សំនួនវោហារស័ព្ទ(Idioms)អង់គ្លេសចំនួន១០ ដែលមានដើមកំណើតពី William Shakespeare (ភាគ២)
ជាង៤០០ឆ្នាំមកហើយ អ្នកនិពន្ធរឿងល្ខោននិងអ្នកកំណាព្យរបស់អង់គ្លេស William Shakespeare នៅតែមានឥទ្ធិពលល្បីល្បាញនៅក្នុងសម័យទំនើបយើងនេះ។ ក្នុងរយៈពេល២០ឆ្នាំដែលគាត់តែងនិពន្ធរឿងល្ខោន តួអង្គនិងព្រឹត្តិការណ៍រឿងរបស់គាត់បានរៀបរាប់ពីអារម្មណ៍របស់មនុស្សជាច្រើនបែបច្រើនយ៉ាង។ ឃ្លាជាច្រើនរបស់ភាសាអង់គ្លេស ត្រូវបានដកស្រង់ចេញពីស្នាដៃនិពន្ធរបស់គាត់ ហេតុនេះហើយទើបការសិក្សាយល់ពីឃ្លាមួយចំនួនរបស់គាត់មានសារសំខាន់ដល់ការបង្កើនជំនាញភាសាអង់គ្លេសរបស់អ្នកឲ្យឈានដល់កម្រិតខ្ពស់។ អត្ថបទទាក់ទង៖ សំនួនវោហារស័ព្ទ(Idioms)អង់គ្លេសចំនួន៨ ដែលមានដើមកំណើតពី William Shakespeare
១) The game is afoot= ប្រើប្រាស់ទៅលើផែនការឬការរៀបចំគ្រោងទុកជាមុនណាមួយបានចាប់ផ្ដើម
២) As luck would have it= សំដៅលើហេតុការណ៍អ្វីមួយដែលកើតឡើងដោយចៃដន្យ ដែលអាចវិជ្ជមានឬអវិជ្ជមាន
៣) With bated breath= អ្នកប្រើឃ្លានេះនៅពេលអ្នកធ្វើសកម្មភាពអ្វីមួយជាមួយនឹងអារម្មណ៍ភ័យព្រួយនិងសប្បាយត្រេកអរក្នុងពេលជាមួយគ្នា
៤) The be-all and end-all= ឃ្លានេះប្រើប្រាស់សម្រាប់ពណ៌នាពីមនុស្សឬអ្វីមួយដែលជាគោលដៅចុងក្រោយដែលអ្នកចង់សម្រេចឲ្យដល់ ឬជាគំរូដ៏ល្អឥតខ្ចោះមួយ
៥) Brave new world= សំដៅទៅលើស្ថានភាពថ្មីនិងវិជ្ជមាន ដែលច្រើនតែជាលទ្ធផលមកពីរបត់សង្គម ឬការផ្លាស់ប្ដូរធំៗណាមួយរបស់សង្គមមួយ
៦) Break the ice= ប្រើប្រាស់នៅក្នុងស្ថានភាពដែលអ្នកជួបមនុស្សដែលទើបស្គាល់គ្នាដំបូង ហើយអ្នកមានភាពខ្មាសអៀនក្នុងការនិយាយជាមួយគេ តែក្រោយមកអ្នកក៏បំបែករនាំងផ្ទាំងទឹកកកនេះដោយចាប់ផ្ដើមសន្ទនាជាមួយគេ
៧) A tower of strength= សំដៅលើមនុស្សណាម្នាក់ដែលរឹងមាំ ជាមនុស្សដែលអ្នកអាចទុកចិត្តនិងពឹងផ្អែកបាន ជាពិសេសក្នុងពេលជួបការលំបាក
៨) A wild-goose chase= ប្រើប្រាស់សម្រាប់ពណ៌នាអំពីស្ថានភាពណាដែលនរណាម្នាក់ល្ងង់ខ្លៅរត់តាមអ្វីមួយដែលមិនអាចទៅរួចនឹងទទួលបាន
៩) A fool's paradise= Idiomនេះបើបកប្រែឲ្យចំអត្ថន័យរបស់វាមានន័យថា «វិមានរបស់ជនល្ងីល្ងើ»។ ការប្រើប្រាស់ជាក់ស្ដែងរបស់វាក៏មិនខុសពីអត្ថន័យត្រង់របស់វាប៉ុន្មានដែរ។ ស្ថានភាពដែលអ្នកអាចនិយាយបានថាអ្វីមួយជា A fool's paradise គឺជាស្ថានភាពណាដែលនរណាម្នាក់គិតថាល្អដោយភ្លេចខ្លួនថាវានឹងមិនឋិតថេរ ឬវាអាចក្លាយជាអាក្រក់សម្រាប់ពួកគេវិញក៏ថាបាន។
១០) A world is your oyster= សំដៅទៅលើស្ថានភាពទាំងឡាយណាដែលពោរពេញទៅដោយឱកាសល្អៗជាច្រើន។ ឬម្យ៉ាងទៀត វាក៏អាចប្រើប្រាស់សម្រាប់សំដៅលើឱកាសដែលបើកឲ្យនរណាម្នាក់នៅពេលគេប្រថុយនឹងគ្រោះថ្នាក់ ឬមានលុយច្រើន ឬរៀនជំនាញថ្មីៗជាដើម៕ ដោយ៖ ស្រីពៅ
