ទម្លាប់មិនល្អចំនួន ៨ ដែលអ្នកគួរជៀសវាងនៅក្នុងពេលមានប្រជុំការងារ
នៅពេលមានកិច្ចប្រជុំការងារធ្វើឡើង តើអ្នកគិតថា អ្នកនឹងធ្វើអ្វីមុនគេ? ស្ដាប់ទៅវាហាក់មិនសូវចោទជាបញ្ហានោះទេប្រសិនបើអ្នកគ្រាន់តែជាបុគ្គលិកសាមញ្ញម្នាក់។ ក៏ប៉ុន្តែប្រសិនបើអ្នកជាប្រធានកិច្ចប្រជុំ និងទទួលខុសត្រូវសំខាន់ជាងគេក្នុងការរៀបចំឲ្យមានកិច្ចប្រជុំកើតមានឡើង អ្នកត្រូវយកចិត្តទុកដាក់លើចំណុចនេះ។
ទោះបីជាបែបនេះក្តីដើម្បីធានាថា អ្នកជាបុគ្គលិកល្អម្នាក់មានវិជ្ជាជីវៈ ថ្លៃថ្នូរ យកចិត្តទុកដាក់ដល់ការងារ និងគោរពឲ្យតម្លៃក្រុមការងារទាំងមូលជាពិសេសនៅពេលមានកិច្ចប្រជុំធ្វើឡើង អ្នកគួរជៀសវាងទម្លាប់មិនល្អចំនួន ៨ ខាងក្រោមនេះ៖
១.មកយឺតក្រោយគេ
បើទោះបីជាក្រុមហ៊ុនរបស់អ្នកមិនមានវិស័យតឹងតែងនៅពេលមានកិច្ចប្រជុំណាមួយចាប់ផ្តើមយ៉ាងណាក៏ដោយ អ្នកមិនគួរប្រើទម្លាប់នេះលាយឡំជាមួយគ្នាឡើយ។ អ្វីដែលមនុស្សគ្រប់គ្នាចាប់អារម្មណ៍អ្នកជាពិសេសពីចៅហ្វាយរបស់អ្នក អ្នកគួរត្រៀមខ្លួនឲ្យបានរួចរាល់ ដោយមានវត្តមាននៅក្នុងបន្ទប់ប្រជុំនៅមុនពេលកំណត់បានចាប់ផ្តើម។ នេះជាកាយវិការដែលបង្ហាញថា អ្នកបានឲ្យតម្លៃដល់មនុស្សគ្រប់គ្នាដែលនឹងចូលរួមប្រជុំជាមួយអ្នក។
២.មិនបានពិនិត្យមុននូវរបៀបវារៈប្រជុំ
ជាធម្មតាបុគ្គលិករដ្ឋបាលនឹងចងក្រងរបៀបវារៈសំខាន់ៗដែលនឹងត្រូវបានលើកទៅជជែកពិភាក្សានៅក្នុងកិច្ចប្រជុំ។ ដូច្នេះប្រសិនបើអ្នកជាបុគ្គលិកល្អម្នាក់ អ្នកមិនគួរមានវត្តមាននៅក្នុងបន្ទប់ប្រជុំដោយដៃទទេ ហើយពុំបានដឹងពីអ្វីដែលនឹងត្រូវប្រជុំនោះឡើយ។ អ្នកត្រូវប្រាកដថា ឬយ៉ាងហោចណាស់ដឹងខ្លះៗពីរបៀបវារៈមួយចំនួនដែលនឹងត្រូវបានលើកឡើងនៅក្នុងកិច្ចប្រជុំនោះ។ ការធ្វើដូច្នេះ អ្នកអាចត្រៀមខ្លួនបានទុកជាមុនដូចជាការត្រៀមផ្ដល់មតិយោបល់ លើកជាគំនិត ឬសំនួរដើម្បីជួយសម្រួលការងារដល់ក្រុមការងារទាំងមូល។
៣.ធ្វើការងារចម្រុះគ្នាពេលកំពុងប្រជុំ
នៅពេលកិច្ចប្រជុំចាប់ផ្ដើម អ្នកប្រហែលជាបានយកកុំព្យូទ័រ ទូរស័ព្ទដៃ សៀវភៅ ឬឧបករណ៍ផ្សេងៗទៀតទៅជាមួយផង។ នៅខណៈនោះ ស្របពេលដែលក្រុមការងារកំពុងពិភាក្សា អ្នកប្រហែលជាកំពុងស្ដាប់ផង ចំណាយពេលសរសេរសារផ្ញើអ៊ីមែលផង ឬឆាតនេះឆាតនោះជាដើមដែលរូបភាពនេះបង្ហាញថា អ្នកខ្វះការយកចិត្តទុកដាក់ស្ដាប់នូវអ្វីដែលក្រុមការងារកំពុងពិភាក្សា និងបង្ហាញកាយវិការមិនឲ្យតម្លៃផង។ យកល្អ អ្នកទុកការងារនោះមួយឡែកសិន ហើយងាកមកចាប់អារម្មណ៍អ្វីដែលកំពុងធ្វើនៅក្នុងកិច្ចប្រជុំ ទើបជាជម្រើសល្អសម្រាប់អ្នក។
៤.និយាយកាត់គេកាត់ឯង
