ការសិក្សាបានបង្ហាញឲ្យឃើញថា វិស្សមកាលធ្វើឲ្យយើងបង្កើននូវផលិតភាពនិងធ្វើឲ្យមានសុខភាពល្អ
អ្នកប្រហែលជាមានការងារច្រើន ដែលត្រូវធ្វើហើយអ្នកចង់បំពេញការងារនោះឲ្យអស់ពីសមត្ថភាព ប៉ុន្តែអ្នកក៏រក្សាសុខភាពរបស់អ្នកឲ្យបានល្អផងដែរ។ យ៉ាងណាក៏ដោយអ្នកគួរតែចំណាយពេលវេលាខ្លះក្នុងការសម្រាកលំហែកាយទើបខួរក្បាលរបស់អ្នក អាចបំពេញការងារបានល្អ។ ខាងក្រោមនេះគឺជាគុណប្រយោជន៍នៃការលំហែកាយនៅពេលវិស្សមកាល៖
១) ជួយបំបាត់នូវភាពតប់ប្រមល់៖ គ្មានអ្វីគួរឲ្យរំភើបជាងការដែលដើរកម្សាន្តនៅពេលដែលអ្នកមានភាពស្មុគស្មាញឬមិនសប្បាយចិត្តនោះទេ ព្រោះថាវាបានធ្វើឲ្យអ្នកមានអារម្មណ៍ល្អនិងស្រស់ស្រាយជាខ្លាំង ហើយអារម្មណ៍ដែលអ្នកតែងតែតប់ប្រមល់នោះក៏រសាយទៅតាមនឹងដែរ។
២) ជួយឲ្យអ្នកផ្លាស់ប្ដូរការគិត៖ ចំណុចមួយដ៏សំខាន់ក្នុងចំណោមក្នុងការដើរលំហែកាយពេលវិស្សមកាលគឺអ្នកយល់ពីខ្លួនឯងបានច្រើនជាងមុន។ អ្នកនឹងអាចរៀនអ្វីជាច្រើនក្នុងដំណើរកម្សាន្តនោះដែលវាអាចធ្វើឲ្យអ្នកផ្លាស់ប្ដូរបែបបទនៃការគិតរបស់អ្នក។
៣) ជំនួយសុខភាពផ្លូវចិត្ត៖ ការទៅកន្លែងប្លែកៗ ជួបមនុស្សថ្មីៗ ច្រើនធ្វើឲ្យមានការបែកគំនិត ហើយទទួលបានបទពិសោធន៍ថ្មីច្រើនពីមនុស្សទាំងនោះ។ វាបានធ្វើឲ្យយើងមានអារម្មណ៍ភ្លឺថ្លា និងស្រស់ស្រាយថែមមួយកម្រិត។
៤) មានភាពស្និទ្ធស្នាលជាមួយធម្មជាតិ៖ តើអ្នកធ្លាប់ចាប់អារម្មណ៍ដែរឬទេ ថាតើអ្នកមានអារម្មណ៍យ៉ាងណានៅពេលដែលអ្នកនៅកន្លែងមួយដែលស្ងប់ស្ងាត់តែពោរពេញទៅដោយបរិយាកាសដ៏គួរឲ្យទាក់ទាញដូចជានៅសមុទ្រ ឬនៅតំបន់ព្រៃភ្នំជាដើម? អារម្មណ៍ល្អបែបនោះគឺធ្វើឲ្យមិនអាចបំភ្លេចបានហើយតែងតែចង់ប៉ងទៅកន្លែងនោះម្ដងទៀត៕
ប្រែសម្រួល៖ តូច ម៉ាយ៉ារស្មី
ប្រភព៖ www.lifehack.org
