កម្រងសម្ដីចំនួន៨ ដែលអាចផ្លាស់ប្ដូរទស្សនរបស់អ្នកអំពីជីវិត
ថ្ងៃនេះយើងមានអត្ថបទមួយដែលចង់ចែករំលែកជាមួយអ្នកនូវកម្រងសម្ដីចំនួន៨ ដែលអាចផ្លាស់ប្ដូរទស្សនរបស់អ្នកអំពីជីវិតនិងអាចជួយអ្នកដោះស្រាយបញ្ហាជីវិតបាន:
១) «នៅពេលការស្រឡាញ់និងការស្អប់សុទ្ធតែមិនមានវត្តមាន អ្វីៗគ្រប់យ៉ាងនឹងក្លាយជាជ្រះស្រឡះនិងមិនអាចបំភ័ន្តបាន។ បើអ្នកមានការបែងចែកឲ្យមានភាពខុសគ្នាតែបន្តិច នោះមេឃនិងដីនឹងត្រូវបានបែងចែកឲ្យនៅដាច់ពីគ្នាដោយឥតមានដែនកំណត់។ បើអ្នកចង់ឃើញការពិត ដូច្នេះចូរកុំមានទស្សនយល់ស្របឬប្រឆាំងនឹងអ្វីមួយ។ ការមានទស្សនអ្វីមួយដែលអ្នកចូលចិត្តដើម្បីប្រឆាំងនឹងអ្វីមួយដែលអ្នកមិនចូលចិត្តគឺជាជំងឺនៃចិត្ត។» Hsin Hsin Ming
២) «មនុស្សដែលគួរឲ្យអស់សំណើចបំផុតគឺជាមនុស្សដែលសោកសៅបំផុត។» ខុងជឺ
៣) «ធ្វើទង្វើដែលប្រកបដោយសេចក្ដីល្អតែកុំរំពឹងទុកនូវការដឹងគុណវិញ។» ខុងជឺ
៤) «បើអ្នកសម្លឹងមើលចូលទៅក្នុងបេះដូងរបស់ខ្លួនឯង ហើយមើលឃើញថាគ្មានអ្វីខុសនៅទីនោះ តើមានអ្វីទៅដែលអ្នកត្រូវព្រួយបារម្ភ ? មានអ្វីទៅដែលអ្នកត្រូវភ័យខ្លាច ?» ខុងជឺ
៥) «ចូរសម្លឹងមើលទៅក្មេងៗ ប្រាកដណាស់ថាពួកគេអាចនឹងឈ្លោះប្រកែកគ្នា ប៉ុន្តែជាទូទៅពួកគេមិនគុំកួនទុកក្នុងចិត្តនូវអារម្មណ៍មិនល្អដ៏ច្រើនឬយ៉ាងយូរដូចមនុស្សជំទង់នោះឡើយ។ មនុស្សជំទង់ភាគច្រើនមានគុណសម្បត្តិជាងកូនក្មេងនៅត្រង់ការអប់រំ ប៉ុន្តែតើការមានការអប់រំមានប្រយោជន៍អ្វីបើពួកគេបង្ហាញស្នាមញញឹមតែលាក់ទុកអារម្មណ៍អវិជ្ជមាននៅខាងក្នុង? ក្មេងៗមិនស្ដែងចេញទង្វើបែបនេះនោះទេ។ បើពួកគេខឹងជាមួយនរណាម្នាក់ ពួកគេនឹងបង្ហាញវា ហើយបន្ទាប់មកក៏បញ្ចប់វា។ ពួកគេនៅតែអាចលេងជាមួយមនុស្សម្នាក់នោះនៅថ្ងៃបន្ទាប់ទៀតបាន។» សម្ដេចសង្ឃដាឡៃ ឡាម៉ា
៦) «ការផ្លាស់ប្ដូរពិតប្រាកដគឺស្ថិតនៅខាងក្នុង ចូរបណ្ដោយឲ្យពិភពលោកខាងក្រៅទៅតាមធម្មជាតិរបស់វាចុះ។» សម្ដេចសង្ឃដាឡៃ ឡាម៉ា
៧) «ការប្រលែងចោលផ្ដល់ឲ្យយើងនូវសេរីភាព ហើយសេរីភាពគឺជាលក្ខខណ្ឌតែមួយគត់សម្រាប់សេចក្ដីសុខ។ បើនៅក្នុងបេះដូងរបស់យើង យើងនៅតែជាប់ជំពាក់ជាមួយនឹងកំហឹង ភាពក្រហល់ក្រហាយ ឬកម្មសិទ្ធិ នោះយើងមិនអាចមានសេរីភាពបានឡើយ។» Thich Nhat Hanh
៨) «ព្រះចន្ទមិនប្រយុទ្ធ។ វាមិនបានវាយប្រហារនរណាម្នាក់នោះទេ។ វាមិនមានកង្វល់។ វាក៏មិនព្យាយាមបុកទង្គិចនរណាម្នាក់នោះដែរ។ វារក្សាទៅនឹងធម្មជាតិរបស់វា ប៉ុន្តែជាមួយនឹងធម្មជាតិរបស់វា វាបានជះឥទ្ធិពលយ៉ាងស្រទន់ស្លូតបូត។ តើមានវត្ថុណាផ្សេងទៀតដែលអាចទាញមហាសមុទ្រទាំងមូលពីច្រាំងមួយទៅច្រាំងមួយទៀតបាននោះ ? ព្រះចន្ទស្មោះត្រង់នឹងធម្មជាតិរបស់វា ហើយថាមពលរបស់វាមិនចេះសាបសូន្យនោះឡើយ។» Ming Dao Deng
ដោយ៖ ស្រីពៅ
