របៀបរបបទាំង ៤ នៃការទាក់ទងគ្នានៅកន្លែងធ្វើការក្នុងសម័យថ្មីដ៏ជោគជ័យ
មកដល់សម័យនេះហើយ អ្វីៗ ទាំងអស់គឺត្រូវតែផ្លាស់ប្ដូរហើយ។ ភាពចាស់កំរិល រួមមានការគ្រប់គ្រង និងការអនុវត្តការងារនានាដែលធ្វើការហត់ហើយមិនផ្ដល់ប្រយោជន៍ច្រើនគឺគួរតែបោះបង់ចោល។ ងាកមកមើលការប្រាស្រ័យទាក់ទងរវាងគ្នា នៅកន្លែងធ្វើការ នាសម័យថ្មីវិញ។ តើគេធ្វើបែបណាខ្លះ?
១) បង្ហាញក្ដីគោរព៖ ការគោរពពេលវេលា និង គោរពនរណាម្នាក់ គឺពិតជាសំខាន់ណាស់។ ដូច្នេះហើយ ក្នុងសម័យថ្មីនេះ អ្នកគួរតែប្រើប្រាស់ពាក្យសម្ដី និងអាកប្បកិរិយា គួរឲ្យគោរពទៅវិញទៅមក ទើបការងារជោគជ័យទៅតាមនោះ ដែរ។
២) ប្រឹងស្ដាប់អ្នកដទៃ៖ អ្នក នឹងមិនចេះអីទេ បើអ្នកប្រឹងនិយាយតែឯងហើយគ្មានស្ដាប់នរណានោះ។ ក្នុងសម័យនេះ គឺទាមទារអ្នកស្ដាប់ឲ្យបានច្រើនជាងនិយាយ។ ការស្ដាប់នេះ មិនត្រឹមតែបង្ហាញក្ដីគោរពទៅមិត្តរួមការងារទេ តែថែមទាំងបង្កើនចំណេះដឹងដល់ខ្លួនទៀត។
៣) បើកចិត្តទូលាយដល់គេឯង៖ វាគឺជាជំនាញមួយដ៏មានសារៈសំខាន់ សម្រាប់ការប្រាស្រ័យទាក់ទងគ្នានៅកន្លែងធ្វើការ។ កាលណាមានបុគ្គលិកថ្មី ឬក៏បុគ្គលិកថ្នាក់ក្រោមទើបតែចូលបម្រើការងារ អ្នកគួរតែរៀនបើកចិត្តឲ្យទូលាយ ក្នុងការបង្រៀនពួកគេ និងផ្ដល់យោបល់រួម ទាំងចែករំលែកបទពិសោធន៍ដែលមានទៅពួកគេ ដោយចិត្តទូលាយបំផុត។
៤) រៀនទទួលមតិយោបល់អ្នកដទៃ ៖ មានតែអ្នកគិតថាខ្លួនឯងល្អគ្រប់យ៉ាងទេ ដែលមិនចង់ទទួលយោបល់ពីអ្នកដទៃ នោះ។ តែលើលោកនេះគ្មានអ្នកណាល្អឥតខ្ចោះឡើយ ទោះបីជាព្រះក៏ដោយ។ ជាពិសេសក្នុងប្រព័ន្ធការងារ បុគ្គលិកគួរតែមានគំនិតនេះក្នុងខ្លួន បើសិនជាចង់បង្រៀនខ្លួនឯង ឲ្យល្អទៅល្អទៅនោះ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
