ហេតុអ្វីចង់រកស៊ីជោគជ័យបាន ទាល់តែហ៊ានប្រថុយខាតសិន?
មានសហគ្រិនជោគជ័យច្រើនណាស់ដែលនិយាយថា ទាល់តែហ៊ាន ទើបជោគជ័យបាន។ កាលណាអ្នកមិនហ៊ាន ខាត មិនហ៊ានប្រឈមមុខនឹងគ្រោះថ្នាក់ នោះអ្នកនឹងមិនអាចឈានជើងទៅរកវគ្គបន្តបានឡើយ។ មានន័យថាអ្នកនឹងត្រូវចុះចាញ់ត្រឹមវគ្គនេះ ហើយត្រលប់ទៅវិញតែម្ដង។
ទៀតសោត បើចង់រកស៊ីឲ្យបានយូរហើយចំណេញបានច្រើន លុះត្រាអ្នកហ៊ានប្រថុយខាតសិន។ តើមានមូលហេតុអ្វីដែលត្រូវធ្វើបែបនេះ?
១) អ្នកនឹងមិនដឹងបើមិនសាកល្បង
បើសិនអ្នកគ្រាន់តែឃើញនិងស្ដាប់តៗ គ្នាពីការបរាជ័យនោះ អ្នកគ្រាន់តែចាំមួយភ្លែតប៉ុណ្ណោះ។ តែបើអ្នកសាកល្បង ខ្លួនឯងតែម្ដង អ្នកនឹងចងចាំហើយចាប់ផ្ដើមយល់ពីរបៀបរកស៊ីច្បាស់ភ្នែកតែម្ដង ថាការរកស៊ីគឺវាមានគ្រោះថ្នាក់បែបនេះឯង។
២) អ្នកនឹងក្លាយជាមនុស្សពូកែប្រកួតប្រជែងជាងគេ
វាដល់ពេលដែលអ្នកត្រូវបង្ហាញសក្ដានុពល ភាពដែលខ្លួនមានទៅគេឯងហើយ។ ការប្រថុយគ្រោះថ្នាក់នេះ វានឹងបង្រៀនអ្នកឲ្យខ្លាចការចាញ់ ហើយគិតតែពីចង់ប្រកួតប្រជែងគេ ដើម្បីយកឈ្នះកុំឲ្យមានការខាតបង់កើតឡើងជាលើកទី២ទៀត។
៣) វាមិនមែនជាការខាតបង់អីទេ តែវាជាផ្នែកមួយនៃអ្នករកស៊ី
វានឹងបង្រៀនអ្នកកុំឲ្យខ្លាចការខាតបង់ ពីព្រោះ ការខាតបង់គឺជាផ្នែកនៃការរកស៊ីទៅហើយ។ ទោះចង់ឬមិនចង់ អ្នកត្រូវតែជួបវា។ តែវាស្ថិតលើអ្នក ទៅវិញទេ ថាតើអ្នកគ្រប់គ្រងលើស្ថានការណ៍នោះដោយរបៀបណា?
៤) វានឹងខាតកាន់តែខ្លាំង បើអ្នកមិនចង់ប្រថុយ
តាមពិតទៅការខាតបង់ធំសម្រាប់អ្នករកស៊ីនោះគឺ ការគេចវេះមិនចង់ប្រថុយប្រថាន។ ដូចបញ្ជាក់ខាងលើដែរ ថាការខាតបង់គឺជាផ្នែកមួយនៃការរកស៊ីទៅហើយ។ តើមានបុគ្គលណាដែលអាចគេចបាន? ការខាតបង់ធំបំផុតសម្រាប់អ្នក រកស៊ីគឺ អ្នកមិនចង់ប្រថុយ។ កាលណាអ្នកគេចវះបែបនេះ វាប្រៀបបាននឹងអ្នកចង់រំលងភ្នំមួយដែលសម្បូរទៅដោយរ៉ែមាសនៅទីនោះអីចឹង។ ទោះបីវាលំបាកក្នុងការឆ្លងកាត់បន្តិចមែន តែអ្នកបានមកវិញនូវលទ្ធផលជោគជ័យទៅថ្ងៃមុខ។ ដូចនេះអ្នកត្រូវហ៊ានឆ្លងជ្រោះ ហ៊ានដើរលើភ្លើង និងហ៊ានសម្រេចចិត្តឲ្យបានរហ័សដោយភាពឆ្លាតវៃ ទើបអ្នកអាចដឹកនាំរបររកស៊ីអ្នកឈ្នះគេ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ entrepreneur
