គន្លឹះចំនួន ៧ ចំណុចជួយអ្នកកសាងទំនាក់ទំនងល្អជាមួយ Freelancer របស់អ្នក
ក្នុងនាមអ្នកជាម្ចាស់អាជីវកម្មតូចមួយ មានអត្ថប្រយោជន៍ច្រើននៅពេលដែលអ្នកធ្វើការងារជាមួយ freelancers។ អ្នកនឹងទទួលបានមកវិញនូវអ្នកជំនាញ ដោយមិនចាំបាច់ចំណាយថ្លៃខ្ពស់សម្រាប់កុងត្រាជួលក្នុងការងារពេញម៉ោងរបស់គាត់។ អ្នកក៏អាចធ្វើការងាជាមួយមនុស្សស្ទើរជុំវិញពិភពលោក ហើយអាចផ្តល់ប្រយោជន៍ដល់អ្នកយ៉ាងច្រើនព្រោះគេមានជំនាញសំខាន់ដែលធ្វើឲ្យអាជីវកម្មអ្នកដំណើរការបានល្អ និងទាក់ទាញអតិថិជន។
ទោះជាយ៉ាងណាក៏ដោយវាមិនងាយស្រួលពេកទេ អ្នកត្រូវជ្រើសរើស freelancers ឲ្យបានត្រឹមត្រូវដើម្បីធ្វើការជាមួយអ្នក។ ជំហានទាំង ៧ ខាងក្រោមនេះនឹងជួយអ្នកពីវិធីកសាងទំនាក់ទំនងជាមួយ freelancers បានល្អ៖
១) ធ្វើការគោរពគ្នាទៅវិញទៅមក
ដំបូងបំផុត បើអ្នកជួល freelancers ឲ្យជួយក្នុងអាជីវកម្មខ្នាតតូចរបស់អ្នក អ្វីដែលអ្នកត្រូវផ្តល់ឲ្យគេគឺត្រូវធ្វើការគោរពនិងឲ្យតម្លៃដល់គេ ព្រោះអ្នកទិញសេវាកម្មពី freelancers ហើយ freelancers ជាអ្នកផ្តល់ជំនាញ និងធ្វើការងារដើម្បីឲ្យអាជីវកម្មអ្នកដំណើរការដូចគ្នា។ បង្កើនភាពស្និទ្ធស្នាលប្រៀបដូចជាដៃគូដែលកំពុងកសាងអាជីវកម្មរួមគ្នាមួយ បើអ្នកអភិវឌ្ឍទំនាក់ទំនងរវាងអ្នកនឹង freelancers បានរឹងម៉ាំ ភាពជោគជ័យសម្រាប់អាជីវកម្មនឹងកើតមានចំពោះអ្នក។
២) ទំនាក់ទំនងដោយផ្ទាល់ជាមួយ freelancers
Freelancers ចូលចិត្តការភ្ជាប់ទំនាក់ទំនងដោយផ្ទាល់និងច្បាស់លាស់មួយជាមួយម្ចាស់អាជីវកម្ម ព្រោះវាជួយឲ្យការងាររបស់ពួកគេមានភាពងាយស្រួលនិងត្រឹមត្រូវល្អ សម្រេចបានផលវិជ្ជាមាន និងទាន់ពេលវេលា។ សាកគិតមើលថាបើនៅសុខៗអ្នកផ្លាស់ប្តូរចិត្តក្នុងការងារណាមួយដោយមិនបានទាក់ទងឬផ្តល់ដំណឹងដល់ freelancers ទាន់ពេលទេ តើឲ្យគាត់ធ្វើយ៉ាងណាទើបអាចបត់បែនការងារទាន់តម្រូវការរបស់អ្នក? មួយវិញទៀតគាត់អាចជាអ្នកធ្វើឲ្យកិត្តិនាមរបស់អ្នកល្អប្រសើរ ក៏អាចធ្វើឲ្យកេរ្តិ៍ឈ្មោះអ្នកអាក្រក់ដូចគ្នា ព្រោះបើអ្នកច្បាស់លាស់ជាមួយគាត់ គាត់អាចជាអ្នកផ្សព្វផ្សាយប្រយោលមួយដល់អតិថិជន តែបើមិនដូច្នោះទេគាត់ក៏ជាអ្នកដែលហាមឃាត់មិនឲ្យមានអតិថិជនគាំទ្រអាជីវកម្មអ្នកដែរ។
