មានដឹងអត់! រឿង៨យ៉ាងនេះហើយដែលចេះតែធ្វើឲ្យខ្លួនឯងមិនសប្បាយចិត្តពីមួយថ្ងៃទៅមួយថ្ងៃ
មនុស្សគ្រប់គ្នាតែងតែចង់សប្បាយ ដែលវាអាចជំរុញអោយយើងធ្វើអ្វីដែលយើងចង់ធ្វើឆាប់បានជោគជ័យ។ តែបច្ចុប្បន្នអ្វីៗហាក់ដូចជាផ្លាស់ប្ដូរដោយមនុស្សមួយចំនួនចំណាយពេលវេលាជាច្រើនក្នុងការស្វែងរកលុយទៅវិញ ដែលជាហេតុនាំអោយគេបង្កើននូវទម្លាប់ជាច្រើនធ្វើអោយខ្លួនឯងមិនសប្បាយចិត្ត។ ខាងក្រោមនេះជាទម្លាប់មិនល្អដែលតែងធ្វើអោយអ្នកមិនសប្បាយចិត្ត៖
១) មានគំនិតអវិជ្ជមានលើខ្លួនឯង៖ ការប្រណាំងប្រជែងគឺជាផ្នែកមួយនៃជីវិត ហើយអ្នកមិនអាចគេចផុតពីវាបាននោះទេទោះបីចង់ឬមិនចង់ក៏ដោយ។ មនុស្សមួយចំនួនចូលចិត្តគិតថាវាជាឱកាសបរាជ័យសម្រាប់ខ្លួនឯង ហើយក៏ចាប់ផ្ដើមគិតថាខ្លួនឯងមិនសាកសមនឹងធ្វើកិច្ចការងារទាំងនោះ។ ពេលនោះហើយកម្លាំងចិត្តអ្នកចាប់ផ្ដើមបាត់បង់ រួចសេចក្ដីទុក្ខក៏កើតមានឡើងអត់ ល្ហែ។
២) គិតថាអ្វីៗគឺឈរខាងអ្នករហូត៖ មនុស្សដែលគិតថាខ្លួនឯងល្អ និងត្រូវគ្រប់ពេលអាចនឹងទទួលរងវិបត្តិផ្លូវ ចិត្តខ្លាំងនៅពេលលទ្ធផលមិនបានដូចបំណង។ អ្វីដែលត្រឹមត្រូវនោះគឺថាអ្នកគួរព្យាយាមធ្វើអ្វីមួយអោយអស់ពីសមត្ថភាពរបស់ខ្លួនឯងសិន មិនថាលទ្ធផលយ៉ាងណាទេ អ្នកបានបង្ហាញសមត្ថភាពអស់ពីខ្លួនរួចហើយ។
៣) ផ្ទុកគំនុំគុំកួន៖ បើសិននរណាម្នាក់ធ្វើអ្វីខុសចំពោះអ្នក តើអ្នកចង់គុំកួនវារហូតឬយ៉ាងណាដែរ? មានតែអ្នកប៉ុណ្ណោះដែលទទួលរងនូវការឈឺចាប់មិនមែនមនុស្សដែលអ្នកស្អប់នោះមកឈឺចាប់ជាមួយអ្នកឡើយ។
៤) ភ្លេចការលេងសើច៖ អ្នកគួរមានពេលវេលាសប្បាយៗខ្លះសម្រាប់ខ្លួនឯង។ ដែលវាអាចបន្ថែមភាពសប្បាយរីករាយខ្លះទៅក្នុងជីវិតរបស់អ្នក។
៥) ខ្វល់ពីអ្នកដទៃច្រើនពេក៖ មនុស្សមួយចំនួនតែងគិតពីអ្នកដទៃច្រើនជាងគិតពីខ្លួនឯង។ រឿងខ្លះគួរតែជាអ្នកខ្លួនឯងទេ ដែលត្រូវកំណត់ថាធ្វើអ្វីនៅថ្ងៃមុខ។ ដូចនេះគឺមិនចាំបាច់ទទួលយកការបញ្ចេញមតិពីអ្នកដទៃឡើយ។
៦) មិនហ៊ានប្រថុយ៖ អ្វីដែលគួរអោយភ័យខ្លាចនោះគឺថាអ្នកមិនហ៊ានទទួលយកអ្វីដែលថ្មី។ ប្រសិនបើអ្នកនៅតែមានអារម្មណ៍ថាខ្លាចក្នុងការធ្វើអ្វីមួយ អ្នកនឹងមិនអាចទទួលបានជោគជ័យឬសប្បាយចិត្តទៅនឹងលទ្ធផលទាំងនោះទេ។
៧) ស្ដីបន្ទោសអ្នកដទៃ៖ មនុស្សដែលស្អប់ភាពរីករាយតែងតែគិតថាកំហុសជាច្រើនគឺជារបស់អ្នកដទៃ ។ ពួកគេតែងតែបន្ទោសអ្នកជុំវិញខ្លួនអំពីបញ្ហានេះបញ្ហានោះជារឿយៗ។
៨) គិតម៉ត់ចត់ពេក៖ ភាគច្រើនអ្នកដែលធ្វើអ្វីម៉ត់ចត់ពេកគឺមិនសូវជាសប្បាយចិត្តទេ។ ពេលខ្លះអ្នកអាចកើតទុក្ខជាមួយបញ្ហាតូចៗក៏មាន៕
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
