បណ្ដាញគាំទ្រចំនួន ៨ ដែលសហគ្រិនទាំងអស់ត្រូវការដើម្បីភាពរីកចម្រើនក្នុងអាជីវកម្ម
ក្នុងនាមជាសហគ្រិនម្នាក់ ការបង្កើតបណ្ដាញទំនាក់ទំនងដ៏ល្អមួយសម្រាប់គាំទ្រដល់អាជីវកម្ម គឺជារឿងសំខាន់ខ្លាំងណាស់។ ក៏ប៉ុន្តែវាក៏មិនស្រួលដូចបកចេកនោះដែរ។ វាត្រូវការការលះបង់ពេលវេលា ថាមពល ភាពស្មោះត្រង់ និងពេលខ្លះលុយកាក់ជាដើមដែលគ្រឹះសម្រាប់កសាងបណ្ដាញទំនាក់ទំនង។
យ៉ាងណាមិញ នៅក្នុងការកសាងបណ្ដាញទំនាក់ទំនងសម្រាប់គាំទ្រដល់អាជីវកម្មរបស់អ្នក ត្រូវបានគេបែងចែកជាច្រើនប្រភេទ។ អត្ថបទនេះនឹងបង្ហាញ ពីប្រភេទនៃការបង្កើតបណ្តាញទំនាក់ទំនង ចំនួន ៨ ដែលសំខាន់សម្រាប់សហគ្រិនយុគសម័យថ្មីនេះ។
១.គ្រូបង្គោល ឬអ្នកណែនាំផ្លូវ (Mentors)
គ្រូបង្គោល គឺជាមនុស្សម្នាក់ដែលមានបទពិសោធន៍ ជំនាញ និងឆន្ទៈដូចអ្នកដែលអ្នកត្រូវការសម្រាប់ជាជំនួយនៅក្នុងវិថីជំនួញរបស់អ្នក ។ អ្នកទាំងនេះអាចណែនាំ និងជួយកែតម្រង់ផ្លូវសម្រាប់ឲ្យអ្នកដើរឆ្លងកាត់ ដោយមិនឲ្យអ្នកចំណាយពេលយូរដូចអ្វីដែលពួកគេធ្លាប់ដើរនោះឡើយ។ ជាទូទៅនៅក្នុងបរិបទជំនួញរបស់អ្នក អ្នកគួរកសាងទំនាក់ទំនងជាមួយបុគ្គលទាំងនេះឲ្យបានច្រើនកាន់តែល្អ ត្បិតអីអ្នកនឹងទទួលបានចំណេះដឹង ដំបូន្មាន និងវិធីសាស្ត្រល្អៗកាន់តែច្រើនពីពួកគេ។
២.ដៃគូប្រកបដោយគណនេយ្យភាព (AP)
ដៃគូគណនេយ្យភាព គឺជាបុគ្គលដ៏សំខាន់បំផុតមួយដែលអាចជួយដាស់តឿនអ្នកឲ្យមានការទទួលខុសត្រូវខ្ពស់ចំពោះការការងារ ឬគម្រោងការងារនៅក្នុងរយៈពេលខ្លីណាមួយ។ ទំនាក់ទំនងប្រភេទនេះអាចធ្វើឲ្យអ្នកមិនចំណាយអ្វីសោះ ឬក៏ត្រូវចំណាយប្រាក់មួយចំនួន ប៉ុន្តែទាមទារឲ្យមានការប្ដេជ្ញាចិត្តពីភាគីទាំងពីរ។
ដើម្បីធ្វើការជាមួយបុគ្គលនេះ មុនដំបូងអ្នកត្រូវប្រាប់ដៃគូរបស់អ្នកពីគម្រោងដែលអ្នកចង់ធ្វើ និងវាយតម្លៃពីលទ្ធផលដែលអ្នកចង់សម្រេចបាន។ ទន្ទឹមនឹងនេះ អ្នកអាចផ្ញើគ្រោងនៃជំហាននីមួយៗដែលអ្នកត្រូវការដើម្បីបញ្ចប់គម្រោងនោះ ហើយអ្នកទាំងពីរត្រូវមានកាលវិភាគការងារដែលត្រូវធ្វើនីមួយៗនៅក្នុងដៃ។ អ្នកត្រូវស្នើឲ្យពួកគេជួយត្រួតពិនិត្យ ហើយត្រូវផ្តល់ព័ត៌មានលម្អិតជាច្រើនពីដំណើរការការងាររបស់អ្នក បញ្ហាប្រឈមដែលនឹងត្រូវពិភាក្សា ជំហានដែលត្រូវធ្វើបន្ទាប់ និងស្នើសុំដំបូន្មានប្រសិនបើចាំបាច់។ ដៃគូប្រភេទនេះអាចជាមិត្តភក្ដិរបស់អ្នក អ្នករួមការងារ គ្រូបង្គោល ឬគ្រូបណ្តុះបណ្តាលក៏បាន។
៣. គ្រូបណ្តុះបណ្តាល (Coaches)
គ្រូបណ្តុះបណ្តាលគឺជាអ្នកចាំជួយអភិវឌ្ឍជំនាញ និងសមត្ថភាពរបស់អ្នកឲ្យកាន់តែរីកចម្រើនខ្លាំងឡើង។ អ្នកអាចចំណាយលុយលើពួកគេនៅក្នុងរយៈពេលកំណត់ណាមួយតាមលទ្ធភាពរបស់អ្នកដើម្បីជួលមកជួយបង្ហាត់បង្រៀនជំនាញដែលមានស្រាប់ ឬជំនាញផ្សេងៗទៀតដែលទាក់ទិនទៅនឹងការជួយគាំទ្រដល់មុខជំនួញរបស់អ្នក។ អ្នកអាចជួលគ្រូបណ្តុះបណ្តាលច្រើនអ្នកនៅក្នុងពេលតែមួយ ក៏ប៉ុន្តែត្រូវប្រាកដថា បុគ្គលទាំងនោះមានសមត្ថភាពគ្រប់គ្រាន់ដែលអាចជួយឲ្យអ្នកទទួលបានផលដូចអ្វីដែលអ្នកចង់បាន។
៤.ក្រុមពិភាក្សាពិសេស (Mastermind Groups)
អ្នកគួរចូលរួមបង្កើតក្រុមពិភាក្សាមួយដែលប្រមូលផ្តុំទៅដោយមនុស្សមានសមត្ថភាព ចំណេះដឹង និងបទពិសោធន៍ផ្សេងៗគ្នា ឬប្រហាក់ប្រហែលអ្នក។ អត្ថប្រយោជន៍ដែលអ្នកទទួលបានគឺការទទួលបានគំនិតថ្មីៗ ការចែករំលែក និងការចូលរួមដោះស្រាយបញ្ហាជាច្រើនដែលសមាជិកក្រុមជួបប្រទះ។ ក្រុមប្រភេទនេះ អាចជាលក្ខណៈផ្លូវការ ឬមិនផ្លូវការក៏បាន ក៏ប៉ុន្តែអ្នកត្រូវរៀបចំធ្វើវាឲ្យបានទៀងទាត់ និងមានការទទួលខុសត្រូវ ព្រមទាំងផ្តោតលើផលប្រយោជន៍ដល់សមាជិកក្រុមទាំងអស់ជាសំខាន់។
៥.បណ្ដាញទំនាក់ទំនងតាមអ៊ីនធឺណិត (Online Groups)
នេះគឺជាប្រភេទបណ្ដាញទំនាក់ទំនងដ៏ល្អមួយទៀតដែលស័ក្ដិសមសម្រាប់អ្នក ជាពិសេសនៅពេលអ្នកចំណាយពេលច្រើននៅខាងមុខកុំព្យូទ័រ។ អ្នកអាចបង្កើតក្រុម (Group) បណ្ដាញមួយនេះបានតាមរយៈបណ្ដាញសង្គមដូចជា Facebook ឬ LinkedIn ជាដើម។ ពួកគេអាចចែករំលែកចំណេះដឹង បទពិសោធន៍ ឬប្រធានបទផ្សេងៗដែលមានផលប្រយោជន៍ដល់ការអភិវឌ្ឍមុខជំនួញរបស់អ្នក។ ប៉ុន្តែអ្នកត្រូវចាត់តាំងអ្នកណាម្នាក់ដែលមានភាពសកម្មជាងគេក្នុងការសម្របសម្រួលការងារក្នុងក្រុម និងជំរុញឲ្យក្រុមទាំងមូលមានការទទួលខុសត្រូវ។
