គ្រឹះគំនិតដ៏មានតម្លៃចំនួន ២២ ដែលគ្រប់សហគ្រិនគ្រប់រូបត្រូវតែដឹង
នៅពេលអ្នកគិតបើកមុខជំនួញរកស៊ីណាមួយនោះ វាហាក់ដូចជាដំណើរទៅដោយគ្មានឧបសគ្គ។ ក៏ប៉ុន្តែនៅ ពេលដែលអ្នកចាប់ផ្តើមអនុវត្តផ្ទាល់ មានបញ្ហាជាច្រើននឹងកើតមានឡើងផ្ទុយពីនេះ។ នេះជាមូលហេតុមួយដែលអត្ថបទនេះបានឆ្កឹះយកមូលដ្ឋានគំនិតសំខាន់ៗចំនួន ២២ សម្រាប់ប្រិយមិត្តជាពិសេសសហគ្រិនគ្រប់រូបស្វែងយល់ឲ្យបានច្បាស់នៅពេលចេញរកស៊ី។
១. វិធីល្អបំផុតដើម្បីទស្សន៍ទាយពីអនាគតបាន គឺត្រូវបង្កើតវាឡើងពីព្រោះថា ពិភពលោកកាន់តែស្មុគស្មាញ។ អ្នកមិនអាចគ្រប់គ្រងពិភពលោកតែម្នាក់ឯងបានឡើយ តែអ្នកអាចគ្រប់គ្រងខ្លួនឯងបានឲ្យស្របទៅនឹងហេតុការណ៍ដែលនឹងកើតមានឡើង។
២. ការសម្រេចចិត្តដ៏សំខាន់បំផុតដែលអ្នកអាចធ្វើបានគឺថា តើអ្នកចង់ចំណាយពេលរបស់អ្នកទៅលើអ្វី? អ្នកមិនអាចចំណាយពេលទៅធ្វើអ្វីៗគ្រប់បែបយ៉ាងបានទេ។ អ្នកត្រូវផ្ដោតទៅលើអ្វីដែលសំខាន់ និងយល់ថាចាំបាច់សម្រាប់អ្នក។
៣. ប្រសិនបើអ្នកចង់ក្លាយជាសហគ្រិនជោគជ័យ អ្នកនឹងមិនមានតុល្យភាពរវាងការងារ និងជីវិតគ្រួសាររបស់អ្នកនោះឡើយ។ អ្នកត្រូវលះបង់ពេលច្រើនណាស់ជាមួយនឹងការងារ ហេតុដូច្នេះអ្នកនឹងមានពេលតិចតួចប៉ុណ្ណោះសម្រាប់មនុស្សជាទីស្រឡាញ់របស់អ្នក។
៤. សហគ្រិនដែលល្អបំផុតមិនមែនជាមនុស្សដែលមានគំនិតអស្ចារ្យនោះទេ។ ប៉ុន្តែគឺជាសហគ្រិនដែលស្គាល់ពីតម្រូវការ នៅលើទីផ្សារ និងអាចដោះស្រាយបញ្ហាអតិថិជនបាន។
៥. ចំណុចមួយដែលរាល់សហគ្រិនជោគជ័យទាំងអស់មានដូចគ្នានោះគឺថា ប្ដេជ្ញាចិត្តធ្វើឲ្យគំនិតរបស់ពួកគេក្លាយជាការពិតបានតាមរយៈការលើកទឹកចិត្ត ផ្ដោតអារម្មណ៍ ក្តីសង្ឃឹម ដើមទុន ប្រើប្រាស់ជំនាញទីផ្សារ ការសហការ និងគំនិតដ៏ច្នៃប្រឌិតជាដើម។
៦. ការអនុវត្តឲ្យបានច្រើនបំផុតតាមតែអាចធ្វើបាន គឺជាវិធីល្អបំផុតរបស់សហគ្រិនដើម្បីអាចសម្រេចគោលដៅបាន។ បានត្រឹមតែគិត មិនអាចឲ្យអ្នកក្លាយជាសហគ្រិនបានទេ។
៧. ចង់ធ្វើជំនួញ អ្នកត្រូវចាប់ផ្តើមពីតូចទៅមុនតាមផែនការរបស់អ្នក។ បន្ទាប់មកធ្វើតាមជំហាននីមួយៗដែលមាននៅក្នុងផែនការរបស់អ្នកឆ្ពោះទៅកាន់គោលដៅខាងមុខ។
