ចង់ដឹងថា បញ្ញាស្មារតី (EQ) របស់អ្នកខ្លាំង ឬខ្សោយ សាកល្បងឆ្លើយសំនួរ ៨ នេះ!
វេទិកាសេដ្ឋកិច្ចពិភពលោក (World Economic Forum) បានបង្ហាញរបាយការណ៍គួរឲ្យចាប់អារម្មណ៍របស់ខ្លួនមួយស្តីអំពីការងារសម្រាប់ពេលអនាគត (Future Of Jobs Report 2018) ដែលបានធ្វើឡើងកាលពីឆ្នាំ ២០១៨ កន្លងទៅ។ ក្នុងរបាយការណ៍នេះ ស្ថាប័ននេះបានរកឃើញជំនាញកំពូលៗចំនួន ១០ ដែលចាំបាច់បំផុតសម្រាប់អនាគតបដិវត្តឧស្សាហកម្មរបស់ពិភពលោក ( Fourth Industrial Revolution)។
ជំនាញមួយដែលរបាយការណ៍ខាងលើយល់ថា ធ្វើឲ្យអ្នកជោគជ័យគឺវាមានវត្តមានរួចទៅហើយដែលនោះគឺ ភាពឆ្លាតវៃផ្នែកបញ្ញាស្មារតី ឬ Emotional Intelligence (EQ)។ ជំនាញមួយនេះត្រូវបានគេរំពឹងថា នឹងមាននិន្នាការកាន់តែខ្ពស់ ត្រូវការច្រើននៅលើទីផ្សារការងារក្នុងឆ្នាំ ២០២២ ខាងមុខ ហើយវាត្រូវបានគេចាត់ទុកថា ជាជំនាញដ៏មានសក្ដានុពលសម្រាប់ការឆ្លុះបញ្ចាំងពីសមត្ថភាព និងការអភិវឌ្ឍវិជ្ជាជីវៈផ្ទាល់ខ្លួន។
នៅក្នុងការសិក្សាជាច្រើនបានរកឃើញថា បុគ្គលិកដែលមានបញ្ញាស្មារតី (EQ) ខ្ពស់ជួយជំរុញឲ្យបរិស្ថានការងារកាន់តែល្អប្រសើរឡើងដែលរួមមាន៖
-ការជំរុញឲ្យមានការធ្វើការងារជាក្រុម៖ អ្នកដែលមានបញ្ញាស្មារតីខ្ពស់ មានទំនាក់ទំនងល្អជាមួយក្រុមការងារជាងអ្នកដែលមិនសូវមានបញ្ញាស្មារតី។
-ចែករំលែកគំនិត និងបើកចិត្តទូលាយទទួលយកគំនិតអ្នកដទៃ៖ មនុស្សប្រភេទនេះមិនប្រើគំនិតត្រួតត្រានិយមនៅក្នុងស្ថានភាពមួយដោយគ្មានការពិចារណា និងពិភាក្សាជាមួយមនុស្សជុំវិញខ្លួនឡើយ។ ផ្ទុយទៅវិញ ពួកគេបង្កើនទំនុកចិត្តដើម្បីឲ្យក្រុមការងារចាប់ដៃធ្វើការរួមគ្នា។
-ងាយស្រួលក្នុងការផ្លាស់ប្ដូរ និងការប្រឈមទៅនឹងស្ថានភាពថ្មីៗ៖ បុគ្គលិកដែលមានបញ្ញាស្មារតីខ្ពស់ យល់ច្រើនពីវិធីគ្រប់គ្រងអតិថិជន របៀបធ្វើការជាមួយអ្នករួមការងារដែលមិនសប្បាយចិត្ត ឬអ្នកគ្រប់គ្រងដែលមិនពេញចិត្តនឹងការងាររបស់ខ្លួន។
-រក្សាភាពស្ងប់ស្ងៀម និងបង្កើតភាពវិជ្ជមាននៅក្នុងកិច្ចពិភាក្សាដ៏ចម្រូងចម្រាស៖ បុគ្គលិកដែលមានបញ្ញាស្មារតីខ្ពស់ មានសមត្ថភាពខ្ពស់ក្នុងការបង្ហាញភាពរម្យទម អត់ធ្មត់ ចិត្តត្រជាក់ និងកំណត់ព្រំដែនរបស់ខ្លួនពេលមានជម្លោះ ឬភាពខ្វែងគំនិតគ្នាកើតមានឡើង (ប្រសិនបើខ្លួនជាអ្នកគ្រប់គ្រង)។
