កម្ពុជាមានពីរករណីថ្មីថ្ងៃនេះ៖ស្ត្រីអ្នកទេសចរជនជាតិវៀតណាម និងស្វាមីជនជាតិកាណាដា
យោងតាមសេចក្ដីប្រកាសព័ត៌មានរបស់ក្រសួងសុខាភិបាលថ្ងៃទី១២ មេសា នេះបានឱ្យដឹងថា មានករណីវិជ្ជមានវីរុសកូវីដ១៩ ថ្មី ២ករណីទៀតទៅលើស្ត្រីជនជាតិវៀតណាម និងបុរសជាស្វាមី។
ស្ត្រីជនជាតិវៀតណាមខាងលើជាអ្នកទេសចរ អាយុ ២៤ឆ្នាំ ស្នាក់នៅក្នុងបន្ទប់ Apartment នៅផ្លូវលេខ ៣០២ សង្កាត់បឹងកេងកង១ រាជធានីភ្នំពេញ និងបុរសជនជាតិកាណាដា (ដើមកំណើតចិន) ជាស្វាមីអាយុ ៥០ឆ្នាំបម្រើការងារនៅកាស៊ីណូក្នុងរាជធានីភ្នំពេញ មានលទ្ធផលតេស្ដវិជ្ជមានវីរុសកូវីដ១៩ ដែរដែលបច្ចុប្បន្នអ្នកទាំងពីរកំពុងសម្រាកព្យាបាលនៅមណ្ឌលសុខភាពចាក់អង្រែក្រោម។
ដោយឡែក ងាមកមើលចំនួនអ្នកជាសះស្បើយវិញ យើងឃើញថា មាន ០២ករណីទៀត គិតត្រឹមថ្ងៃទី១២ ខែមេសា នេះគឺជនជាតិម៉ាឡេស៊ីទាំងពីរនាក់ ដែលម្នាក់អាយុ ៣៤ឆ្នាំ និងម្នាក់ទៀតអាយុ ៥៨ឆ្នាំនៅស្រុក កងមាស ខេត្តកំពង់ចាម។
កម្ពុជាមានករណីវិជ្ជមានសរុប ១២២ទូទាំងប្រទេស ព្យាបាលជាសះស្បើយ ៧៧នាក់ ស្មើនឹងអត្រា ៦៣,១១%៕
