នាវាទេសចរណ៍ Westerdam នឹងសំចតនៅកំពង់ផែខេត្តព្រះសីហនុរហូតដល់ថ្ងៃទី១៧ ខែកុម្ភៈ
រាជរដ្ឋាភិបាលកម្ពុជា បានអនុញ្ញាតឲ្យនាវាទេសចរណ៍ Westerdam របស់សហរដ្ឋអាមេរិក ដែលមានផ្ទុកភ្ញៀវទេសចរណ៍ប្រមាណជាង២២០០នាក់ ចូលសំចតនៅកំពង់ផែ ខេត្តព្រះសីហនុ នាថ្ងៃទី១៣ កុម្ភៈ ឆ្នាំ២០២០។ ការសំចតរបស់នាវាទេសចរណ៍មួយនេះ ត្រូវបានឯកឧត្ដមទេសរដ្ឋមន្ត្រី ស៊ុន ចាន់ថុល បញ្ជាក់ថាកំពុងចតនៅចម្ងាយប្រមាណ ២គីឡូម៉ែត្រ ពីកំពង់ផែ ពោលគឺកំពុងរក្សាទុកនៅតំបន់សុវត្ថិភាពមួយដើម្បីតាមដានពីស្ថានភាព និងធានាសុវត្ថិភាពជូនប្រជាពលរដ្ឋកម្ពុជា។
ក្នុងកិច្ចសម្ភាសន៍ជាមួយក្រុមការងារ Freshnews ឯកឧត្ដម គួច ចម្រើន អភិបាលខេត្តព្រះសីហនុ បានឲ្យដឹងថា មេបញ្ជាការនាវាទេសចរណ៍ Westerdam បានស្នើសំចតនៅកំពង់ផែក្រុងព្រះសីហនុ រហូតដល់ថ្ងៃទី១៧កុម្ភៈ ហើយចំពោះអ្នកទេសចរណ៍ទាំងនោះនិងត្រូវរៀបចំឲ្យត្រឡប់ទៅកាន់ប្រទេសរបស់ពួកគេវិញ។ ជាមួយគ្នានេះឯកឧត្ដម ទេសរដ្ឋមន្ត្រី ស៊ុន ចាន់ថុល បានបញ្ជាក់ផងដែរថា នៅថ្ងៃទី១៤កុម្ភៈ និងមានត្រៀមជើងហោះហើរចំនួន៤ជើង ដើម្បីដឹកពួកគាត់មួយចំនួនពីព្រលានយន្តហោះកងកេង ទៅកាន់អាកាសយានដ្ឋានអន្តរជាតិភ្នំពេញ ហើយសម្រាប់អ្នកដែលពុំទាន់មានសំបុត្រយន្តហោះបន្តជើង និងមិនអនុញ្ញាតឲ្យចេញពីនាវាឡើយ។
តាមប្រសាសន៍ របស់លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល បានឲ្យដឹងថានាវាទេសចរណ៍នេះ បានធ្វើដំណើរចេញពីទីក្រុងហុងកុងតាំងពីថ្ងៃទី ១កុម្ភៈមកម្លេះ ដែលគិតមកដល់ពេលនេះគឺមានរយៈពេល១៣ថ្ងៃហើយ ទន្ទឹមនឹងជំងឺដែលបង្កដោយវីរុសកូរ៉ូណាថ្មីប្រើរយៈពេល១៤ដើម្បីលេចចេញនូវអាការៈ ដូច្នេះនៅថ្ងៃទី១៤កុម្ភៈស្អែកនេះ មន្ត្រីនិងក្រុមអ្នកជំនាញនឹងរងចាំមើលពីអាការៈបន្តរបស់អ្នកដំណើរនៅក្នុងនាវា Westerdam ជាបន្តដោយសង្ឃឹមថានិងមិនមានអ្នកផ្ទុកវីរុសកូរ៉ូណាថ្មី។
គួរបញ្ជាក់ផងដែរថា អ្នកទេសចរណ៍ប្រមាណ២០នាក់នៅលើនាវាដែលមានបញ្ហាសុខភាព ត្រូវបានក្រុមគ្រូពេទ្យជំនាញរបស់កម្ពុជាបញ្ជូនសំណាកទៅកាន់វិទ្យាស្ថានប៉ាស្ទ័រ ដើម្បីធ្វើតេស្តរកវីរ៉ុសកូរ៉ូណាប្រភេទថ្មី៕
ដោយ៖ ជួប ស្រីរ័ត្ន
២គីឡូ