-ចេះលើកទឹកចិត្តខ្លួនឯង៖ បុគ្គលិកដែលមានបញ្ញាស្មារតីខ្ពស់ គឺជាមនុស្សដែលមានផ្នត់គំនិតទូលំទូលាយ អភិវឌ្ឍជាប្រចាំ មានសុទិដ្ឋិនិយម គំនិតវិជ្ជមានដែលទាំងអស់នេះផុសចេញពីខ្លួនឯងផ្ទាល់។ មិនតែប៉ុណ្ណោះ បុគ្គលិកប្រភេទនេះ ជាមនុស្សសំបូរទៅដោយគំនិតផ្ដួចផ្ដើម មានគំនិតច្នៃប្រឌិត និងចេះស្វែងរកឱកាសទៀតផង។
ប៉ុន្មានចំណុចខាងលើនេះគឺជាគុណសម្បត្តិពិសេសៗ ត្រួសៗរបស់មនុស្សដែលមានបញ្ញាស្មារតីខ្ពស់។ សម្រាប់អ្នកវិញ ដើម្បី ចង់ដឹងថា អ្នកជាមនុស្សមានបញ្ញាស្មារតី (EQ) ខ្លាំង ឬខ្សោយ សាកល្បងឆ្លើយសំនួរចំនួន ៨ ខាងក្រោមនេះជាមុនសិន៖
១.តើអ្នកជារឿយៗបានដឹងអំពីអារម្មណ៍របស់អ្នកកំពុងគិតអ្វីដែរឬទេ? ហើយហេតុអ្វីបានអ្នកមានអារម្មណ៍បែបនោះ?
២.តើអ្នកបានដឹងពីដែនកំណត់ក៏ដូចជាចំណុចខ្លាំងផ្ទាល់ខ្លួនរបស់អ្នកដែរឬទេ?
៣.តើអ្នកអាចគ្រប់គ្រងអារម្មណ៍តានតឹងរបស់អ្នកបានល្អក្នុងកម្រិតណា? ឧទាហរណ៍ថា អ្នកអាចមានអារម្មណ៍ល្អមកវិញភ្លាមៗក្រោយជួបបញ្ហាខកចិត្ត បាក់ទឹកចិត្ត ការបរាជ័យ ឬភាពតានតឹងផ្សេងៗក្នុងជីវិតដែលអ្នកបានជួប។
៤.តើអ្នកអាចសម្របខ្លួនបានយ៉ាងរលូនទៅនឹងការផ្លាស់ប្ដូរដែលអ្នកកំពុងជួបដែរឬទេ?
៥.តើអ្នកបានផ្ដោតយកចិត្តទុកដាក់ដល់គោលដៅសំខាន់របស់អ្នក និងដឹងពីជំហាននីមួយៗដែលត្រូវដើរឆ្ពោះទៅកាន់គោលដៅនោះដែរឬទេ?
៦.តើអ្នកជារឿយៗយល់ពីអារម្មណ៍អ្នកដែលអ្នកនិយាយជាមួយ និងយល់ថាតើពួកគេកំពុងមើលអ្វីមួយក្នុងរូបភាពបែបណាដែរឬទេ?
៧.តើអ្នកអាចដឹកនាំការចរចាមួយឆ្ពោះទៅរកការព្រមព្រៀងប្រកបដោយភាពផ្លែផ្កា ភាពពេញចិត្តពេញថ្លើម និងអាចជួយដោះស្រាយជម្លោះដែលកើតមានឡើងបានដែរឬទេ?
៨. តើអ្នកមានយុទ្ធសាស្ត្រ ឬមធ្យោបាយអ្វីដែរឬទេ ដើម្បីបញ្ចុះបញ្ចូល និងប្រើឥទ្ធិពលរបស់អ្នកឲ្យមានប្រសិទ្ធភាពទៅលើអ្នកដទៃ?
ប្រសិនបើចម្លើយរបស់អ្នកឆ្លើយថា "Yes” ភាគច្រើន នោះមានន័យថា អ្នកត្រូវបានចាត់ទុកថា ជាមនុស្សមានពិន្ទុ ភាពឆ្លាតវៃផ្នែក "បញ្ញាស្មារតី” ខ្ពស់ដែរ៕
ប្រភព៖ INC
