ការអានបង្កើតបញ្ញវន្ត ប្រទេសដែលមានបញ្ញវន្តច្រើនជាប្រទេសរីកចម្រើន
នៅក្នុងវេទិកាយុវជនស្ដីអំពី ជំនាញអានសតវត្សរ៍ទី២១ ដែលរៀបចំដោយអង្គការកម្មវិធីអភិវឌ្ឍន៍ធនធានយុវជនហៅកាត់ថា YRDP លោក ឧកញ៉ា វេជ្ជបណ្ឌិត គួច ម៉េងលី នាយកប្រតិបត្តិនៃមូលនិធិ ម៉េងលី ជេ. គួច ដែលមនុស្សភាគច្រើនតែងស្គាល់ បានចែករំលែកនូវពាក្យមួយឃ្លាសម្រាប់ការពិចារណា និងជំរុញយុវជនថា «ការអានបង្កើតបញ្ញវន្ត ហើយប្រទេសដែលមានបញ្ញវន្តច្រើនជាប្រទេសដែលរីកចម្រើន ចុះបើប្រទេសដែលមានយុវជនច្រើនតែបែរជាមិនអាន តើប្រទេសនោះអាចវិវត្តកើតទេ?»។
អត់ចំណេះធ្វើឲ្យយើងមិនហ៊ានដឹកនាំ យើងខ្លាចយើងគ្មានភាពឯករាជ្យ។ល។ នេះជាការលើកឡើងរបស់លោក ឧកញ៉ា គួច ម៉េងលី។ លោកថា ដោយសារតែយុវជនយើងខ្វះការអានទើបធ្វើឲ្យយើងមានចំណេះដឹងនូវស្ទាក់ស្ទើរដែលធ្វើឲ្យយើងនៅខ្លាចគេ យើងមិនហ៊ានដឹកនាំពួកបរទេសទេ សុខចិត្តធ្វើការឲ្យពួកបរទេស យើងឲ្យតម្លៃគេ និងមិនដឹងពីតម្លៃខ្លួនឯង នេះក៏ដោយសារតែយើងនៅខ្សោយនៅឡើយ។
ហេតុអ្វីបានជាយើងនៅខ្សោយ? ដោយសារតែយើងមិនចេះ ដូច្នេះឲ្យតែពួកបរទេសមក យើងតែងតែទៅធ្វើជាជំនួយការឲ្យគេ មិនដែលឲ្យគេមកធ្វើជំនួយការយើងសោះ នោះដោយសារតែយើងមិនទាន់មានផ្នត់គំនិតបែបនោះនៅឡើយ។ ការអានធ្វើឲ្យយើងយល់ដឹងជ្រៅជ្រះ ធ្វើឲ្យយើងចេះគិតវែងឆ្ងាយ មិនមែនគេនិយាយមកយើងចេះតែយល់ស្របទៅតាមតែគេនោះទេ ហើយបើយើងនៅតែបន្តអញ្ចឹងគឺយើងចោលបាយហើយ។ នេះជាការលើកឡើងបន្ថែមរបស់លោកឧកញ៉ា។
លោកឧកញ៉ាថា ប្រទេសជឿនលឿនភាគច្រើននៅលើសាកលលោកពលរដ្ឋរបស់គេបានបណ្ដុះនូវវប្បធម៌នៃការអានតាំងពីក្មេងមកម៉្លេះ ពោលគឺឪពុកម្ដាយអាណាព្យាបាល គេអានសៀវភៅឲ្យកូនគេស្ដាប់តាំងពីកូននៅក្នុងពោះនៅឡើយ ពេលទំនេរគេនាំកូនទៅបណ្ណាល័យ ទៅអានសៀវភៅ។ ចុះហេតុអ្វីចាំបាច់ធ្វើដូច្នេះ? ព្រោះក្មេងប្រៀបដូចជាក្រដាសស បើយើងផាត់ពណ៌អ្វីវានឹងចេញពណ៌នោះ។ ដូច្នេះសង្គមគេ ការរស់នៅរបស់ពលរដ្ឋគេគឺពោរពេញដោយសេចក្ដីថ្លៃថ្នូរ។
ឧកញ៉ា គួច មេងលី «យើងត្រូវចាប់ផ្ដើមកែប្រែពីពេលនេះទៅ ត្រូវទម្លាប់អាន អានឲ្យច្រើន ទាំងសៀវភៅខ្មែរសៀវភៅបរទេស នោះទើបយើងចេះ បើយើងចេះហើយទើបយើងហ៊ាននិយាយដោយមិនខ្លាច»៕
រូបភាព៖ YRDP
ដោយ៖ ជួប ស្រីរ័ត្ន
