តើអ្នកគួរនៅធ្វើការយូរប៉ុណ្ណា បើគេមិនដំឡើងតំណែងឲ្យអ្នក?
ការអភិវឌ្ឍសមត្ថភាពនៅក្នុងអាជីពការងារ គឺជាក្តីប្រាថ្នាដ៏ធំមួយរបស់បុគ្គលិកគ្រប់រូបក្រៅពីប្រាក់ខែរបស់ខ្លួន។ នៅខណៈដែលការដំឡើងតំណែងបានធ្វើឲ្យខ្លួនកាន់តែទទួលបានប្រាក់ចំណូលកាន់តែច្រើន អ្នកមិនគួរនៅធ្វើការក្រុមហ៊ុនមួយដុះស្នឹមនៅហ្នឹងកន្លែងទេ ប្រសិនបើឱកាសមួយនេះមិនត្រូវបានផ្តល់ឲ្យ។
បើយោងតាមការលើកឡើងរបស់លោក Ian Siegel នាយកប្រតិបត្តិក្រុមហ៊ុន ZipRecruiter បានឲ្យដឹងថា បុគ្គលគ្រប់រូបគួរតែត្រូវបានដំឡើងតំណែងនៅរង្វង់ ៣ឆ្នាំម្តង។ លោកបន្តថា ប្រសិនបើអ្នកមិនត្រូវបានដំឡើងតំណែងនៅក្នុងរយៈពេលនេះទេ នោះមានន័យថា ការងាររបស់អ្នកកំពុងមានបញ្ហាហើយ។
នាយកប្រតិបត្តិរូបនេះបានបញ្ជាក់ទៀតថា ជាធម្មតានៅពេលដែលសមត្ថភាពរបស់អ្នកកាន់តែខ្ពស់ ការប្តូរមុខតំណែង ឬដំឡើងតំណែងម្តងៗគឺប្រើពេលកាន់តែយូរ។ ប៉ុន្តែអ្វីដែលអ្នកត្រូវបន្តធ្វើ ជាលំដាប់នោះគឺត្រូវមានការទទួលខុសត្រូវកាន់តែច្រើន និងធ្វើឲ្យជំនាញរបស់អ្នកកាន់តែមុតស្រួចបន្ថែមទៀត។
លោក Ian Siegel បានផ្តល់គន្លឹះមួយចំនួនខាងក្រោមនេះថា តើអ្នកត្រូវធ្វើអ្វីខ្លះដើម្បីសុំដំឡើងតំណែង? និង តើអ្នកត្រូវធ្វើដូចម្តេចពេលសំណើរបស់អ្នកបរាជ័យ?
១.ត្រូវប្រាកដថា អ្នកបានត្រៀមខ្លួនរួចរាល់ដើម្បីឡើងតំណែង
ការឡើងតំណែងមិនមែននៅសុខៗអ្នកចង់ឡើងតំណែងភ្លាមៗនោះឡើយ។ អ្នកត្រូវប្រាកដខ្លួនឯងថា អ្នកពិតជាបានត្រៀមខ្លួនបំពេញការងារជាច្រើនរួចរាល់ហើយដោយផ្អែកលើការទទួលខុសត្រូវកាន់តែច្រើនឡើង និងការងារទទួលបានលទ្ធផលល្អដូច ឬលើសការរំពឹងទុក។
២.យល់ពីប្រព័ន្ធអេកូនៅក្នុងក្រុមហ៊ុនរបស់អ្នក
អ្នកត្រូវស្វែងយល់ឲ្យច្បាស់ពីរចនាសម្ព័ន្ធការងារនៅក្នុងក្រុមហ៊ុនរបស់អ្នកថា តើការឡើងដំណែងធ្វើឡើងឆ្លងកាត់តាមដំណាក់កាលណាខ្លះ? ក្រុមហ៊ុនខ្លះមានមុខតំណែង និងការងារជាច្រើនដែលធ្វើឲ្យការដំឡើងតំណែងរបស់អ្នកមិនសូវជាមានបញ្ហានោះឡើយ។ ក៏ប៉ុន្តែមានក្រុមហ៊ុនខ្លះទៀត