមការអះអាងរបស់លោកជំទាវ ឱ វណ្ណឌីន ក្នុងចំណោមអ្នកធ្វើតេស្តទាំងអស់ មានប្រហែល ៩០%ជាជនជាតិខ្មែរ ហើយគ្រាន់តែថ្ងៃទី ១២ ខែមេសា មានការធ្វើតេស្តសរុបជិត ២០០នាក់គ្រាន់តែមួយថ្ងៃម្សិលមិញក្នុងនោះក៏មានជនជាតិបរទេសមួយចំនួនផងដែរ។ ចំនួន ៨៩០៩នាក់នេះ គឺរាប់បញ្ចូលទាំងចំនួននៃការធ្វើតេស្តកប៉ាល់ វេស្ទើដាំ ផង។
បើយោងតាមសេចក្ដីរបស់ ក្រសួងសុខាភិបាល ចំនួននៃការធ្វើតេស្តវត្ថុសំណាក់ បើគិតក្នុងចំណោមមនុស្ស ១លាននាក់ កម្ពុជាមានអត្រាខ្ពស់ជាងបណ្ដាប្រទេសមួយចំនួនផងដូចជា ភូមា មានតែ ២៦សំណាក/១លាននាក់ ឡាវ ១៥៧សំណាក/១លាននាក់ ឥណ្ណូណេស៊ី ៧១សំណាក់/១លាននាក់ និងហ្វីលីពីនមាន ៣០៩សំណាក់/១លាននាក់។
ជាមួយគ្នាដែរ លោក វេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា បានអះអាងថា មកដល់ពេលនេះ កម្ពុជាមានវេជ្ជបណ្ឌិតជំនាញសម្រាប់ព្យាបាលកូវីដ១៩ មានសរុប ៦៧០នាក់ ហើយក្រសួងកំពុងតែបណ្ដុះបណ្ដាលបន្តទៀត។ ដោយឡែក សម្រាប់ម៉ាស៊ីនជំនួយការដកដង្ហើម (ventilator) ត្រូវបានត្រៀមទុករួចជាស្រេច ប្រមាណជិត ២០០គ្រឿង។ សូមបញ្ជាក់ថា ម៉ាស៊ីននេះគឺប្រើសម្រាប់តែអ្នកជំងឺដែលមានបញ្ហាប៉ះពាល់ដល់សួតធ្ងន់ធ្ងរប៉ុណ្ណោះ។ បើតាមការបញ្ជាក់របស់ឯកឧត្តម រដ្ឋមន្ត្រី មានអ្នកជំងឺប្រមាណ ១% ទៅ ២% ប៉ុណ្ណោះដែលត្រូវការ ម៉ាស៊ីនជំនួយការដកដង្ហើមនេះ៕
ដោយ៖ រតនៈវិភូ