៣) កាលវិភាគការងារច្បាស់លាស់មួយ
ផ្នែកមួយដែលធ្វើឲ្យទំនាក់ទំនងរវាងអ្នកនិង freelancers បានល្អគឺ ការរៀបចំកាលវិភាគការងារបានត្រឹមត្រូវ ដោយសារ freelancers អាចនឹងធ្វើការងារជាមួយអ្នកបីទៅបួនម៉ោង ឬលើសពីនេះ។ គេត្រូវធ្វើការងារឲ្យអ្នក តែកុំភ្លេចថា គេក៏មានពេលវេលាសម្រាប់ការងារផ្ទាល់ខ្លួនគេដែរ។
៤) ប្រព័ន្ធការងារល្អ
ត្រូវប្រាកដថាកាងាររបស់អ្នកត្រូវមានរៀបចំប្រព័ន្ធគ្រប់គ្រង ឬប្រព័ន្ធអាជីវកម្មល្អដើម្បីឲ្យ freelancers ងាយស្រួលក្នុងការប្រើប្រាស់ ព្រោះពួកគេមិនបាននៅក្បែរអ្នកដូចបុគ្គលិកពេញម៉ោងទេ។ បើគាត់ធ្វើការពីចម្ងាយ ត្រូវធានាគាត់អាចផ្ញើរអាចឯកសារដែលគាត់ធ្វើរួចរាល់មកឲ្យអ្នកទាន់ពេលវេលា។
៥) លើកទឹកចិត្តនិងផ្តល់មតិត្រលប់
ដោយសារ freelancers មិនបាននៅក្នុងការិយាល័យធ្វើការងារជាមួយអ្នកគ្រប់ពេល ដូច្នេះគាត់ត្រូវការដឹងពីការងារដែលគាត់បានធ្វើ ថាតើត្រូវបានប៉ុណ្ណា ហើយមានកំហុសប៉ុណ្ណា។ ត្រូវប្រាកដថា អ្នកបានផ្តល់ជាមតិត្រលប់ទៅឲ្យគាត់ដឹងពីកំហុស ភាពខ្វះចន្លោះ ចំនុចដែលអ្នកត្រូវការបន្ថែមពីការងាររបស់គាត់។ គាត់ត្រូវការការលើកទឹកចិត្តពីអ្នកដែលជាម្ចាស់អាជីវកម្មព្រោះអាចបង្ហាញថាអ្នកកំពុងយកចិត្តទុកដាក់ជាមួយពួកគាត់មិនមែនជួលដាច់ថ្លៃទេ។
៦) ទទួលយកការរិះគន់
ពេលខ្លះអ្នកអាចធ្វើការរិះគន់លើចំនុចមួយចំនួនដល់ freelancers ដោយហេតុចង់បានភាពល្អឥតខ្ចោះសម្រាប់ការងារអ្នក តែក៏ត្រូវចាំថាគាត់ជាអ្នកជំនាញដែលអ្នកជួលដើម្បីធ្វើឲ្យអាជីវកម្មអ្នកដំណើរការបានល្អ។ មានចំនុចមួយចំនួនគាត់អាចនឹងដឹងជាងអ្នកក្នុងការធ្វើឲ្យការងារមួយនេះបានល្អដូចនេះអ្នកគួរទទួលយកការរិះគន់ និងមតិកែលម្អខ្លះពីគាត់ដូចគ្នា។
៧) អ្នកត្រូវស្គាល់មនុស្សឲ្យបានច្បាស់
ត្រូវចាំថា freelancers ម្នាក់ៗមានជំនាញតាមផ្នែកផ្សេងៗរបស់គេ បើអ្នកអាចស្វែងរក freelancers ល្អនិងត្រឹមត្រូវតាមជំនាញអ្នកនឹងមិនខាតប្រាក់ច្រើនដើម្បីជួលមនុស្សសម្រាប់អាជីវកម្មរបស់អ្នកឡើយ។ ដូចនេះអ្នកគួរកសាងទំនាក់ទំនងជាមួយ freelancers ឲ្យបានរឹងម៉ាំដើម្បីទទួលបានអ្វីដែលអ្នកចង់ឲ្យពួកគេផ្តល់ត្រលប់មកឲ្យអ្នក៕
ដោយ៖ យ៉ាយ៉ា
ប្រភព៖ Business Blog
