អាជីវកម្មតិចតួចបំផុតជោគជ័យ ខណៈអាជីវកម្មភាគច្រើនបរាជ័យ កើតឡើងក្រោមហេតុផលទាំង ៥ នេះ
អាថ៌កំបាំងដែលសហគ្រិននីមួយៗតែងតែឆ្ងល់នោះគឺ ហេតុអ្វីអាជីវកម្មពួកគេបរាជ័យលឿនម៉្លេះ? មានសហគ្រិនមិនច្រើនទេដែលរកស៊ីបានជោគជ័យដូចបំណងនោះ ខណៈដែលសហគ្រិនជាច្រើនបានបរាជ័យសឹងតែគ្រប់ពេលទៅហើយ។
តើការបរាជ័យនោះបណ្ដាលមកពីអ្វីដែរ? ស្រាយចម្ងល់លើបញ្ហានេះ អាចការរៀបរាប់ខាងក្រោម៖
១) គ្មានផែនការអាជីវកម្ម
អាជីវកម្ម បរាជ័យដោយសារអ្នកគ្មានផែនការអាជីវកម្មទាំងរយៈខ្លីនិងវែង។ តាមពិតទៅអ្នកត្រូវមានផែនការសម្រាប់ត្រៀម ៣ខែទៀត ឬក៏ ១ឆ្នាំទៀតដែរក្នុងការរកស៊ី។ រួមទាំងមាន គោលដៅ និងលទ្ធផលរំពឹងទុកទៀតរឹតតែល្អ។ បើអ្នកបរាជ័យក្នុងការរៀបចំផែនការហើយ អ្នកដូចជាកំពុងបំផ្លាញអាជីវកម្មនេះហើយ។ ផែនការអាជីវកម្មប្រៀបដូចជាផែនទីបង្ហាញផ្លូវអាជីវកម្មរបស់អ្នកអ៊ីចឹង ដូចនេះអ្នកត្រូវរៀបចំផែនការអាជីវកម្មរបស់អ្នកឲ្យបានល្អ។
២) កំហុសនៃភាពជាអ្នកដឹកនាំ
អាជីវកម្មបរាជ័យដោយសារភាពជាអ្នកដឹកនាំខ្សោយពេក។ ភាពជាអ្នកដឹកនាំគឺត្រូវតែរៀនសម្រេចចិត្តឲ្យត្រឹមត្រូវគ្រប់ពេល។ កាលណាអ្នកសម្រេចចិត្តទៅខុសហើយនោះ អ្នកដូចជាកំពុងអូសមុខរបរឬអាជីវកម្មរបស់អ្នកទម្លាក់ទឹកអីចឹង។ បើមេទ័ពមិនខ្លាំង នោះអ្នកនឹងអាចបរាជ័យក្នុងសមរភូមមិនខាន។
៣) មិនចាប់អារម្មណ៍សេចក្ដីត្រូវការរបស់អតិថិជន
រាល់អាជីវកម្មទាំងអស់ ត្រូវចាត់ទុក អតិថិជន ស្ថិតនៅ លេខ ១ជានិច្ច។ អាជីវកម្មដែលបរាជ័យ គឺមកពីពួកគេ មិនខ្វល់ និងមិនចាត់ទុកភ្ញៀវឬអតិថិជនជាស្ដេច។ អតិថិជនគឺជាអ្នកធ្វើឲ្យអាជីវកម្មរបស់អ្នកអាចបន្តដំណើរទៅមុខទៀត ប៉ុន្តែប្រសិនបើគ្មានអតិថិជនទេ ច្បាស់ណាស់ថាអ្នកមិនអាចបន្តដំណើរអាជីវកម្មទៅមុខទៀតនោះទេ។ ដូចនេះត្រូវបម្រើអតិថិជនរបស់អ្នកឲ្យល្អ ឲ្យដូចស្ដេច។
៤) ខ្វះខាតដើមទុន
ការខ្វះខាតដើមទុន គឺជាសញ្ញាមួយគ្រោះថ្នាក់ដែរ។ វាបង្ហាញថាអ្នកកំពុងខ្វះថវិកាក្នុងការចំណាយលើបំណុល និងចំណាយចាយវាយនានាទៀត។ វាក៏អាចនាំឲ្យមានការបរាជ័យអាជីវកម្មលឿនផងដែរ។
៥) ទីតាំងមិនអំណោយផល
ទីតាំងមិនល្អគឺជាគុណវិបត្តិដែលនាំឲ្យអ្នករកប្រាក់ចំណូលបានតិចតួច។ ដោយសារទីតាំងឆ្ងាយក្នុងការធ្វើដំណើរ វានឹងធ្វើឲ្យអតិថិជនអ្នក ចាប់ផ្ដើមខ្ជិលច្រអូស ក្នុងការមកសាកល្បង ផលិតផលរបស់ខ្លួនជា មិនខាន ។ ដូចនេះការជ្រើសរើសទីតាំងគឺជាចំណុចស្លាប់រស់របស់អាជីវកម្មរបស់អ្នកផងដែរ៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ successharbor.com