៦.ចូលរួមជាមួយស្ថាប័នដែលមានភាពវិជ្ជាជីវៈ (Professional Organizations)
ស្ថាប័នដែលមានភាពវិជ្ជាជីវៈ គឺជាបណ្ដាញទំនាក់ទំនងដ៏រឹងមាំមួយទៀតដែលជួយឲ្យអ្នកអាចបង្ខិតខ្លួនកាន់តែកៀកកើយទៅនឹងបុគ្គលផ្សេងៗដែលពោរពេញទៅដោយក្រុមមនុស្សដែលមានបទពិសោធន៍ ចំណេះដឹង និងជំនាញផ្សេងៗគ្នា។ អ្នកអាចសុំចុះឈ្មោះជាសមាជិកជាមួយស្ថាប័នទាំងនោះដែលអ្នកយល់ឃើញថា ល្អស័ក្តិសមតាមស្ថានភាពរបស់អ្នកដើម្បីចាប់យកឱកាសមកអភិវឌ្ឍសមត្ថភាពឲ្យកាន់តែមុតស្រួចឡើង បើទោះបីជាត្រូវចំណាយតិច ឬច្រើនយ៉ាងណាក៏ដោយ។
៧.ពង្រឹងមិត្តភាព
យ៉ាងណាមិញ អ្នកក៏មិនត្រូវមើលរំលងមិត្តភាពឡើយ ត្បិតអីពួកគេគឺជាមូលដ្ឋានគ្រឹះរបស់អ្នក។ ខុសពីបុគ្គលផ្សេងៗទៀតដែលអ្នកទើបនឹងស្គាល់ ហើយមានសមត្ថភាព ឬចំណេះដឹងខ្លាំង មិត្តភក្ដិរបស់អ្នកនៅតែជាមនុស្សសំខាន់ដែលអាចជួយលើកទឹកចិត្ត ស្តាប់ និងជួយអ្នកប្រកបដោយភក្ដីភាពក្នុងករណីអ្នកស្ថិតនៅក្នុងស្ថានភាពបរាជ័យ។ អ្នកអាចលើកបញ្ហារបស់អ្នកដោយបើកចំហ ហើយពួកគេអាចនឹងផ្តល់ដំបូន្មាន និងជម្រើសល្អៗឲ្យអ្នកបាន។
៨.មជ្ឈមណ្ឌលអភិវឌ្ឍអាជីវកម្ម (Business Development Centers)
ភាពលូតលាស់ក្នុងអាជីវកម្មរបស់អ្នកគឺជារឿងអាទិភាព។ ហេតុដូច្នេះហើយ ការចូលរួមជាមួយមជ្ឈមណ្ឌលផ្សេងៗដែលផ្ដោតលើការអភិវឌ្ឍអាជីវកម្ម អាចជួយអ្នកបានច្រើនក្នុងរឿងនេះ។ ដៃគូល្អៗដែលកំពុងត្រូវការអ្នក និងអ្នកប្រឹក្សាជំនាញៗជាច្រើនអាចមានវត្តមាននៅទីនោះ។ អ្នកនឹងទទួលបានបទពិសោធន៍ និងចំណេះដឹងថ្មីៗជាច្រើនពីមជ្ឈមណ្ឌលអភិវឌ្ឍអាជីវកម្មទាំងនោះ ពីព្រោះពួកគេអាចរៀបចំកម្មវិធីជាច្រើនដូចជា សិក្ខាសាលា សន្និសីទ ឬកម្មវិធីបណ្តុះបណ្តាលជាដើម។ ទីនោះអាចផ្តល់ឱកាសឲ្យអ្នកបញ្ចេញសមត្ថភាព ឬគំនិតរបស់អ្នកដែលអាចទទួលបានចំណាប់អារម្មណ៍ និងការវិនិយោគពីក្រុមហ៊ុនណាមួយមកលើអាជីវកម្មរបស់អ្នកក៏ថាបាន៕
ប្រភព៖ Addict2success