ដោយសារតែកិច្ចប្រជុំផ្ដល់ឱកាសឲ្យអ្នកចូលរួមទាំងអស់អាចបញ្ចេញមតិយោបល់ឆ្លើយឆ្លងគ្នាទៅវិញទៅមក លើកបញ្ហានេះបញ្ហានោះ ហេតុដូច្នេះហើយវាអាចធ្វើឲ្យម្នាក់ៗនៅក្នុងអង្គប្រជុំចង់បង្ហាញគំនិតយោបល់រៀងៗខ្លួន។ យ៉ាងណាមិញ នៅពេលមានក្រុមការងារណាម្នាក់កំពុងនិយាយទៅកាន់មនុស្សគ្រប់គ្នា អ្នកមិនគួរនិយាយកាត់ក្រុមការងារនោះភ្លាមៗនោះឡើយ។ ការធ្វើបែបនេះ មានន័យថា អ្នកជាមនុស្សខ្វះការគោរព មិនចេះអត់ធ្មត់ និងគ្មានសីលធម៌ គ្មានវិជ្ជាជីវៈ។ ទុកឲ្យក្រុមការងារនិយាយចប់ចុងចប់ដើមសិន ចាំលើកគំនិតយោបល់ ឬអ្វីដែលអ្នកចង់និយាយតាមក្រោយ។
៥.សើច ងាកឆ្វេងងាកស្កាំ ឬបង្ហាញកាយវិការរំខានដល់កិច្ចប្រជុំទាំងមូល
ចំណុចមួយទៀតដែលអ្នកគួរយកចិត្តទុកដាក់ផងដែរនោះគឺការបង្ហាញកាយវិការមិនសមទំនងដូចជា ងាកឆ្វេងងាកស្តាំដោយគ្មានមូលហេតុ ធ្វើសកម្មភាពឆ្កាំឆ្គងដែលរំខានដល់ក្រុមការងារទាំងមូល និងសើចចំអកនៅក្នុងកិច្ចប្រជុំនោះនៅពេលដែលក្រុមការងារណាម្នាក់លើកឡើងគំនិតគួរឲ្យចង់អស់សំណើច។ ជាសីលធម៌ល្អក្នុងនាមជាបុគ្គលិករួមការងារ អ្នកគួររក្សាភាពស្ងប់ស្ងាត់ និងគ្រប់គ្រងស្ថានភាពឲ្យនៅធម្មតា ហើយបន្តការពិភាក្សាទៅមុខទៀតជាធម្មតា។
៦.ពិសាភេសជ្ជៈ ឬទទួលទានពេលកំពុងប្រជុំ
ជាធម្មតាទេនៅពេលមានកិច្ចប្រជុំក្រុមហ៊ុនភាគច្រើនបានដាក់ទឹកសុទ្ធ កាហ្វេ អាហារសម្រន់ ឬភេសជ្ជៈផ្សេងៗទៀតសម្រាប់ឲ្យក្រុមការងារទទួលទាននៅពេលមានកិច្ចប្រជុំ។ វាមិនមានអ្វីខុសឆ្គងនោះទេប្រសិនបើអ្នកទទួលទានផង និងស្ដាប់ក្រុមការងារពិភាក្សាផង។ ក៏ប៉ុន្តែជាគំរូល្អមួយដែលបង្ហាញថា អ្នកជាបុគ្គលិកល្អម្នាក់ និងទទួលបានចំណាប់អារម្មណ៍ពីក្រុមការងារទាំងមូលជាពិសេសពីចៅហ្វាយរបស់អ្នក អ្នកអាចទុកវាមួយឡែកសិនដោយផ្ដោតលើប្រធានបទពិភាក្សាជាការសំខាន់។ ពេលកិច្ចប្រជុំចប់ចាំពិសាក៏មិនយឺតពេលដែរ។
៧.អង្គុយទម្រេតខ្លួន បង្ហាញកាយវិការងងុយគេង ឬអោនក្បាលចុះក្រោម
តាមពិតទៅ ទម្លាប់នេះអ្នកមិនត្រូវឲ្យកើតមាននៅក្នុងកិច្ចប្រជុំនោះឡើយ។ ក៏ប៉ុន្តែមានពេលខ្លះអ្នកអាចភ្លេចខ្លួនដែលអាចឲ្យបណ្ដាលទង្វើទាំងនេះអាចកើតមានឡើងដោយអចេតនា។ យ៉ាងណាមិញ ទោះបីជាអ្នកហត់នឿយយ៉ាងណាក៏ដោយ អ្នកត្រូវគ្រប់គ្រងខ្លួនឯងឲ្យបានពីព្រោះថា ក្រេឌីត ឬភាពវិជ្ជាជីវៈក្នុងការងាររបស់អ្នកអាចនឹងត្រូវបានធ្លាក់ពិន្ទុដោយសារតែភាពចន្លោះប្រហោងនៅក្នុងកិច្ចប្រជុំដ៏សំខាន់ទាំងនោះ។
៨.ការប្រជុំធ្វើឡើងដោយគ្មានគោលបំណងច្បាស់លាស់
ប្រសិនបើអ្នកអ្នកមានបំណងចង់ណាត់ជួបជាមួយក្រុមការងារ ឬចៅហ្វាយដើម្បីពិភាក្សាអ្វីមួយ អ្នកត្រូវប្រាកដថា អ្នកមានគោលបំណងច្បាស់លាស់ទៅជាមួយផង។ អ្នកត្រូវត្រៀមខ្លួនជាស្រេចហើយថា អ្នកនឹងលើកយកអ្វីមកនិយាយ មានសំនួរអ្វីខ្លះ ឬចង់លើកពីសំណើអ្វី ជាដើម។ អ្នកត្រូវរៀបជារបៀបវារៈឲ្យបានត្រឹមត្រូវតាមលំដាប់លំដោយ មិននិយាយត្រឡប់មុខត្រឡប់ក្រោយតាមការនឹកឃើញរបស់អ្នកឡើយ។ រឿងនេះអ្នកត្រូវរៀបចំឲ្យបានរួចជាស្រេចមុនការប្រជុំចាប់ផ្តើម៕
ប្រភព៖ Businessinsider
