Hot News៖ ស្ត្រីជនជាតិអាមេរិក ចេញពីកប៉ាល់ចតនៅកម្ពុជារកឃើញឆ្លងវីរុស Covid-19
សារព័ត៌មាន The Channel News Asia បានចេញផ្សាយប៉ុន្មាននាទីមុនថា ស្ត្រីជនជាតិអាមេរិកដែលធ្វើដំណើរជាមួយនឹងអ្នកដំណើរនៅលើកប៉ាល់ Westerdam ដែលបានចុះចតនៅកម្ពុជាកាលពីថ្ងៃព្រហស្បតិ៍ និងបានហោះហើរបន្តដំណើរចេញពីកម្ពុជាទៅទីក្រុងកូឡាឡំពូជាមួយអ្នកដំណើរប្រមាណ ១៤៥នាក់ទៀត ត្រូវបានពេទ្យម៉ាឡេស៊ីពិនិត្យ និងរកឃើញថា មានផ្ទុកវីរុស Covid-19 នៅប៉ុន្មានម៉ោង នាថ្ងៃសៅរ៍ ទី១៥ កុម្ភៈនេះ។
ក្រសួងសុខាភិបាលនៃប្រទេសម៉ាឡេស៊ី បានប្រកាសថា អ្នកជំងឺជាជនជាតិអាមេរិកមានអាយុ ៨៣ឆ្នាំ ស្ថិតនៅក្នុងចំណោមអ្នកដំណើរ និងបុគ្គលិកកប៉ាល់ទេសចរជាង ២២០០នាក់ដែលបានចុះចតនៅកម្ពុជាកាលពីថ្ងៃព្រហស្បតិ៍ កន្លងទៅ។
តាមសេចក្ដីរាយការណ៍ពីប្រភពព័ត៌មានដដែលបានឱ្យដឹងទៀតថា ក្នុងចំណោមអ្នកដំណើរប្រមាណ ១៤៥នាក់ដែលបានហោះទៅកាន់ប្រទេសម៉ាឡេស៊ី គឺស្ត្រីវ័យ ៨៣ឆ្នាំ និងប្ដីរបស់គាត់ត្រូវបានគេរកឃើញថា មានផ្ទុកនូវរោគសញ្ញាគួរឱ្យសង្ស័យមួយចំនួននៅពេលដល់អាកាសយានដ្ឋានអន្តរជាតិកូឡាឡាំពួរ ហើយក្រោយមកអាជ្ញាធរក៏បានបញ្ជូនពួកគាត់ទៅកាន់មន្ទីរពេទ្យ Sungai Buloh ដើម្បីធ្វើការពិនិត្យបន្ថែម។
អ្វីដែលគួរឱ្យភ្ញាក់ផ្អើលបំផុតនោះគឺថា ស្ត្រីខាងលើត្រូវបានពិនិត្យឃើញថា វិជ្ជមាន ខណៈស្វាមីរបស់គាត់ដែលមានអាយុ ៨៥ឆ្នាំអវិជ្ជមានទៅវិញ។ ទោះជាយ៉ាងណា ទាំងអ្នកជំងឺ និងស្វាមីរបស់គាត់ត្រូវបានពិនិត្យ និងតាមដានយ៉ាងយកចិត្តទុកដាក់នៅមន្ទីរពេទ្យនោះទាំងពីរនាក់។ នេះបើតាមការថ្លែងរបស់លោកវេជ្ជបណ្ឌិត Noor Hisham អគ្គលេខាធិការនៃក្រសួងសុខាភិបាលម៉ាឡេស៊ី៕
