កុំនិយាយឃ្លាទាំង៦នេះឲ្យសោះ នៅកន្លែងការងារ ជៀសវាងនាំទុក្ខដាក់ខ្លួនឥតអំពើ
ពាក្យសម្ដីគឺជាផ្នែកមួយស្ដែងចេញពីអត្តចរិតរបស់អ្នកផ្ទាល់ ហេតុនេះនៅពេលដែលអ្នកនិយាយអ្វីម្ដងៗ អ្នកគួរប្រយ័ត្នព្រោះថាបើពាក្យទាំងនោះត្រូវបាននិយាយចេញមកហើយគឺមិនអាចដកទុកវិញបានទេ។ ៦ឃ្លាខាងក្រោមនេះជាឃ្លាដែលអ្នកគួរតែចៀសវាងប្រើប្រាស់វានៅពេលដែលអ្នកធ្វើការជាមួយអ្នកដទៃ។
១) វាមិនយុត្តិធម៌ទេ៖ ភាគច្រើន ឃ្លានេះត្រូវបាននិយាយចេញពីបុគ្គលិកដែលមិនចេះស្កប់ស្កល់នូវអ្វីដែលខ្លួនមាន។ បើសិនជាអ្នកមិនចូលចិត្តនរណាម្នាក់ ឬមិនពេញចិត្តនឹងការងារអ្វីមួយ អ្នកគួរតែនិយាយត្រង់ៗ តែក៏តាមកាលៈទេសៈដែរ ទើបមើលទៅសមជាអ្នកមានគំនិតចាស់ទុំ។ សូមកុំនិយាយតែពាក្យថា មិនយុត្តិធម៌ធម៌ ស្របពេលដែលអ្នកមិនបានធ្វើអ្វីជាដុំកំភួន។
២) ធ្លាប់តែបែបនេះរហូតមកហើយ៖ នៅពេលអ្នកនិយាយឃ្លានេះពេលណា វានឹងស្ដែងឲ្យឃើញថាអ្នកជាមនុស្សដែលចូលចិត្តធ្វើការជំទាស់ហើយមិនចេះទទួលយកគំនិតអ្នកដទៃនោះទេ។ ទង្វើបែបនេះ ធ្វើឲ្យអ្នកដទៃមិនសប្បាយចិត្តក្នុងការធ្វើកិច្ចការជាមួយអ្នកឡើយ។
៣) មួយភ្លែតទេរួចហើយ៖ គេអាចនិយាយបានថាអ្នកជាមនុស្សដែលមើលស្រាលការងារ។ មិនថាអ្នកមានទំនុកចិត្តប៉ុណ្ណា ឬគិតថាការងារនោះងាយស្រួលយ៉ាងណាក៏ដោយ អ្នកមិនគួរប្រើប្រាស់ឃ្លានេះនោះទេ។
៤) វាមិនត្រូវនឹងការងាររបស់ខ្ញុំទេ៖ វាពិតជារឿងគួរឲ្យភ្ញាក់ផ្អើលនៅពេលដែលយើងត្រូវបានដាក់ឲ្យធ្វើការលើសពីអ្វីដែលយើងចេះ ឬជាជំនាញរបស់យើង។ យ៉ាងណាក៏ដោយអ្នកមិនគួរបដិសេធនោះ ហើយគួរតែព្យាយាមធ្វើវាឲ្យអស់ពីសមត្ថភាព ហើយចាំនិយាយជាមួយចៅហ្វាយនាយអ្នកតាមក្រោយពីការងារបន្ថែមនោះ។
៥) មិនមែនជាកំហុសរបស់ខ្ញុំទេ៖ ចូរកុំទម្លាក់កំហុសឲ្យអ្នកដទៃឲ្យសោះ។ អ្នកត្រូវតែចេះទទួលស្គាល់ និងមានទំនួលខុសត្រូវខ្ពស់ចំពោះកំហុសរបស់ខ្លួន។ និយាយការពិតពីអ្វីដែលអ្នកបានធ្វើខុសនោះអ្នកនឹងត្រូវបានអ្នកដទៃគោរពពីការមិនប្រឌិតរឿងរ៉ាវ។
៦) ខ្ញុំស្អប់ការងារនេះណាស់៖ គ្មាននរណាម្នាក់ចង់ឭ ពាក្យនេះពីអ្នកសោះឡើយ។ កុំធ្វើជាបុគ្គលិកដែលធ្វើឲ្យអ្នកដទៃមានអារម្មណ៍មិនល្អហើយមិនពេញចិត្តខ្លួន។ បើអ្នកស្អប់វា គួរលាឈប់ទៅហើយទៅរកការងារដែលអ្នកស្រលាញ់ទៅមិនមែនអង្គុយរអ៊ូរទាំមិនពេញចិត្តពីការងារបែបនេះទេ៕
ប្រែសម្រួល៖ តូច ម៉ាយ៉ារស្មី ប្រភព៖ ziglarvault.com