មុខតំណែងដែលត្រូវដំឡើងមានតិច មានការប្រកួតប្រជែងច្រើននៅក្នុងចំណោមបុគ្គលិកដែលមានសមត្ថភាព ហេតុដូច្នេះការសុំដំឡើងតំណែងរបស់អ្នកអាចចង្អៀតបន្តិច។ ជាយោបល់ល្អ អ្នកអាចសាកសួរអ្នកដែលបានឆ្លងកាត់បទពិសោធន៍មុនអ្នកនៅក្នុងក្រុមហ៊ុនរបស់អ្នកដើម្បីចែករំលែកពីវិធីដែលអាចជួយឲ្យអ្នកបានឡើងតំណែងឆាប់រហ័ស។
៣.បើទទួលបានចំឡើយបដិសេធន៍ ស្នើសុំអ្វីផ្សេងទៀត
ប្រសិនបើការដំឡើងមុខតំណែងរបស់អ្នកត្រូវបានបដិសេធន៍ អ្នកគួរស្នើសុំអ្វីផ្សេងទៀតក្រៅពីនេះដែលអ្នកយល់ថា វាអាចផ្តល់ឱកាសល្អដល់ការអភិវឌ្ឍសមត្ថភាពក្នុងអាជីពការងាររបស់អ្នក។ ប៉ុន្តែមិននឹងអ្នកស្នើសុំអ្វីផ្សេងនោះ អ្នកត្រូវប្រាកដថា អ្នកចង់បានអ្វីពិតប្រាកដ? សុំកុំមានខ្មាសអៀនដើម្បីគ្រាន់តែចង់ឲ្យខ្លួនឯងកាន់តែប្រសើរ ប្រាក់ខែកាន់តែច្រើន ឱកាសការងារកាន់តែខ្ពស់ និងទទួលបានជំនាញថ្មីៗ។ ផ្ទុយទៅវិញ បើវានៅតែមិនបានផលទៀត វាដល់ពេលដែលអ្នកត្រូវឈានដល់ដំណាក់កាលទី៤។
៤.ដល់ពេលដែលអ្នកត្រូវចាកចេញ
ប្រសិនបើអ្នកបានខិតខំប្រឹងប្រែងធ្វើការហើយ និងធ្វើលើសពីការទទួលខុសត្រូវរបស់អ្នកទៅទៀត ប៉ុន្តែនៅតែមិនត្រូវបានដំឡើងតំណែង រឿងដ៏ល្អបំផុតដែលអ្នកត្រូវធ្វើនៅពេលនេះគឺដាក់ពាក្យលាលែងរកការងារនៅកន្លែងថ្មី។ អ្នកត្រូវដឹងថា ពេលខ្លះការដំឡើងដំណែងមិនផ្អែកតែនៅលើការខិតខំប្រឹងប្រែងយកចិត្តទុកដាក់លើការងាររបស់អ្នកតែមួយមុខនោះទេ។
ប្រសិនបើចៅហ្វាយរបស់អ្នកមិនប្រាកដខ្លួនឯងពីអ្វីដែលអ្នកកំពុងធ្វើ នោះការដំឡើងតំណែងរបស់អ្នកគឺជារឿងមិនអាចទៅរួចនោះឡើយ។ ទន្ទឹមនឹងនេះបើចៅហ្វាយរបស់អ្នកបានកំណត់គម្រោងការងារមួយដែលត្រូវធ្វើ ហើយបន្ទាប់មកបានផ្លាស់ប្ដូរគោលដៅគម្រោងការងារនោះ នោះភ្លើងក្រហមក៏នៅតែធ្លាក់មកលើអ្នកដដែល។
មួយវិញទៀត បើការងាររបស់អ្នកកាន់តែងាយស្រួលទៅៗ ហើយអ្នកមិនត្រូវបានដំឡើងតំណែងទេនោះ វាអាចជាសញ្ញាណមួយបញ្ជាក់ថា អ្នកត្រូវការមុខតំណែងដែលធំជាងនេះ បើមិនដូច្នេះទេអ្នកត្រូវសម្លឹងមើលការងារនៅកន្លែងថ្មីទៀតវាល្អប្រសើរជាង៕
ប្រភព៖ CNN