៨. បើអ្នកចង់កសាងក្រុមហ៊ុនជោគជ័យមួយ អ្នកត្រូវតែបោះបង់ការគ្រប់គ្រងមួយដែលមានលក្ខណៈបែបប្រមូលផ្ដុំ។ អ្នកមិនត្រូវគ្រប់គ្រងក្រុមហ៊ុនតែម្នាក់ឯងបានឡើយ។ អ្នកត្រូវមានទំនុកចិត្ត ចេះចែករំលែក ផ្ទេរការងារ និងការទទួលខុសត្រូវទៅកាន់មនុស្សក្រោមបង្គាប់តាមតែអាចធ្វើបាន។
៩. ឈប់ធ្វើការងារអ្វីដែលអ្នកមិនស្រលាញ់ ការងារដែលជាចំណុចខ្សោយ ឬមិនមែនជាជំនាញរបស់អ្នក។ រកឲ្យឃើញចំណុចខ្លាំងរបស់អ្នក ហើយធ្វើការងារនោះ ទើបអ្នកអាចជោគជ័យបានយូរអង្វែងបាន។
១០. អ្នកត្រូវប្រាកដថា រាល់ឧបសគ្គដែលកើតមានឡើងចំពោះអ្នក អ្នកត្រូវធ្វើឲ្យក្លាយជាទ្រព្យសម្រាប់អ្នក។ កុំគិតថា ឧបសគ្គគឺជាគ្រោះធ្វើឲ្យអ្នកបរាជ័យ។ ត្រូវគិតថា ឧបសគ្គគឺលាភ និងឱកាសដែលធ្វើឲ្យអ្នកកាន់តែអភិវឌ្ឍខ្លួនខ្លាំងឡើង។
១១. អ្វីដែលអ្នកត្រូវដឹងអំពីទីផ្សារគឺសាមញ្ញនោះទេ។ អ្នកត្រូវដឹងថា អ្នកណាជាអតិថិជនរបស់អ្នក? តើអ្នកមានអ្វីត្រូវលក់ឲ្យពួកគេ? តើពួកគេត្រូវការអ្វី?
១២. នេះជាការស្រាវជ្រាវទីផ្សារតែមួយគត់ដែលអ្នកត្រូវការ គឺយកផលិតផលរបស់អ្នកចេញទៅលក់នៅលើទីផ្សារហើយរង់ចាំមើលថា តើវាលក់ដាច់ ឬអត់?
១៣. អ្នកត្រូវកំណត់ឲ្យបានថា តើអ្នកនឹងប្រមូលលុយដែលអតិថិជនជំពាក់ដោយរបៀបណា? សហគ្រិនច្រើនណាស់ដែលមិនបានគិតដល់ចំណុចនេះមុនពេលចេញរកស៊ី ហើយទីបំផុតអ្នកក៏អាចយល់ថា ពាក្យថា "ដួលរលំ” កើតឡើងដោយសារអ្វី?
១៤. នៅពេលអ្នកចេញទៅប្រកួតប្រជែងនៅលើទីផ្សារ អ្នកត្រូវមានក្រុមការងារប្រឹក្សាយោបល់ដ៏ឆ្លាតវៃមួយ។ អ្នកត្រូវការក្រុមការងារនេះដើម្បីជួយផ្តល់គំនិត យុទ្ធសាស្ត្រ ឬវិធីនានាធ្វើយ៉ាងណាឲ្យអតិថិជននិយាយពីក្រុមហ៊ុនរបស់អ្នកឲ្យកាន់តែ ច្រើន និងផ្តល់មតិរិះគន់ស្ថាបនាមកវិញប្រកបដោយភាពស្មោះត្រង់។
១៥. ប្រសិនបើអ្នកចង់ធ្វើដំណើរបានលឿន និងប្រសើរជាងមុនអ្នកត្រូវបង្កើតបញ្ជីត្រួតពិនិត្យដ៏សុក្រឹតត្រឹមត្រូវមួយ។ បញ្ជីនេះគឺជាមធ្យោបាយដ៏ល្អបំផុតមួយដើម្បីធានាថា អ្នកមិនបានភ្លេចអ្វីទាំងអស់ដែលអ្នកត្រូវធ្វើនៅក្នុងក្រុមហ៊ុន និងត្រូវបានកត់ត្រាទុកយ៉ាងត្រឹមត្រូវបំផុត។
