ក្រសួង៖ ត្រូវប្រយ័ត្នឲ្យបានខ្ពស់ យើងមានលក្ខណៈផុយស្រួយណាស់
ប្រសិនបើបងប្អូនប្រជាជនពលរដ្ឋរបស់យើង មិនអនុវត្តន៍ទៅតាមការណែនាំ ឬសេចក្ដីណែនាំផ្សេងៗ របស់រាជរដ្ឋាភិបាលកម្ពុជាទេនោះ កម្ពុជាអាចនឹងឈានចូលដំណាក់កាល ការវាយលុកនៃវីរុសកូវីដ១៩ ឬការចម្លងចូលទៅក្នុងសហគមន៍របស់យើងហើយ។ យើងមានលក្ខណៈផុយស្រួយណាស់ ដោយសារតែយើងឃើញមានករណីឆ្លងនាំចូល ចម្លងទៅអ្នកក្នុងស្រុក និងចម្លងបន្តទៅអ្នកប៉ះពាល់ដោយផ្ទាល់។ នេះបើយោងតាមការបញ្ជាក់ពី លោកស្រីវេជ្ជបណ្ឌិត ឱ វណ្ណឌីន។
ថ្លែងក្នុងសន្និសិទសារព័ត៌មានរបស់ក្រសួងសុខាភិបាលស្តីពី បច្ចុប្បន្នភាពកូវីដ ១៩ នាព្រឹកថ្ងៃទី ១៣ ខែមេសា ឆ្នាំ២០២០ នេះ លោកស្រីវេជ្ជបណ្ឌិត ឱ វណ្ណឌីន បានមានប្រសាសន៍ថា គិតមកទល់ពេលនេះ កម្ពុជាបានរកឃើញករណីចម្លងខ្នាតតូចមួយដែលមានលក្ខណៈជា អ្នកដែលបានឆ្លងជាករណីនាំចូល បានចម្លងបន្តទៅអ្នកនៅក្នុងស្រុក ឬប៉ះពាល់ផ្ទាល់ ហើយអ្នកប៉ះពាល់ផ្ទាល់នោះក៏បានចម្លងបន្តទៅអ្នកប៉ះពាល់បន្ថែមទៀត ដែលស្ថិតនៅក្នុងកម្រិតមួយតូចនៅឡើយ។
លោកស្រីបញ្ជាក់ដូច្នេះថា ៖«កន្លងមកយើងឃើញថា មានករណីនាំចូលដែលភាគច្រើនជាជនបរទេស ហើយថ្មីៗនេះក៏មានឆ្លងករណីនាំចូលពីក្រៅប្រទេសមក មកអ្នកក្នុងស្រុក ហើយអ្នកក្នុងស្រុកក៏ឆ្លងទៅម្នាក់ទៀតហើយ...ដោយសារវាគន្លាក់អីចឹង។ អីចឹងកន្លែងនេះវាផុយស្រួយណាស់ ប្រសិនបើការចម្លងនេះចេះតែរាតត្បាតបន្តទៅ ហើយយើងមិនមានលទ្ធភាពក្នុងការស្រាវជ្រាវរកប្រភពឱ្យបានច្បាស់លាស់ ហ្នុងគឺជាការចម្លងនៅក្នុងសហគមន៍ហើយ»។
ក្នុងលក្ខខណ្ឌបែបនេះ យើងត្រូវមានការប្រុងប្រយ័ត្នឲ្យបានខ្ពស់ ការចម្លងពីមនុស្សម្នាក់ទៅមនុស្សម្នាក់ មានហានិភ័យខ្ពស់។ ជាមួយគ្នានេះដែរ តាមវិធានការនៃការការពាររបស់រដ្ឋាភិបាល សង្កត់ធ្ងន់ទៅលើពេលបុណ្យចូលឆ្នាំថ្មីប្រពៃណីជាតិខ្មែរនេះ ប្រសិនបើមិនមានការប្រុងប្រយ័ត្នឲ្យបានខ្ពស់ទេ កម្ពុជានឹងប្រឈមខ្ពស់នឹងហានិភ័យនៃការឆ្លងរាលដាលធ្ងន់ធ្ងរ និងទ្រង់ទ្រាយធំ លោកស្រីបញ្ជាក់។
លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល ក៏បានមានប្រសាសន៍ផងដែរថា ការប្រុងប្រយ័ត្នក្នុងអំឡុងពេលបុណ្យចូលឆ្នាំថ្មីប្រពៃណីជាតិខ្មែរនេះ គឺសំខាន់ណាស់ ព្រោះបើសិនជាមានករណីឆ្លងកម្រិតធ្ងន់ពិតមែន កម្ពុជាប្រឈមនឹងការបាត់បង់ជីវិតដោយសារករណីកូវីដ ១៩ នេះយ៉ាងពិតប្រាកដ៕
ដោយ៖ យ៉ាយ៉ា
