ឃ្លាកិរិយាសព្ទ (Phrasal verb) ទាំង៩ ដែលអ្នកត្រូវការដើម្បីនិយាយអំពីការប្រើប្រាស់គ្រឿងអេឡិចត្រូនិក
ឃ្លាកិរិយាសព្ទ (Phrasal verb) គឺជាការផ្សំផ្គុំគ្នានៃកិរិយាសព្ទ (Verb) និងធ្នាក់ (Preposition) ឬគុណកិរិយា (Adverb) ឬមានពេលខ្លះទាំងធ្នាក់និងគុណកិរិយា។ ខាងក្រោមនេះគឺជាឃ្លាកិរិយាសព្ទមួយចំនួនដែលនឹងមានប្រយោជន៍សម្រាប់អ្នកប្រើប្រាស់ក្នុងបរិបទគ្រឿងអេឡិចត្រូនិកនិងបច្ចេកវិទ្យា៖
១) To hook (something) up= នៅពេលអ្នកតភ្ជាប់កុំព្យូទ័ររបស់អ្នកឬឧបករណ៍អេឡិចត្រូនិកផ្សេងៗជាមួយនឹងខ្សែដោត ដើម្បីផ្ដល់ថាមពលឲ្យវា
២) To turn (something) on= ឃ្លាកិរិយាសព្ទនេះប្រើប្រាស់នៅពេលអ្នកបើកដំណើរការឧបករណ៍អេឡិចត្រូនិករបស់អ្នក។ បើអ្នកបិទឧបករណ៍អេឡិចត្រូនិកឲ្យបញ្ឈប់ដំណើរការណ៍ នោះអ្នកអាចប្រើឃ្លា To turn (something) off។
៣) To power (something) up= ឃ្លាកិរិយាសព្ទនេះមានអត្ថន័យស្រដៀងគ្នានឹងឃ្លាទី២ ប៉ុន្តែឃ្លានេះផ្ដោតសំខាន់ទៅលើសកម្មភាពដែលអ្នករៀបចំម៉ាស៊ីនឲ្យដំណើរការដោយផ្ដល់ថាមពលអគ្គិសនីដល់វា
៤) To power (something) down= ឃ្លាកិរិយាសព្ទនេះក៏មានអត្ថន័យប្រហាក់ប្រហែលនឹងឃ្លា To turn (something) off ដែរ តែវាផ្ដោតសំខាន់ទៅលើពេលដែលអ្នកបិទគ្រឿងម៉ាស៊ីនរបស់អ្នកឲ្យឈប់ដំណើរការទៅតាមលំដាប់លំដោយរបស់វា
៥) To boot (something) up= នៅពេលអ្នកបើកកុំព្យូទ័ររបស់អ្នក ហើយកុំព្យូទ័រអ្នកចាប់ផ្ដើមដំណើរការដើម្បីឲ្យអ្នកប្រើប្រាស់វា នោះអ្នកនឹងត្រូវការប្រើប្រាស់ឃ្លានេះដើម្បីរៀបរាប់ពីស្ថានភាពនេះ
៦) To log in/ To log on= ឃ្លានេះប្រើប្រាស់នៅពេលអ្នកតភ្ជាប់ចូលក្នុងបណ្ដាញNetworkណាមួយ តែបើអ្នកផ្ដាច់ចេញពីបណ្ដាញនោះវិញ នោះអ្នកអាចប្រើឃ្លាកិរិយាសព្ទ To log out/ To log off
៧) To put (something) in/ To key (something) in= នៅពេលអ្នកបញ្ចូលទិន្នន័យរបស់អ្នកក្នុងកុំព្យូទ័រ
៨) To pop up= ស្ថានភាពដែលអ្នកប្រើប្រាស់ឃ្លានេះគឺនៅពេលដែលសារ ឬការផ្សាយពាណិជ្ជកម្មបានលោតឡើងនៅលើអេក្រង់កុំព្យូទ័ររបស់អ្នក
៩) To back (something) up= អ្នកប្រើប្រាស់កុំព្យូទ័រមួយចំនួនបានចម្លងទិន្នន័យឬឯកសាររបស់ពួកគេដែលត្រូវបានស្តុកទុកក្នុងកុំព្យូទ័រទៅស្តុកទុកក្នុងប្រភពផ្សេងទៀត ដើម្បីការពារការបាត់បង់ទិន្នន័យទាំងនោះជាយថាហេតុ។ សកម្មភាពបែបនេះឯងគឺជាអត្ថន័យរបស់ឃ្លាមួយនេះ៕
ដោយ៖ ស្រីពៅ
