នាយិកាក្រុមហ៊ុនថែទាំសុខភាពចល័ត ម៉ាច់៖ យុវជនគួរតែកុំអន្ទះសាក្នុងការចាប់ផ្ដើមអាជីវកម្មខ្លាំងពេក
ធ្វើជាម្ចាស់អាជីវកម្ម ឬក្លាយជាសហគ្រិនម្នាក់គឺជាក្ដីស្រម៉ៃរបស់មនុស្សភាគច្រើន ជាពិសេសចំពោះយុវជនខ្មែរមួយចំនួននាពេលបច្ចុប្បន្នហាក់ដូចជាចាប់អារម្មណ៍ និងពុះកញ្ជ្រោលខ្លាំងក្នុងការប្រឡូកលើវិស័យនេះពិសេសនៅពេលដែលពួកគាត់មើលឃើញពីភាពជោគជ័យជាហូរហែរបស់សហគ្រិន។ ប៉ុន្តែប្រសិនបើលោកអ្នកស្វែងយល់ឲ្យកាន់តែស៊ីជម្រៅចំពោះការធ្វើអាជីវកម្ម នោះលោកអ្នកនឹងដឹងថាអាជីវកម្មមិនមែនជារឿងងាយស្រួល ហើយសហគ្រិនជោគជ័យក៏មិនមែនកើតឡើងដោយភាពចៃដន្យនោះដែរ។
ជាមួយគ្នានេះដែរលោកស្រី ឌី ផនភិរម្យ នាយិកានៃក្រុមហ៊ុនថែទាំសុខភាពចល័តម៉ាច់ (MUCHs) បានលើកឡើងថា បច្ចុប្បន្នលោកស្រីមើលឃើញយុវជនខ្មែរយើងភាគច្រើននៅពេលដែលពួកគាត់រៀនចប់មហាវិទ្យាល័យភ្លាមពួកគាត់ក៏ចាប់ផ្ដើមបង្កើតអាជីវកម្ម ដែលមើលទៅហាក់ដូចជាពួកគាត់អន្ទះសាក្នុងការចង់មាន។ ប៉ុន្តែសម្រាប់លោកស្រីក្នុងនាមជាសហគ្រិនដែលមានបទពិសោធន៍ធ្វើការឲ្យគេយូរឆ្នាំទើបបើកអាជីវកម្មខ្លួនឯង លោកស្រីចង់ឲ្យយុវជនគួរតែកុំអន្ទះសាលើការចាប់ផ្ដើមអាជីវកម្មខ្លាំងពេក។
សហគ្រិនស្រ្តីដែលប្រែក្លាយអាជីវកម្មដែលមានត្រឹមបុគ្គលិក២នាក់មកជាក្រុមហ៊ុនមួយមានបុគ្គលិកបម្រើការជាង៣០នាក់រូបនេះបានបន្តថា យុវជនគួរតែចំណាយពេលរៀនរកចំណេះដឹងឲ្យបានច្រើនជាមុនសិន ទោះបីជាពួកគាត់រៀនធ្វើការងារនៅតាមបណ្ដាស្ថាប័ននានាគាត់គួរតែរៀនធ្វើជាម្ចាស់ រៀនយល់ពីលំនឹងនៃសហគ្រិនភាពជាមុនសិន ដូច្នេះនៅពេលដែលគាត់មានបទពិសោធន៍គ្រប់គ្រាន់ហើយ ពួកគាត់នឹងអាចចេញទៅចាប់ផ្ដើមអាជីវកម្មបានដោយមិនមានភាពតានតឹង។
លោកស្រី ភិរម្យ ប្រាប់បន្តថា នៅពេលធ្វើការនៅតាមក្រុមហ៊ុនឬស្ថាប័ននានាយើងត្រូវតាំងអាម្មណ៍ខ្លួនឯងថា យើងគឺជាម្ចាស់ក្រុមហ៊ុនឬម្ចាស់ស្ថាប័ននេះ នោះយើងនឹងអាចពង្រឹងខ្លួនឯងឲ្យមានភាពជាអ្នកដឹកនាំ។ ម្យ៉ាងវិញទៀតវានិងជួយពង្រឹងយើងឲ្យដឹងថា បើស្ថិតនៅក្នុងស្ថានភាពបែបនេះតើយើងនឹងដោះស្រាយវាដោយរបៀបណា តើយើងនឹងចាប់ផ្ដើមធ្វើវាយ៉ាងដូចម្ដេចបើនៅក្នុងស្ថានភាពនេះ។
សហគ្រិនស្រ្តីលោកស្រី ឌី ផនភិរម្យ៖ "មិនមែនគ្មានលុយធ្វើអាជីវកម្មមិនកើតនោះទេ សំខាន់គឺមានចំណេះសិន"៕
អត្ថបទដោយ៖ ជួប ស្រីរ័ត្ន
