សម្ដីដ៏មានតម្លៃមហាសាលចំនួន ៧ឃ្លា ពីរឿងអាណាចក្រទាំង៣ «សាមកុក» ដែលអ្នកគួរអាន
«ប្រលោមលោកនៃអាណាចក្រទាំង៣» ឬដែលម្យ៉ាងទៀតមនុស្សភាគច្រើនស្គាល់ថា «សាមកុក» គឺជាប្រលោមលោកប្រវត្តិសាស្ត្រនៅក្នុងសតវត្សទី១៤របស់អ្នកនិពន្ធ Luo Guanzhong។ វាឆ្លុះបញ្ចាំងពីសាច់រឿងនៅអំឡុងពេលប្រទេសជាតិកំពុងចលាចលដែលបានកើតឡើងកៀកនឹងពេលនៃការដួលរលំនៃចុងរាជវង្សហាន់និងការចាប់ផ្ដើមនៃអាណាចក្រទាំង៣នៅក្នុងប្រវត្តិសាស្ត្ររបស់ចិន។ សាច់រឿងនេះមានផ្នែកខ្លះជាប្រវត្តិសាស្ត្រ ផ្នែកខ្លះជារឿងព្រេង និងផ្នែកខ្លះជាទេវកថា ដែលនិយាយអំពីស្ដេចនិងអ្នកនៅក្រោមបង្គាប់ដែលបានព្យាយាមជំនួសរាជវង្សដែលកំពុងដួលរលំនេះទៅរាជវង្សថ្មីឬស្ដាររាជវង្សហាន់ឡើងវិញ។
បើទោះជារឿងនេះមានតួអង្គរាប់រយនាក់ក៏ដោយ ចំណុចសំខាន់នៃរឿងនេះផ្ដោតទៅលើអំណាចខ្លាំងៗទាំង៣ដែលបានងើបឡើងពីការសេសសល់ពីរាជវង្សហាន់ ហើយចុងក្រោយក៏បានក្លាយជារដ្ឋទាំង៣ដែលត្រូវបានគេស្គាល់ថា Wei Han និង Wu។ រឿងអាណាចក្រទាំង៣នេះត្រូវបានគេរាប់ចូលជារឿងប្រលោមលោកបុរាណមួយក្នុងចំណោមរឿងប្រលោមលោកបុរាណដ៏អស្ចារ្យបំផុតទាំង៤របស់អក្សរសាស្ត្រចិន។ ថ្ងៃនេះយើងបានចងក្រងនូវសម្ដីចំនួន៧ឃ្លាពីរឿងអាណាចក្រទាំង៣ដូចខាងក្រោមនេះ៖
១) «ការប្រយុទ្ធមិនមែនឈ្នះដោយកម្លាំងតែម្យ៉ាងនោះទេ។» ជូកឺលាំង
២) «មិនមានអាវុធណាមួយដែលអស្ចារ្យជាងចិត្តដែលបានត្រៀមខ្លួនរួចជាស្រេចនោះឡើយ។» ជូកឺលាំង
៣) «សិល្បៈដ៏កំពូលនៃសង្គ្រាមគឺជាការបង្ក្រាបសត្រូវដោយមិនចាំបាច់ច្បាំង។» ស៊ុនជឺ
៤) «មនុស្សដែលបានទទួលជ័យជម្នះគឺជាមនុស្សដែលបានរៀបចំផែនការយ៉ាងមានប្រសិទ្ធភាពនិងធ្វើការសម្រេចចិត្តដោយមិនរារែក។ ពួកគេប្រៀបបាននឹងស្ទឹងដ៏ធំអស្ចារ្យមួយដែលរក្សាតាមធម្មជាតិរបស់វា តែសម្របបត់បែនចរន្តហូររបស់វា។» ស៊ុនជឺ
៥) «ពិភពលោកនៅក្រោមមេឃ ក្រោយពីការបែកបាក់អស់រយៈកាលយូរមក ច្រើនតែជួបជុំគ្នាវិញ។ ក្រោយពីការជួបជុំគ្នាអស់រយៈកាលយូរមក ច្រើនតែបែកបាក់គ្នាទៀត។ វាគឺបែបនេះតាំងពីពេលអតីតកាលមកម្ល៉េះ។» Luo Guanzhong
៦) «ភាពជោគជ័យគ្មានអ្វីគួរឲ្យរីករាយទៅលើ ឯភាពបរាជ័យក៏គ្មានអ្វីគួរឲ្យសោកសៅទៅលើនោះដែរ។» Luo Guanzhong
៧) «នាគក្នុងទឹកថ្លុកគឺជាល្បែងរបស់បង្គា បក្សីទេពក្នុងទ្រុងត្រូវបានចាបសើចចំអក។» Luo Guanzhong
ដោយ៖ ស្រីពៅ
