ហេតុអ្វីមានចៅហ្វាយល្អ ប្រសើរជាងមានការងារល្អ?
ចៅហ្វាយដ៏ល្អម្នាក់មិនមែនត្រឹមតែជាបុគ្គលដែលត្រឹមតែដឹងពីកិច្ចការអាជីវកម្មរបស់ក្រុមហ៊ុន និងផ្ទេរការងារទៅឲ្យបុគ្គលិកក្រោមបង្គាប់ធ្វើប៉ុណ្ណោះទេ។ ចៅហ្វាយល្អក៏មិនមែនត្រឹមតែជាអ្នកដែលចាំតែអង្គុយសម្រេចចិត្ត និងទទួលខុសត្រូវលើកិច្ចការក្រុមហ៊ុនតែម្នាក់ឯងរហូតនោះដែរ។ ចៅហ្វាយល្អមួយរូបគឺ ជាគ្រូ ជាអ្នកណែនាំផ្លូវ (Mentor) អ្នកលើកទឹកចិត្ត អ្នកជំរុញ ដល់បុគ្គលិកក្រោមបង្គាប់ឲ្យធ្វើអ្វីដែលត្រឹមត្រូវ និងជួយជ្រោមជ្រែងពួកគេឲ្យរីកចម្រើនទៅមុខទាំងអស់គ្នា។
ចៅហ្វាយល្អ គឺជាបុគ្គលដែលអាចបង្ហាញពីគុណវិបត្តិ និងចំណុចខ្សោយរបស់អ្នកហើយជាបុគ្គលដែលមានឆន្ទៈ និងប្ដេជ្ញាចិត្តខ្ពស់ដើម្បីណែនាំអ្នកឲ្យជោគជ័យ។ ក្រៅពីនេះ ចៅហ្វាយល្អគឺជាបុគ្គលដែលជួយលើកទឹកចិត្តអ្នក និងផ្តល់ឲ្យអ្នកនូវធនធានផ្សេងៗដើម្បីធ្វើឲ្យអ្នកមានទំនុកចិត្តក្នុងការងារដើម្បីបង្កើតបានជាផលិតផលគួរជាទីគាប់ចិត្ត។
ជាទូទៅក្រុមហ៊ុនពិតជាចង់បានបុគ្គលិកដែលអាចបំពេញនូវតម្រូវការបន្ទាន់នានារបស់ខ្លួន។ ប៉ុន្តែជាធម្មតាក្រុមហ៊ុនទាំងនោះបានសម្លឹងមើលក្នុងរូបភាពធំជាងនេះទៅទៀត។ ពួកគេចង់ដឹងថា តើអ្នកអាចចូលរួមចំណែករបស់អ្នកជាមួយពួកគេបានចាប់ពី ៥ ឆ្នាំ ១០ឆ្នាំ ២០ឆ្នាំឬយ៉ាងណា?
ទាំងនេះហើយជាមូលហេតុដែលចៅហ្វាយដ៏ល្អមួយរូបបានសាកសួរអ្នកអំពីគម្រោងអនាគតអាជីពការងាររបស់អ្នក។ ចៅហ្វាយដ៏ល្អម្នាក់នៅតែជឿជាក់ថា មនុស្សអាចរៀនសូត្រ និងត្រូវការរីកចម្រើនខាងបញ្ញាដើម្បីបំពេញចំណុចខ្វះខាតរបស់ខ្លួន។ នេះហើយជាមូលហេតុមួយដែលពួកគេត្រូវផ្តល់នូវជម្រើសនៃការបណ្តុះបណ្តាល និងអនុញ្ញាតឲ្យអ្នកបន្តការសិក្សាបន្ថែមទៀត។ ចៅហ្វាយល្អមួយរូបមិនរំពឹងទុកថា អ្នកអាចធ្វើការជាមួយពួកគេរហូតនោះឡើយ។ ក្នុងនាមជាអ្នកគ្រប់គ្រងមួយរូប ពួកគេបើកចិត្តឲ្យបានទូលាយ និងបានយល់រួចទៅហើយថា ថ្ងៃណាមួយអ្នកនឹងដើរចេញពីពួកគេ។
ប៉ុន្តែអ្វីដែលពួកគេយល់ថាវាចាំបាច់នោះគឺថា នៅពេលអ្នកកំពុងធ្វើការឲ្យពួកគេ ពួកគេត្រូវតែធ្វើឲ្យអ្នកជាបុគ្គលិកមានសក្ដានុពល និងទទួលបានឱកាសថ្មីៗដែលល្អប្រសើរ។ តើអ្នកមានដឹងទេ បុគ្គលិកខ្លះសុខចិត្តធ្វើការជាមួយការងារដែលខ្លួនមិនស្រលាញ់ដោយសារតែមានចៅហ្វាយល្អ ខណៈដែលបុគ្គលិកខ្លះទៀតរត់ចោលការងារដែលខ្លួនស្រលាញ់ព្រោះមានចៅហ្វាយមិនល្អ។
ខាងក្រោមនេះគឺជាសំនួរសំខាន់ៗលើកឡើងពីលក្ខណៈសម្បត្តិរបស់ចៅហ្វាយល្អ៖
១.តើចៅហ្វាយរបស់អ្នកបានសាកសួរពីលទ្ធផលការងារពីបុគ្គលិក និងអនុញ្ញាតឲ្យបុគ្គលិកធ្វើការសម្រេចចិត្តដោយខ្លួនឯងដែរឬទេ?