១៦. ជាសហគ្រិន អ្នកត្រូវចេះលើកទឹកចិត្តខ្លួនឯង ព្រោះឧបសគ្គរាប់រយជំពូកនឹងចូលមកដល់ជាមិនខាន។
១៧. ប្រសិនបើសុនកមិនចូលចិត្តស៊ីអាហារសម្រាប់សុនក មានន័យថា អាហារនោះមានបញ្ហា។ អ្នកមិនអាចកំណត់បានផលិតផលល្អថា មានលក្ខណៈបែបណានោះទេ។ មានតែអតិថិជនរបស់អ្នកប៉ុណ្ណោះដែលដឹង ហើយប្រសិនបើអ្នកមិនចូលចិត្តផលិតផលរបស់អ្នក មានន័យថា ផលិតផលរបស់អ្នកមិនល្អ។ និយាយម្យ៉ាងទៀតគឺថា អតិថិជនគឺជាស្តេច។
១៨. ប្រសិនបើអតិថិជនមិនចូលចិត្តផលិតផលរបស់អ្នក ការប្រមូសិនបញ្ចុះតម្លៃ ឬទីតាំងអាជីវកម្មល្អមិនអាចជួយអ្វី បានច្រើនដល់អ្នកនោះទេ។ ដូចនេះ ផលិតផលរបស់ក្រុមហ៊ុនដែលមិនសូវល្បី នៅតែអាចយកឈ្នះអ្នកបាន។ ជម្រើសដ៏ល្អ គឺធ្វើឲ្យវាមានគុណភាពយ៉ាងទាក់ទាញតាមវិធីសាស្ត្រថ្មី ជាជាងបន្តលក់ទាំងបង្ខំនៅក្នុងតម្លៃទាប។
១៩. ប្រសិនបើអ្នកបរាជ័យ គួរតែបរាជ័យឲ្យបានឆាប់ និងតិចបំផុត។ អ្នកត្រូវតែចាប់ផ្តើមជំហានមួយៗពីតូចទៅមុន ហើយតម្រង់ឆ្ពោះទៅកាន់គោលដៅរបស់អ្នក។ សូមចាំថា ត្រូវផ្តោតលើគោលដៅដែលអ្នកចង់ទៅ ហើយដើរទៅមុខមិនត្រូវងាកចេញពីផ្លូវរបស់អ្នកនោះឡើយ។
២០. កំហុសនឹងកើតឡើងនៅពេលអ្នកក្លាយជាសហគ្រិន។ ប៉ុន្តែនោះគឺជារឿងធម្មតានោះទេ។ តាមការពិត កំហុសនោះបានប្រាប់អ្នកយ៉ាងច្បាស់ថា អ្វីដែលអ្នកធ្វើពិតជាមិនត្រឹមត្រូវនោះឡើយ។ អ្វីដែលសំខាន់ អ្នកត្រូវរៀនពីកំហុសនោះ ហើយធ្វើវាឲ្យបានល្អជាងមុន។
២១. ភាពច្នៃប្រឌិត និងការបង្កើតថ្មី ត្រូវតែមានទំនាក់ទំនងជាមួយនឹងគោលបំណងអាជីវកម្មរបស់អ្នក។ អាជីវកម្មដែលមានភាពច្នៃប្រឌិត គឺពិតជា អាជីវកម្មដ៏អស្ចារ្យបំផុតមួយ។ ប៉ុន្តែការបង្កើតថ្មីដែលមិនអាចរកលុយមកឲ្យអ្នកបាន គឺវាគ្រាន់តែជាចំណង់ចំណូលចិត្តតែប៉ុណ្ណោះ។ វាមិនមែនជាគំនិតដែលយកមកអនុវត្តបាននៅក្នុងអាជីវកម្មនោះឡើយ។
២២. អ្នកត្រូវអភិវឌ្ឍជាលំដាប់ និងបន្តដំណើរទៅមុខទៀត បើទោះបីជាអ្នកជោគជ័យក៏ដោយ។ អ្នកមិន អាចនៅមួយកន្លែងនោះឡើយ បើមិនដូច្នេះទេ អ្នកនឹងស្លាប់៕
ប្រភព៖ Entrepreneur
