ក្រៅពីគិតគូរសុខភាពប្រជាជន សហគ្រិនរូបនេះមានផ្នត់គំនិតមួយគួរឲ្យសរសើរ
ល្អីបៃតង គឺជាឈ្មោះហាងលក់បន្លែផ្លែឈើ រួមនឹងផលិតផលសរីរាង្គជាច្រើនប្រភេទដែលដាំដុះដោយប្រជាកសិករខ្មែរ។ ក្រៅអំពីការគិតគូរដល់សុខភាពប្រជាជន លោក ចៃ ឡុង ដែលជាម្ចាស់ហាងផ្ទាល់ប្រាប់ថា ឈ្មោះល្អីបៃតង បានបង្កប់នូវខ្លឹមសារដាស់តឿនប្រជាជនទូទាំងប្រទេសឲ្យនឹកឃើញដល់ការរស់នៅកាលពីជំនាន់មុន នៅពេលទៅផ្សារឬទៅធ្វើចម្ការប្រជាជនតែងតែមានកញ្ជើល្អីសម្រាប់ដាក់របស់របរ ដូច្នេះឈ្មោះនេះគឺជាសាររំលឹកឲ្យពលរដ្ឋចូលរួមកាត់បន្ថយការប្រើប្រាស់ថង់ប្លាស្ទិច។
ដោយមើលឃើញហានិភ័យនៃសំណល់ប្លាស្ទិចជាច្រើនបានកើនឡើងរាល់ថ្ងៃ ហើយមិនត្រឹមតែធ្វើឲ្យប៉ះពាល់ដល់បរិស្ថានប៉ុណ្ណោះទេ ប៉ុន្តែវាថែមទាំងបង្កឲ្យប៉ះពាល់ដល់សុខភាពប្រជាជនរួមនឹងជីវិតសត្វផង។ លោក ចៃ ឡុង លើកឡើងថា ការយកឈ្មោះ «ល្អីបៃតង» មកធ្វើជាយីហោហាង គឺលោកចង់បង្ហាញពលរដ្ឋឲ្យនឹកឃើញដល់វិធីសាស្ត្រដែលមិនប៉ះពាល់ដល់បរិស្ថាន ជាក់ស្ដែងនៅពេលទៅផ្សារពួកគាត់អាចប្រើ ល្អី កញ្ជើ កន្ត្រក ស្លឹកឈូក និងស្លឹកចេកជាដើម ដើម្បីកុំឲ្យប៉ះពាល់ដល់បរិស្ថាន។ បន្ថែមពីនេះ ពាក្យល្អី គឺលោកចង់បង្ហាញ និងចង់លើកស្ទួយនូវផលិតផលក្នុងស្រុកដើម្បីគាំទ្រដល់ជីវភាពប្រជាកសិករខ្មែរយើង។
ល្បីបៃតង ត្រូវបានបង្កើតឡើងដោយក្រុមសហគ្រិនសង្គម រួមនឹងអ្នករកស៊ីមួយចំនួននាខេត្តបាត់ដំបង។ គោលបំណងនៃការបង្កើតនេះទីមួយគឺ ចង់ផ្ដល់នូវបន្លែផ្លែឈើសុវត្ថិភាពជូនប្រជាជន ទីពីរគឺចង់ចូលរួមដោះស្រាយបញ្ហាបរិស្ថាន តាមរយៈការកាត់បន្ថយការប្រើប្រាស់ថង់ប្លាស្ទិក ជីគីមី ថ្នាំសម្លាប់សត្វល្អិត និងចុងក្រោយគឺចង់ចូលរួមចំណែកលើកស្ទួយជីវភាពរបស់ប្រជាកសិករខ្មែរឲ្យកាន់តែប្រសើរឡើង តាមរយៈការជ្រោមជ្រែងលើការផលិត និងការធានានូវតម្លៃទីផ្សារសម្រាប់ពួកគាត់។
ជាគោលដៅចំពោះល្អីបៃតង លោក ចៃ ឡុង ប្រាប់ថាលោកនឹងព្យាយាមពង្រីកផលិតផលសម្រាប់បម្រើទីផ្សារឲ្យកាន់តែទូលំទូលាយ ដោយពេលនេះគឺលោកបានចាប់ផ្ដើមពីខេត្តបាត់ដំបង និងបន្ទាប់មកទៀតគឺអាចជាខេត្តនៅភូមិភាគពាយ័ព្យ និងបន្តទៅតាមរាជធានីខេត្តនានា៕
ដោយ៖ ជួប ស្រីរ័ត្ន
