រឿងទាំង ៤ចំណុចនេះហើយដែលអ្នកចូលចិត្តធ្វើ តែវាក៏នាំផលអាក្រក់មកវិញនាពេលក្រោយ
មនុស្សម្នាក់ៗតែងមានចំណង់ចំណូលចិត្តខុសៗគ្នា ហើយធ្វើអ្វីក៏មិនដូចគ្នាដែរ។ តែអ្នកក៏ត្រូវដឹងដែរថារឿងដែលអ្នកកំពុងធ្វើនោះអាចបង្កើតជាបញ្ហាដល់អ្នកឬអត់?ពេលខ្លះអ្នកចង់ធ្វើរឿងដែលខ្លួនគិតថាត្រឹមត្រូវពិតមែន តែពេលណាមួយវានឹងនាំផលអាក្រក់មកអ្នកវិញក៏ថាបាន។ ដូចនេះអ្នកគួរមកស្វែងយល់ថាតើរឿងណាខ្លះដែលអ្នកធ្វើហើយ ថ្ងៃណាមួយវានាំផលអាក្រក់មកអ្នកវិញ?
១) ធ្វើការងារហួសហេតុពេក៖ វាជាបញ្ហាមួយដែលអ្នកគួរតែគិតដល់។ សម្រាប់អ្នកដែលធ្វើការ៧ថ្ងៃក្នុងមួយសប្ដាហ៍នោះ ត្រូវបានស្គាល់ថាជាអ្នកខិតខំធ្វើការខ្លាំងបំផុត។ វាអាចនាំបញ្ហាដល់អ្នកបានដូចជា ការតប់ប្រមល់ពីការងារដោយសារតែការខិតខំពេកដល់ថ្នាក់ភ្លេចគិតពីសុខភាព។ មិនត្រឹមតែប៉ុណ្ណោះ វាអាចធ្វើឲ្យអ្នកបែកបាក់មិត្តភាពរវាងមនុស្សជាទីស្រលាញ់ជុំវិញខ្លួនអ្នកផងដែរ។
២) ការកុហក៖ ដូចដែលអ្នកបានដឹងស្រាប់ហើយថាការកុហកអ្នកដទៃវាមិនមែនជារឿងមួយល្អឬចម្រើនដល់អ្នកនោះទេ។ ប៉ុន្តែសម្រាប់អ្នកចូលចិត្តកុហក វាបានក្លាយទៅជារឿងធម្មតាមួយទៅហើយសម្រាប់ពួកគេព្រោះវាជាទម្លាប់ទៅហើយ។ ប៉ុន្តែអ្នកមិនដឹងឡើយថាការកុហក នេះវាអាចដឹកនាំជីវិតអ្នកឲ្យធ្លាក់ក្នុងរណ្ដៅយ៉ាងណាខ្លះនោះទេ។
៣) ស្មោះត្រង់ពេក៖ ជាការពិតណាស់ មនុស្សមួយចំនួនតែងតែប្រកាន់យកភាពត្រឹមត្រូវនិងភាពស្មោះត្រង់ជាប់ខ្លួនជានិច្ច។ តែសម្រាប់ពេលខ្លះបើអ្នកស្មោះត្រង់ខ្លាំងពេកជាមួយមនុស្សដែលមិនល្អឬមនុស្សមានគំនិតអាក្រក់ចំពោះអ្នកថ្ងៃណាមួយពួកគេនឹងបកក្បាលមកធ្វើបាបអ្នកវិញក៏ថាបាន។
៤) ជួយគេច្រើនជាងខ្លួនឯង៖ ការជួយគេក៏មិនមែនជាអំពើអាក្រក់អីដែរ។ តែពេលខ្លះការជួយគេគឺត្រូវមើលផងដែរថាតើមនុស្សប្រភេទដែលអ្នក កំពុងជួយគឺជាមនុស្សប្រភេទណា? បើសិនគេជាមនុស្សដែលតែងតែខ្ជិលច្រអូសចង់ស្រួលមិនចេះខិតខំនោះ អ្នកគួរមិនបាច់ទៅចំណាយកម្លាំងអីទៅជួយគេនោះទេ៕
ដោយ៖ព្រំ សុវណ្ណកណ្ណិកា