២.តើអ្នកមានអារម្មណ៍ថា មានកម្លាំងចិត្ត និងរីករាយដែរឬទេនៅពេលបំពេញការងាររបស់អ្នក?
៣.តើចៅហ្វាយរបស់អ្នកមានឆន្ទៈក្នុងការចែករំលែកបទពិសោធន៍ផ្ទាល់ខ្លួនដ៏សមស្របណាមួយដើម្បីធ្វើជាគំរូផ្តល់ភាពកក់ក្តៅចំពោះអ្នកដែរឬទេ?
៤.តើការប្រើប្រាស់កាយវិការចៅហ្វាយនាយរបស់អ្នកមានទំនាក់ទំនងទៅនឹងអ្វីដែលពួកគេបានលើកឡើង ការយកចិត្តទុកដាក់ និងបង្ហាញពីទំនុកចិត្តឲ្យបុគ្គលិកដែរឬទេ?
៥.តើចៅហ្វាយរបស់អ្នកមានភាពច្បាស់លាស់ និងផ្តល់ភាពច្បាស់លាស់ឲ្យអ្នកដែរឬទេនៅក្នុងការទំនាក់ទំនង?
៦.តើចៅហ្វាយរបស់អ្នកយកចិត្តទុកដាក់ស្តាប់នូវអ្វីដែលអ្នកនិយាយ និងឆ្លើយតបមកអ្នកវិញយ៉ាងមានប្រសិទ្ធភាពឬអត់?
៧.តើចៅហ្វាយរបស់អ្នកបាននិយាយប្រាប់អ្នកនូវអ្វីដែលពួកគេឃើញ និងប្រាប់ពីជម្រើសរបស់អ្នកថាជាអ្វីដែលឬទេ?
៨.តើចៅហ្វាយរបស់អ្នកបានយប្រើប្រាស់ភាពប្រាកដនិយម ការរៀបចំ និងផ្ដោតលើការងារក្នុងទំនាក់ទំនងការងារជាមួយអ្នកដែរឬទេ?
៩.តើចៅហ្វាយរបស់អ្នកបង្កើតទំនាក់ទំនងយ៉ាងជិតស្និទ្ធដល់បុគ្គលិកគ្រប់ជាន់ថ្នាក់ និងកោតសរសើរការខិតខំប្រឹងប្រែងរបស់ពួកគេដែរឬទេ?
១០.តើចៅហ្វាយរបស់អ្នកផ្តល់ដំបូន្មាន និងមតិស្ថាបនាឲ្យបុគ្គលិកប្រកបដោយភាពសមរម្យដែលឬទេ?
១១.តើចៅហ្វាយរបស់អ្នកបង្ហាញសកម្មភាពបែបណានៅពេលដើរចូលក្រុមហ៊ុន?
១២.តើចៅហ្វាយរបស់អ្នកនិយាយបែបណានៅពេលអ្នកអំពីអ្វីដែលជាភាពជោគជ័យធំបំផុតរបស់ពួកគេ? តើភាពជោគជ័យនេះមានទំនាក់ទំនងទៅនឹងគុណតម្លៃរបស់ក្រុមហ៊ុន និងគុណតម្លៃរបស់អ្នកដែរទេ?
១៣.តើចៅហ្វាយរបស់អ្នកបានបង្ហាញរូបថត រង្វាន់កិត្តិយស ឬវត្ថុមានតម្លៃដែលបង្ហាញអំពីបុគ្គលិកលក្ខណៈ និងអត្តចរិតរបស់ពួកគេដែរទេ?
១៤.តើចៅហ្វាយរបស់អ្នកមានឆន្ទៈចង់ពិភាក្សាអំពីការទទួលខុសត្រូវរបស់អ្នកទាំងពីរ និងគំនិតផ្ដួចផ្ដើមរបស់អ្នកដែរឬទេ?
១៥.តើបច្ចុប្បន្នចៅហ្វាយរបស់អ្នកកំពុងធ្វើបំពេញការងារយ៉ាងសកម្មនៅក្រៅក្រុមហ៊ុន ឬបន្តការសិក្សាបន្ថែមលើជំនាញរបស់ខ្លួនដែរឬទេ?
ប្រភព៖ Inc
