យោងតាមហ្វេសបុកផេកផ្លូវការរបស់ក្រុមហ៊ុន Holland America Line​ បាន​ប្រកាសថា​ថ្ងៃ​ទី​១២ ខែកុម្ភៈ ​កាលពីម្សិលមិញ​ថា អំពីភាពរីករាយ​ប្រាប់ដល់ពិភពលោកនិងអរគុណកម្ពុជា ​ដោយអនុញ្ញាតឲ្យកប៉ាល់ដឹកអ្នកដំណើររដែលមានភ្ញៀវ ១ ៤៥៥នាក់ និងអ្នកធ្វើការលើនោះចំនួន ៨០២ នាក់ ចូលសំចតនៅកំពង់ផែ ខេត្តព្រះសីហនុ បន្ទាប់ពីប្រទេសចំនួន៥បានបដិសេធមិនឲ្យចូលចតក្នុងកំពង់ផែរបស់ខ្លួន ដោយសារហេតុផលការផ្ទុកវីរុសកូរ៉ូណា។

ដូច​ផែនការ​ដែល​បាន​គ្រោង​ទុកកប៉ាល់​ Westerdam ​មកដល់កម្ពុជានៅម៉ោងប្រមាណជាង ៧៖០០ នាទីព្រឹកម៉ោងក្នុងស្រុក នៅថ្ងៃព្រហស្បតិ៍ ទី១៣ ខែកុម្ភៈ ​នេះ ​ហើយ​កប៉ាល់​ដឹកអ្នកដំណើរ​នឹង​ចូលសំចត​នៅ​កំពង់ផែ​កម្ពុជា​​រយៈពេល​​​ច្រើន​ថ្ងៃសិន។

​​​​​តាម​ការ​ប្រកាស​នៅ​ទំព័រ​ហ្វេសប៊ុក​ផ្លូវ​ការ​របស់​ខ្លួន​ដដែល​បាន​ឱ្យ​ដឹង​ទៀត​ថា​ ភ្ញៀវដែលនៅលើកប៉ាល់នោះ​នឹង​ស្នាក់​នៅ​ក្រុងព្រះសីហនុ​ ហើយ​នឹង​​បន្ត​ធ្វើ​ដំណើរ​​​តាម​យន្តហោះ​មក​អាកាសយានដ្ឋាន​ភ្នំពេញ​ដើម្បី​បន្ត​ជើងហោះហើរ​ទៅ​កាន់​ប្រទេស​កំណើត​រៀង​ៗ​ខ្លួន។​

​ក្រុមហ៊ុនកប៉ាល់ទេសចរណ៍ Holland America Line នឹងរៀបចំការចំណាយជើងហោះហើរទាំងអស់​​ដល់​ភ្ញៀវទាំងអស់​ បន្ថែមពីលើការសងប្រាក់​ពេញលេញនិង​ការ​ផ្ដល់​ជូន​នូវ​កញ្ចប់​ឥណទាន​ធ្វើ​ដំណើរកម្សាន្តនាពេលអនាគត ១០០% ដែល​ក្រុម​ហ៊ុន​បាន​ចាត់​ចែង​និង​រៀបចំ​រួច​រាល់ហើយ។

តាម​ការ​អះអាង​ពី​ក្រុមហ៊ុន​​ដែល​មាន​មូលដ្ឋាន​នៅ​សហរដ្ឋ​អាមេរិក​មួយ​នេះ​ ​ភ្ញៀវទាំងអស់នៅលើនាវាដឹកអ្នកដំណើរនោះគឺមានសុខភាពល្អហើយ បើទោះបីជាមានការសង្ស័យថាមានករណី​ផ្ទុកវីរុសកូរ៉ូណានោះក៏ដោយ​។

អាជ្ញាធរកម្ពុជានឹងសម្របសម្រួលគ្រប់និតីវិធីទាំងអស់ ទាំងការត្រួតពិនិត្យសុខភាពនៅលើកប៉ាល់, មិនយកថ្លៃ Visa និងសេវាផ្សេងៗ ដែលទាំងនេះបង្ហាញទឹកចិត្ត ​ចំពោះផ្នែកកិច្ចការមនុស្សធម៌ និងគ្មានការរើសអើងពូជសាសន៍ប្រទេសដទៃ។ 

​ជុំវិញ​បញ្ហា​នេះ​ដែរ​ ​លោក W. Patrick Murphy អគ្គរដ្ឋទូតសហរដ្ឋអាមេរិកប្រចាំនៅកម្ពុជា បានបង្ហោះសារ​តាមបណ្តាញសង្គម Twitter ​និង​បាន​ថ្លែង​អំណរគុណ​ និង​ការ​កោតសរសើរ​ចំពោះទឹកចិត្តរាជរដ្ឋាភិបាលកម្ពុជា ដែលបានអនុញ្ញាតជួយឱ្យកប៉ាល់ខ្នាតយក្ស Westerdam ​​វិលវល់​ចូលចតនៅកំពង់ផែ ខេត្តព្រះសីហនុ ។

លោកអគ្គរដ្ឋទូត បានបញ្ជាក់ថា ភ្ញៀវនៅលើកប៉ាល់នោះក៏មានពលរដ្ឋអាមេរិកជាច្រើននាក់ផងដែរ។ ហើយតាមសេចក្តីរាយការណ៍កប៉ាល់បានឲ្យដឹងថា មិនមាននរណាម្នាក់ផ្ទុកមេរោគកូរ៉ូណាថ្មីនោះទេ ដែលត្រូវបានត្រួតពិនិត្យ និងធ្វើតេស្តដោយគ្រូពេទ្យនៅលើកប៉ាល់នេះតែម្តង។​ ក្នុង​ករណី​មាន​ការ​សង្ស័យ​ណា​មួយ​ អាជ្ញាធរ​នឹង​បញ្ចូល​មក​កាន់​វិទ្យាស្ថាន​ប៉ាស្ទ័រ​ដើម្បី​ធ្វើ​រោគវិនិច្ឆ័យ​បន្ត៕ ​

អត្ថបទ: Anthony
ប្រភព: Facebook Page Holland America Line, Business Insider