តើអ្នកដឹងទេ? តំបន់អាស៊ីអាគ្នេយ៍គឺជាតំបន់ល្អដាច់គេសម្រាប់អ្នកធ្វើដំណើរបែបBackpacker
តំបន់អាស៊ីអាគ្នេយ៍ ត្រូវបានក្លាយជា តំបន់ដ៏មានប្រជាប្រិយភាពលើសគេ សម្រាប់អ្នកដំណើរបែបចាយវាយតិចតួច ឬគេហៅថា Backpacker ។ ពួកគេមិនចាំបាច់ចាយវាយ អីច្រើនពេកនោះទេក្នុងដំណើរកម្សាន្ត ពោលគឺចាយតិចតួច ប៉ុន្តែទទួលបានមកវិញលើសពីការរំពឹងទុកទៅទៀត។
តើអ្នកដឹងទេថា លើសពីការចាយវាយតិចតួចនេះ តើតំបន់អាស៊ីអាគ្នេយ៍មានអ្វីប្លែកទៀត ទើបអ្នកធ្វើដំណើរកម្សាន្តបែប Backpacker ទៅទស្សនា មិនចេះដាច់?
១) អាហារឆ្ងាញ់ៗ
ជាការពិតណាស់ អាហារប្រចាំទ្វីបអាស៊ីនេះគឺជាប់លេខ ១ ទៅហើយសម្រាប់ អ្នករស់នៅលោកខាងកើត។ បើអ្នកមិនជឿ អ្នកក៏អាចសាកល្បង បានជាមួយនឹង អាហារតាមផ្លូវនាទីក្រុងបាងកក, អាហារប្រភេទការីបែបម៉ាឡេស៊ី និង អាហារឆ្ងាញ់ៗ ប្លែកៗ ច្រើនមុខទៀតទៅតាមតំបន់ខុសៗគ្នា ដែលគេនិយម។
២) ចំណាយតិចបំផុត
សម្រាប់ អ្នកBackpacker ពួកគេត្រូវធ្វើយ៉ាងណា កាត់បន្ថយការចំណាយឲ្យកាន់តែតិចគឺកាន់តែល្អ។ មានទីកន្លែងទាក់ទាញច្រើននៅទ្វីបអាស៊ីនេះ ដែលជួយបំបាត់ភាពតប់ប្រមល់របស់អ្នកបាន ក្នុងនោះមានប្រទេសវៀតណាម និងឡាវ ដែលអ្នកត្រូវការចំណាយតែ ១៥ ដុល្លារប៉ុណ្ណោះក្នុងមួយថ្ងៃបូករួមទាំងអាហារនិងការធ្វើដំណើរទៅមក។ សម្រាប់អ្នកBackpacker កាលណាអ្វីៗ មានតម្លៃកាន់តែថោក វានឹងជំរុញឲ្យពួកគេកាន់នៅទីនោះបានយូរ។
៣) មធ្យោបាយធ្វើដំណើរធូរថ្លៃ
ការធ្វើដំណើរនៅ តំបន់អឺរ៉ុប និងអូស្ត្រាលី គឺមានការចំណាយខ្ពស់ណាស់។ តែបើធៀបនឹងតំបន់អាស៊ីអាគ្នេយ៍ នេះគឺងាយស្រួលធ្វើដំណើរណាស់ ជាពិសេសគឺតម្លៃសមរម្យទទួលយកបាន។ មិនថា ធ្វើដំណើរតាមមធ្យោបាយ រថយន្ត តាក់ស៊ី, រថភ្លើង, ឡានក្រុង ឬក៏យន្តហោះនោះទេ។
៤) ឆ្នេរសមុទ្រស្រស់ ស្អាត
ឆ្នេរជាច្រើនក្នុងចំណោមឆ្នេរស្រស់ស្អាតលើលោក គឺមាននៅតំបន់អាស៊ីអាគ្នេយ៍នេះឯង។ អ្នកអាចកម្សាន្តសប្បាយជាមួយធម្មជាតិ ស្ងប់ស្ងាត់ក៏បាន , ឬក៏ចង់កម្សាន្តសប្បាយបែបអ៊ូអរ ឬមាន ឧបករណ៍កម្សាន្តផ្សេងៗទៀតក៏បាន។
៥) ប្រវត្តិសាស្ត្រដ៏យូរលង់គួរឲ្យចាប់អារម្មណ៍
លោកអ្នកអាចនឹងនឹកស្មានមិនដល់ពីកាលប្រវត្តិដ៏យូរលង់ណាស់មកហើយក្នុងតំបន់មួយនេះ។ ដែលក្នុងនោះ បុព្វបុរសសម័យដើមបានចារទុក ឲ្យកូនចៅ រៀនសូត្របន្ត ដែលក្នុងនោះមានប្រទេសកម្ពុជាជាឧទាហរណ៍ស្រាប់។ យើងមើលឃើញថា ជនបរទេសតែងធ្វើដំណើរមកទស្សនា គ្មានស្រាកស្រាន្ត ពីប្រវត្តិប្រាង្គ ប្រាសាទសិលារបស់ខ្មែរ នៅខេត្តសៀមរាប រហូតទទួលបានចំណាត់ថ្នាក់លេខ១ ពីវែបសាយ Trip advisor ថាជាតំបន់ដែលមានភ្ញៀវចាប់អារម្មណ៍ជាងគេលើលោក៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ bootsnall
